Zinemako estreinaldiak

eitb.com-ek sari ederrak irabazteko aukera ematen dizu hemen, Zinemako Blogean, irakurgai dituzun edozein albistetan zure iritzia eta kontakturako email bat uzteagatik.

Zinema-aretoetan dauden filmei buruzko iritzia, zinema munduan gertatzen diren albiste bitxien ingurukoa, gustuko dituzun pelikulen gainekoa… nahi duzuna komenta dezakezu!

Hauexek dira lehen opariak:

- ETB2ko ”Date el bote” saioko joko ofiziala (EITB produktuak). Irabazlea: Txontxu (zozketa: azaroak 2)

-Filmetako errezetak biltzen dituen ”Cocine” liburua (EITB produktuak). Irabazlea: bela (zozketa: urriak 19)

-George, kuxkuxeroa DVDa (EITB produktuak). Irabazlea: Esther (zozketa: urriak 5)

- Rey de Copas Atlheticen historiari buruzko dokumentala (EITB produktuak). Irabazlea: Sergio (zozketa: irailak 21)

- Rudy, txerri azkarra DVDa (EITB produktuak). Irabazlea: Haritz (zozketa: irailak 7)

- Oh Happy Day musika CDa (EITB produktuak). Irabazlea: Haritz (zozketa: abuztuak 24)

- Mihiluze jokoa, PCrako (EITB produktuak). Irabazlea: Xan (zozketa: abuztuak 10)

- Robots euskerazko filmaren DVDa (EITB Produktuak). Irabazlea: Arkaitz: (zozketa: uztailak 27)

- Ice Age 2 euskerazko filmaren DVDa (EITB Produktuak). Irabazlea: Ali (zozketa: uztailak 13)

- Aupa Etxebeste! filmaren DVDa (EITB Produktuak). Irabazlea: Josu (zozketa: ekainak 30)

- Go!azen filmaren dvda (EITB Produktuak). Irabazlea: Marian (zozketa: ekainak 15)

- Heroes telesaileko hiru kamiseta. Irabazleak: Jonan, begioker, Itziar (zozketa, ekainak 1)

- Mihiluze jokoa, PCrako (EITB Produktuak). Irabazlea: Jonan (zozketa,maiatzak 18)

- Filmetako errezetak biltzen dituen “Cocine” liburua (EITB Produktuak). Irabazlea: Ana (zozketa, maiatzak 5)

Share on Facebook

Ostegun honetan, urriak 29, hasiko da 2012 filmaren estreinaldi egunerako atzera-kontaketa. Roland Emmerich zuzendariaren film apokaliptikoaren kanpaina egiteko, azken garaiotan kaleratu den 30 segundoko telebistarako spot ikusgarriena emango dute estatu mailako telebista-kate nagusietan.

23:00ak puntu-puntuan direnean, TVE1, Antena3, Telecinco, Cuatro eta La Sexta kateek, TDTko Antena 3 Neox eta Nova, FDF, la Siete eta SET nahiz ordaindutako AXN, FOX, Calle 13, Discovery Channel eta National Geographic kateek iragarki bera emango dute; gero on-line mundura igaroko den kanpaina bereziari hasiera emanez.

Gutxi gorabehera 13 milioi ikuslek ikusiko omen dute batera iragarkia; une horretan telebista ikusten ari direnen %80k, alegia.

Interneteko inbasio mediatikoa hurrengo egunean iritsiko da, urriaren 30ean. Antzeko zerbait egingo dute sarean ere, eta webgune, atari zein sare hauek hartuko dute parte: MSN, Google SEM, Yahoo, Terra, El Mundo, Marca, Facebook, Tuenti, 20 Minutos, Grupo G+J Adlink, Adconion, AOL Advertising, FHM, Tu Tv & Periodista Digital. Internauten %77arengana iritsiko omen da kanpaina.

On-line ekimen honek Sony Pictures Releasingen 2.0. gune berrira bideratuko ditu erabiltzaileak eta bertan, urteko fenomeno zinematografikoa izango omen denaren 5 minutu ikusteko aukera izango da.

2012 munduaren amaiera eragingo duen kataklismo baten inguruko abentura epikoa da. Bizirik irauten dutenen istoria azaltzen duen film zirraragarria. Roland Emmerich da zuzendaria eta ondorengo hauek aktoreak: John Cusack, Chiwetel Ejiofor, Amanda Peet, Oliver Platt, Thandie Newton, Danny Glover eta Woody Harrelson. Hain zuzen ere, Donostiako Zinemaldian izan ziren horietako batzuk filma aurkezten.

