Tag Archives: Brad Pitt

Brad Pittek utzitako biharamuna

Utzi erantzuna
Share Button

Esnatu, begiak ireki eta belarria gerturatu dut gelako leihora: euri soinurik ez. Ez zuen hotsik egiten, baina euria ari zuen. Bigarren egun hau ere euripean pasa behar! Gaurko nire asmoa Brad Pitt etxera itzuli aurretik berriz ikustea edota beste pertsona ospetsuren bat in fraganti aurkitzea zen. Asmo bera zuten goizean goizetik Maria Cristina hotelean bildu diren zaleek ere. Ez nintzen bakarra, ez!

Galdera bat nagusitzen zen guztion artean: Non da Brad Pitt? Oraindik Donostian al da edo jada joan da? Iritsi bezain laster jaso dut berri txarra: Brad Pitt joan da. Goizeko 10:30ean edo atera da Maria Cristina hotelaren atzeko atetik. Zain zituen ohiko sarreran jarraitzaile eta kazetari goiztiarrenak, baina… hura ikusi gabe geratu gara. Isilpean ihes egin du estatubatuarrak eta ezer esan gabe gainera. Zurrumurru gaiztoenek diotenaren arabera, Pitt ez omen zegoen sarrera nagusitik ateratzeko moduan. Atzoko azkeneko Coca-Colak kalte egin omen zion, antza. Bolo-bolo zebilen berria: gaua luzea izan omen zen Brad Pittentzat eta gaur goizean ajea zuela eta… Belarri fin onetatik entzun dudan beste kontu bat, ez dakit kontu hutsa ala kaleko kondaira bat den, baina tira… Goizean goiz gosaltzen bezperako arropa berarekin omen zegoen eta parranda osteko kiratsa omen zerion. Ai, ai, ai, Brad harrapatu zaitugu: ekipajean desodorantea sartzea ahaztu, alajaina!!!

Behin Brad Pitt ikusiko ez nuela onartu dudanean atzokoaz oroitzeko garaia heldu da. Pitt zen gaurko hizpide nagusia kalean, ezbairik gabe. Bakoitzak harro erakusten zituen lorturiko argazki, bideo edota sinadurak. Harropuzteko garaia zen. Jarraitzaile horietako batek atzo lorturiko Pitten sinadura erakutsi dit. Atzo aipatu bezala, sinadura sinplea zen, baina ez edonorena. Sinadura erakutsi didan emakumeak aitortu didanez, goizeko zortzietan gerturatu zen Maria Cristinara Brad Pitt iristerako lekurik onena hartzeko.

Maria Cristina inguruan ere nabari zen Brad Pitt Donostiara heldu osteko eguna zela, egun berezia zela alegia. Hotelaren eta Victoria Eugenia antzokiaren artean pantaila erraldoi bat dago bisitarien gozamenerako. Ba, aipaturiko pantailan behin eta berriz errepikatu dituzte Tarantinok eta Pittek alfonbra gorrian eginiko ibilbidea eta baita Victoria Eugeniako ekitaldiko irudiak ere. Joan bazaigu ere, Brad Pitt oraindik albiste da eta zeresana ematen jarraituko du.

Batzuk hasiak dira hurrena berriz Donostiara noiz etorriko den iragartzen… Donostia saria edo eman beharko diote berriz ere itzuli dadin!!!

Batzuk badoaz eta besteak badatoz!
Ez du atzo Brad Pittek bilduriko adina jende erakarri, baina jende andana gerturatu da Maria Cristinara Ang Lee zuzendariari ongi etorria egitera.

Ordu bata inguruan heldu da zuzendaria Donostiara. Gogoratu, Taking Woodstock, bere azken filma aurkeztera datorrela. Horiek biharko kontuak dira, ordea. Aurrez, bizpahiru minutuz egon da sinatzen eta argazkilarien eta telebista kateetako kameren aurrean gelditu da eskaileretako bidea hartu aurretik. Han zuen zain Mikel Olaziregi Zinemaldiko zuzendaria.