Abenduaren 21ean iritsiko da gure zinema-aretoetara.

Share on Facebook

Pilareko Ama Birjinaren eguna dela eta, askok egun bat luzatuko duzue asteburua eta ziur planak egin dituzuela kanpora atera eta egunerokotasuna alde batera uzteko.

Umeak badituzue etxean, baina, zailagoa izan liteke urrutira joatea. Horregatik, gertu-gertuan egin dezakezuen familia-proposamena dakarkizuegu, asko baitira egun hauetan zinemetan ikusi ditzakegun umeentzako filmak. Hala, ordu eta erdiz edo, buruhausteak alde batera utzi eta barre pixka bat egitera gonbidatzen zaituztegu.

Hemen dituzue aukera guztiak. Irakurri fitxak eta aukeratu gustukoena!

G-Force “Licencia para espiar”, James Bond direla uste duten akuri batzuen istorioa.

Vicky, bikingoa, zinemarako moldatu duten pertsonai ezaguna.

Up, 3Dko animazioan urteko estreinaldia izan dena.

Pequeños invasores, alienigenak erasoan.

School Rock Band, talde bateko kide izatearen garrantziaz diharduen musikala.

Shorts, la piedra magica, Robert Rodriguezek haurrentzako egin duen lehen filma.

Gainera, Iparraldean bizi zaretenok nahiz muga oso gertu duzuenok Le petit Nicholas (Nikolas txiki) pertsonaiaren filma ikusi ahal izango duzue. Oraindik Hegoaldean estreinaldi-datarik ez duen pelikula, hain zuzen ere.

Share on Facebook

Friends saio estatubatuarra gustuko zutenak pozik egon daitezke. Izan ere, Jennifer Aniston (Que les pasa a los hombres), Courteney Cox (Mas alla de los sueños), Lisa Kudrow (School Rockband, Hotel para perros), Matt LeBlanc, Matthew Perry (17 otra vez) eta David Schwimmer (Madagascar 2) berriz ere elkartu egin daitezke, azken urteetan izan den telebistako serie arrakastatsuena zinemara eramateko.

Friends-en, Guntherren, Central Parkeko kafetegiko zerbitzariaren, papera egiten zuen aktoreak aurreratu duenez, ideia gustuko dute aktore guztiek eta filma egiteko interes handia dute guztiek.

2004an grabatu zuten telebistako saioaren azken atala, eta orduz geroztik etengabeak izan dira Monica, Rachel, Phoebe, Chandler, Ross eta Joey zineman ikusiko genituela zioten zurrumuruak. Orain arte, baina, horietako zurrumurru bat bakarra ere ez da egikaritu. Orain baina, Sexo en Nueva Yorkek zineman izan duen arrakasta ikusita (hau ere telebistako saioa zen berez), momentu ideala dela uste dute guztiek.

The News of the World egunkariak kaleratutako informazioaren arabera, David Crane eta Marta Kauffman, telesaioa sortu zutenak, egongo dira zinemako proiektuaren atzean eta 2011ko udan iritsiko da mundu guztietako zinemetara.

Filma zinemara iritsi bitartean, ikusi orain zinemetan dauden pelikulen ordutegiak.

Share on Facebook

Gaur arte zazpigarren artearen blog honetan, zinemako albiste, iragarpen eta txutxumutxu guztien berri ematen saiatu gara orain arte, baina gaurtik aurrera, Donostiako Zinemaldia izango da protagonista bakarra.

Irailaren 18 honetan hasi eta datorren larunbatera arte, irailak 26, gure jaialdi nazioartekoenean gertatzen diren gauza bitxienak kontatzeko erabiliko dugu tarte hau, hurrengo egunetan Donostia izango baita Zinemaren epizentroa, eta hemen gertatuko baitira “gertatu beharrek” gauza gehienak. Hori espero dugu, behintzat!

Atzo, Quentin Tarantino iritsi zenean, hasi zen benetako zalaparta, eta hari horri tiraka, izugarrizko jendetza espero da gaur iluntzean Brad Pitt iristen denean. Izan ere, elkarrekin egin duten lehen filmak, Malditos bastardosek, irekiko du Zabaltegi-Perlak atala eta ikusmin itzela sortu dute protagonistek.