Maribel Verduk jaso du Zinemako Sari Nazionala
Kanpoan pertsona ospetsu gutxi zebilela eta, (Ang Lee salbu jakina) Zinemako Sari Nazionalaren ekitaldira sartu naiz ea zerbait interesgarria aurkitzen nuen. Kazetari mordoa eta Estatuko zein Euskal Herriko aktore zein politikariekin egin dut topo. Han zeuden, besteak beste, Francis Lorenzo eta Barbara Goenaga aktoreak, Odon Elorza, Angeles Gonzalez-Sinde Kultura Ministroa, Arantza Quiroga Eusko Legebiltzarreko presidentea, Rafaela Romero Gipuzkoako Batzar Nagusietako presidentea eta beste hainbat.

Ekitaldia laburra, baina emozioz betea izan da. Maribel Verduk eten egin behar izan du bere hitzaldia emozioaren eraginez. Ezin izan dio negarrari eutsi eta neuri ere “oilo ipurdia” jarri zait. Oso irribartsu agertu da eta behin eta berriz konplizitate keinuak eskaini dizkie gerturatutakoei. Esker oneko hitzak izan ditu urte hauetan bere alboan egon diren lankide, lagun eta senitartekoentzat. Bejondeizula Maribel!!!

Brad Pitten iritsierak kolorez bete du Zinemaldiko lehen eguna

Utzi erantzuna
Share Button

Zinemaldia aurkezten duen kartela kolorez beteta dago eta antolatzaileek eurek esan dute nolabait kartel horren bidez, kolore guztien aldeko apustua egin nahi izan dutela. Ekitaldi honetako irudiak kolore guztiak ordezkatu nahi izan omen ditu. Edota hori da Zinemaldiko gida irekiz gero lehen orrian irakurri daitekeena. Errealitatea bestelakoa da ordea: kolore guztiak ez gara berdinak.

Eta esango duzue: zertara dator hori guztia? Goizean Kursaalera gerturatu naiz zegokidan akreditazioa jasotzera. Nire argazkia eta nire izen-abizenak zeramatzan txartel berde bat eman didate. Dena ongi. Nik Zinemaldiko beste kazetari bat nintzela uste nuen, guztien artean beste bat baino ez. Nire usteak erabat aldatu dira Maria Cristina hotelera gerturatu naizenean. Brad Pitten iritsiera ikustea zen nire asmoa, beste askorena bezala. Sarreran beltzez jantzitako gizon batek egiten zituen filtro lanak. Aurpegira begiratu gabe nire akreditazioaren kolore berdea ikusi eta aurrera jarraitzea eragotzi dit. Eta nik pentsatu dut nire artean: “Ez al didate ba esan kolore guztiak onartzen dituztela eta kolore guztien aldeko apustua egin dutela?” Listua irentsi eta bigarrenez kazetariei gordetako etxoletara igarotzen saiatu naiz, baina alferrik. Bigarren saiakeran behintzat, zergatik pasa ezin nuen azaldu dit: “Ez kolore horiko edota marroiko akreditazioa izan behar duzu horra pasatzeko.” Eta bien bitartean, kolore guztiak berdinak direla lau haizeetara zabaltzen…

Ez zait burua jaitsi eta errepidearen beste aldera igarotzea besterik geratu. Jarraitzaile guztiak zeuden tokira gerturatu naiz. Koska eta txoko guztiak leporaino beteta zeuden, jada. Zer uste zenuen bada, azken unean etorri eta lekurik onenarekin geratuko nintzela? Lehen ilarara gerturatzea ezinezkoa zen eta inguruko aulkietan eta loreontzietan ez zegoen zirrikiturik. Azkenean, naturak eman didan 1,72 metroko alturatik ikusi behar izan dut Pitten iritsiera aterki, argazki kamara eta zenbait bururen artetik.

Adi, Brad Pitt Donostian da eta bakarrik etorri da!
Azken egunetan asko hitz egin da Brad Pitten iritsieraz eta baita bakarrik edota familiarekin etorriko zen ere. Azkenean bakarrik etorri da. Familiako kiderik gabe etorri den arren, oso adeitsu eta sinpatiko agertu da jendearen aurrera. Egia esan, harritu egin nau bere moduko izar bat hain adeitsu agertu izana. Bost minutuz egon da jendea agurtzen, eskua ematen eta sinatzen. Hori bai, sinadura pentsatzen ez du denbora askorik pasa: hiru urteko haur baten zirriborro bat zirudien. B eta P antzeko bat ikusi zitekeen, besterik ez. Hala ere, ni neu zirriborro hori eskuan izateko gogoarekin geratu naizela aitortu behar dut. Pittek bisera beltza, eguzkitako betaurrekoak, bakeroak eta larruzko jaka beltz bat zeramatzan soinean. Oso dotore etorri da. Hala ere, beti dago bainaren bat eta nire gusturako bizar gehitxo zuen. Hor zehar entzun dudanez, film baten grabaketa baterako prestatzen ari omen da eta hori ei da bere itxura berriaren arrazoia. Dena dela, bera izateagatik barkatzen diogu.

Eguraldia, eguneko beste protagonista
Brad Pitt izan da lehen egun gris honi kolore pixka bat eman dion bakarra. Donostiako kaleetan ez zegoen disdira egiten zuen ezer. Euria goitik behera… Victoria Eugenia parean, euri zaparradatik gorde nahian zebiltzan espainiar batzuekin egin dut topo. Harrituta zeuden Donostian topatu duten eguraldi petralarekin. Alboan nuen kamerak non dauden gogoratu die, ordea: “Hau Donostia da, hemen beti egiten du euria.” Kazetariak irribarre txiki batez agurtu ditu espainiarrak, euria Donostiaren parte dela gogoratu nahian edo. Alfonbra gorriak ere babesa aurkitu behar izan du plastiko azpian. Alfonbraren kolore gorriak ez du disdira handirik egingo, harik eta Tarantino, Pitt eta enparauak bertatik igarotzen diren arte.

Iluntzean eta eguraldiak horretarako tarterik uzten badu, Quentin Tarantino eta Brad Pitt ikusi ahal izango ditugu Maria Cristina eta Victoria Eugenia arteko bidea egiten. Pitt Donostian ikusteko azken aukera izan daiteke… Estatubatuarra ikusteko aukerarik baduzue edota Zinemaldian bazabiltzate kontatu zuen esperientziak gure blogean.

Brad Pitt bakarrik ala emaztearekin etorriko da?

1 Reply
Share Button

Ziur asko hori izango da eguerdian aktore estatubatuarra Donostiako Zinemaldira datorrela iragarri denetik askok eta askok buruan duten galdera. Brad Pitt irailaren 18an Donostian izango da Quentin Tarantino zuzendariarekin batera Malditos bastardos bere azken filma aurkezten.

Azken aldian krisi eta banaketa hotsek inguratu dute bikotea, nahiz eta Canneseko alfonbra gorrian bikoteak hori guztia gezurtatu. Kanpai hotsak ere entzun dira, baina momentuz ez da ezer gauzatu. Azken hilabeteetako zurrumurruen ondoren baliteke Angelina Joliek senarraren alboan egon nahi izatea zoriontsuak direla frogatzeko.

Bakarrik etorriko al da? Edota familia osoarekin? Eman zure iritzia gure tartean. Gozatu ezazu irailaren 18an zinema-aretoan estreinatuko den Malditos bastardos filmaren aurrerapenarekin.

Brad Pittek 'Malditos Bastardos'en bigarren atala egin nahi du

Utzi erantzuna
Share Button

Malditos Bastardos oraindik zinema-aretoetara heldu ez bada ere, zurrumurruek diotenez baliteke bigarren atala egitea. Harvey Weinstein filmeko produktore exekutiboa izan da balizko bigarren filmaz hitz egin duena: ”Bradek (Pitt) Malditos Bastardos II egin nahi du. Denek egin nahi dute bigarrena, lehenengoa zinema-aretoetara heldu ez den arren. Zoritxarrez ezin du argumentuaren gainean ezer gehiago esan.” Produktoreak adierazpen horiek egin ditu GQ Magazine aldizkariari eginiko elkarrizketa batean. Horrez gain, saga bat egiteko adina material dagoela aipatu du: ”Bi film egin genitzakeen edota hiru.”

Weinsteinek iraupenaren eta azken muntaiaren gainean izan den eztabaidaz jardun du. Aurreratu duenez zinema-aretoetan ikusiko dugun filma ez da Cannesen eman zuten bera izango eta filmak ez du bi ordu eta erdi baino gehiago iraungo.

Malditos Bastardos II. Mundu Gerran girotuta dago. Soldadu talde bat hilzorian dago. Bigarren aukera bat izango dute. Bizitzeko aukera horren truke, Raine tenientearen agidupean jarriko da. Taldearen helburua Fratzian infiltratu eta naziak erailtzea da.

Tarantinoren gudariak zinema-aretoetan ikusi ahal izateko irailaren 18ra arte itxaron beharko da.

Brad Pittek ‘Malditos Bastardos’en bigarren atala egin nahi du

Utzi erantzuna
Share Button

Malditos Bastardos oraindik zinema-aretoetara heldu ez bada ere, zurrumurruek diotenez baliteke bigarren atala egitea. Harvey Weinstein filmeko produktore exekutiboa izan da balizko bigarren filmaz hitz egin duena: ”Bradek (Pitt) Malditos Bastardos II egin nahi du. Denek egin nahi dute bigarrena, lehenengoa zinema-aretoetara heldu ez den arren. Zoritxarrez ezin du argumentuaren gainean ezer gehiago esan.” Produktoreak adierazpen horiek egin ditu GQ Magazine aldizkariari eginiko elkarrizketa batean. Horrez gain, saga bat egiteko adina material dagoela aipatu du: ”Bi film egin genitzakeen edota hiru.”

Weinsteinek iraupenaren eta azken muntaiaren gainean izan den eztabaidaz jardun du. Aurreratu duenez zinema-aretoetan ikusiko dugun filma ez da Cannesen eman zuten bera izango eta filmak ez du bi ordu eta erdi baino gehiago iraungo.

Malditos Bastardos II. Mundu Gerran girotuta dago. Soldadu talde bat hilzorian dago. Bigarren aukera bat izango dute. Bizitzeko aukera horren truke, Raine tenientearen agidupean jarriko da. Taldearen helburua Fratzian infiltratu eta naziak erailtzea da.

Tarantinoren gudariak zinema-aretoetan ikusi ahal izateko irailaren 18ra arte itxaron beharko da.

Milioi bat dolar Angelina eta Pitten poltsikotik Pakistango errefuxiatuen kanpamentura

Utzi erantzuna
Share Button

Pakistango kanpamentuetan bizi diren errefuxiatuei milioi bat dolarreko diru-laguntza eman dio bikote estatubatuarrak. Dirua Nazio Batuen Errefuxiatuen Agentziari eman diote eta agentziak bideratuko du aipaturiko kopurua.

Angelina Joliek (El intercambio) 8 urte daramatza aipaturiko agentziarekin kolaboratzen. 2001etik boluntarioa da eta arrazoi hori dela medio, gerran dauden herrialdeak bisitatu izan ditu: Irak, Pakistan, Afganistan, India edota Indotxinako penintsula, besteak beste. Ez da bikoteak agentziari dirua ematen dio lehen aldia. Izan ere, 2007an kopuru bera bideratu zuten Sudango Darfur eskualdera. Beste hainbatetan ere dirua eman izan dute giza proiektuetara.

Nazio Batuen Errefuxiatuen Agentziaren webgune ofizialeko bideo batean Angelina Joliek dei egiten die herritarrei errefuxiatuen arazoez konturatu daitezen.

Ikus daitekeen bezala, bikoteak filmak egin eta munduko alfonbra gorrietan ibiltzeaz gain, zerbait gehiago egiten du. Brad Pitt laster ikusi ahal izango dugu zinema-aretoean Quentin Tarantinoren Inglorious Basterds filmean. Kontsulta itzazu zinemari eta zinema-aretoetako ordutegiari eskainitako gure txokoak.

Angelina Jolie eta Brad Pitt aldarera bidean!

Utzi erantzuna
Share Button

Hollywoodetik etengabe datoz aktoreen gaineko zurrumurruak. Duela gutxi Sean Penn eta Robin Wright aktoreek atzera jo zuten eta ez banatzea erabaki zuten. Orain Angelina Joliek eta Brad Pittek krisi zurrumurruekin behingoz amaitu nahi dute. Angelina Joliek Brad Pittekin ezkondu nahi du eta baliteke ezkontza eguna ere finkatuta egotea.

Brad Pittek ultimatuma eman zion duela bi hilabete. Ordudanik, krisi eta banaketa ahotsak izan dira nagusi. Canneseko alfonbra gorrian banaketa iragartzen zuten zurrumurru horiek gezurtatu zituzten. Angelinak errotik amaitu nahi du espekulazio horiekin.

Oraingoan Angelina izan da Bradi ultimatuma eman diona. Prest dago zurrumurru guztiak isilarazteko eta inoiz baino konbentzituago dago aldaretik igarotzeaz. Angelinaren ustez, Bradekin ezkonduko balitz argi geratuko litzateke euren artean ez dagoela inolako arazorik eta inoiz baino maiteminduago daudela. Are gehiago udako egun baterako hitzordua jarri dutela dirudi. Ezkontza New Orleans hirian ospatuko litzateke, El Curioso Caso de Benjamin Button grabatu zen hirian, hain zuzen ere.

Kontsulta itzazu zinemari eta zinema-aretoei eskainitako txokoak.

Harry Potterreko pertsonaiak, Brad Pitten makillatzailearen eskuetan

Utzi erantzuna
Share Button

Harry Potter sagako izar gazteak digitalki zahartuko dituzte. Saga itxiko duen filmean Daniel Radcliffe eta gainerako protagonistei Brad Pitt El curioso caso de Benjamín Button filmean uzkurtzeko eta zimurtzeko erabili zuten teknologia bera erabiliko dute.

Harry Potter y las reliquias de la muerte azken liburuak denboran aurrera egiten du, 19 urte, hain zuzen ere. Liburuko protagonistak 30 urte inguruko mago gazteak dira orain. Sagako azken filma egiteko David Heyman produktoreak zein David Yates zuzendariak orain arteko aktore berak erabiltzea erabaki dute. Beraz, Harry Potter y las reliquias de la muerte filmean ere Daniel Radcliffe, Emma Watson eta Rupert Grint ikusi ahal izango ditugu.

Filma egiteko beste aukera bat euren antza zuten aktore zaharragoak bilatzea zen. Hala ere, El curioso caso de Benjamín Button filmak lorturiko arrakasta ikustean aktore berdinen aldeko apustua egitea erabaki zuten zuzendariak eta produktoreak: ”Filma egiteko modua bilatzen ari ginen, ordezkatu zitzaketen aktoreengan pentsatzen ari ginen… El curioso caso de Benjamín Button eta aktoreak zahartzeko teknologia horren berri izan genuenean ordea, euren aproba egitea pentsatu genuen. Izan ere, izugarria litzateke azken momentuan aktore berriak sartzea.”

Azken emaitza ikusteko 2011ko uztailaren 15a arte itxaron beharko da. Zinema-aretoetara iristen Harry Potterren hurrengo filma Harry Potter y el misterio del principe izango da 2009ko uztailaren 17an.

Almodovar, Coixet eta Amenabar, Canneserako hautatuak

Utzi erantzuna
Share Button

Pedro Almodovar eta Isabel Coixet Canneseko Nazioarteko Zinema Jaialdiko Urrezko Palmondoa irabazteko hautagai dira. Bi zuzendari espainiarrekin batera sail ofizialean leihatuko dira Jane Champion, Ang Lee eta Quentin Tarantino zuzendariak.

Almodovarren Los abrazos rotos eta Coixeten Map of the sounds of Tokiorekin batera ondorengo filmak izango dira Urrezko Palmondoa irabazteko lehian: Jane Campionen Bright Star, Ang Leeren Taking Woodstock, Alain Resnaisen Les Herbes folles, Quentin Tarantinoren Inglorious Basterds eta Lars von Trierren Antichrist.

Lehiaketatik kanpo proiektatuko da Amenabarren Agora filma.

Up animaziozko filmak emango dio hasiera 2009ko Canneseko Nazioarteko Jaialdiari maiatzaren 13an eta amaitzeko Jan Kounenen Coco Chanel & Igor Stravinsky filma proiektatuko da maiatzaren 24an.

Zinezalea bazara eta ikusi nahi duzun filma noiz eta non proiektatzen den ez badakizu, igaro zaitez zinemako karteldegiari eskainitako web orrialdetik.