Brad Pitten presentzia askok nahi genukeena baino motzagoa izango da, ordea, gure artean. Zabaltegi inauguratu baino ordu eta erdi lehenago iritsiko da eta ez omen dago bere planen artean denbora gehiegi geratzea tamalez. eitb.com-ek zuzenean eskainiko dizugu Pitt eta Tarantinoren prentsaurrekoa, eta ea bertan diren kazetariek denbora gehiago geratzeko “gonbitea” egiten dioten Hollywoodeko aktore “ikusgarriari”.
Onintza Aiestaran gure lankideak bertatik bertara jarraituko ditu “eskari” eta kontu horiek guztiak eta egunero-egunero emango digu gertatzen ari denaren berri. Kalean baitabil, gora eta behera, eguzki ala euri, Maria Cristina Hotelaren eta Kursaaleko Kuboen artean dauden metro horietan gertatzen den guzti-guztia bertatik bertara kontatzeko.

Beraz, badakizu Zinemaldiaren inguruan gertatzen den guztia jakin nahi baduzu hauxe da zure txokoa! Eta noski, zu ere Donostian bazabiltza eta edozein gauza ikusten edo entzuten baduzu… horren berri ere jaso nahi dugu! Idatziguzu!!!

Hemen dituzu Zinemaldiko lehen irudiak!

Eta hemen… Zinemaldiko filmen ordutegiak!

Share on Facebook

Jessica Biel (Planet 51 filmeko ahotsetako bat) ere 80ko hamarkadan horren ezagun egin zen A Taldea telesailaren zinemako moldaketan izango da. Liam Neeson izango da Hannibal Smith taldeko burua eta Bradley Cooper (Qué les pasa a los hombres) Fénix, taldeko mutil “deigarria”.

Biel negoziaketak ixten ari da oraintxe Fox ekoiztetxearekin. Armadako general baten papera egingo du, Felixen neska-lagun ohi ere izango da, eta bereak eta bi egingo ditu taldea atzemateko.

Neeson eta Cooperrez gain, hauek osatuko dute A Talde mitikoa: Quinton Jackson ‘Rampage’ borrokalari profesionala (Terminator Salvation) MA Barracus izango da eta District 9 filmean ikusgai dugun Sharlto Copley Mad Murdock izango da.

Azken urte hauetan telebistako saio bat baino gehiago iritsi da pantailetara: “Corrupción en Miami”, “Los hombres de Harrelson” eta “Starsky y Hutch”, besteak beste, eta horien arrakasta berdindu edo gainditu nahi du El Equipo A izena izango duen filmeak.

Akziozko filmak gustuko badituzu, ez galdu oraintxe zinemetan ikus ditzakezunak!!

Share on Facebook

Zonko broma dendatik buelta bat ematea, Bertie Botten goxokiak erostea, Las Tres Escobas izeneko tabernan gurinezko garagardo bat hartzea edo hipogrifo baten bizkarrean hegan egitea posible izan daiteke laster. Izan ere, “Harry Potterren Mundu Magikoa” izeneko parkea irekiko dute udaberrian Floridan.

Harry Potterri eskainitako Disneylandia antzeko horretara joaten direnek, gainera, “kalabaza” zukua hartu ahal izango dute Hog’s Head pubean( Txerri Burua), Magia Eskolatik barna ibili eta Hontztegia bisitatu.

Tramankulurik ikusgarrienak Dragoiaren desafioa -abiadura altuko mendi errusiar bikia- eta Hipogrifo Hegaldia -Hogwarts gainetik ibiliko den mendi errusiar familiarra- izango dira.

Warner Brosekin akordioa erdietsi ostean, Universalek kudeatuko du parkea.

Harry Potter zalea bazara, ikusi bere azken filma: Harry Potter y el misterio del príncipe. Eta bestela, badituzu beste hainbat aukera ere zinema-aretoetan.

Share on Facebook

Azaroan 13an estreinatuko da mundu guztian 2012, Apokalipsiari buruzko filma. Hasiera batean Espainiako Estatuko zinemetan astebete edo bi aste beranduago estreinatu behar bazen ere; azkenean, sortu den ikusmina ikusita, Sonyk estreinaldia aurreratzea eta mundu guztian bezala, pelikula hori azaroaren 13an estreinatzea erabaki du hemen ere.

Filmak ondorengo galdera du abiapuntu: Maya egutegiaren arabera, 2012an amaituko da mundua. Prestatuko al dituzte gobernuek euren herritarrak?

Hondamendi eta azpijokoen inguruko filmak gustuko badituzu, ez galdu District 9 ere.

Bestela, hemen dituzu film eta ordutegi guztiak.

Share on Facebook

Disneyk Marvel erosi ostean, Warnes Bros.ek atzean ez geratzea erabaki du eta DC Entertainment sortu du, DC Comicsen pertsonaiak zinemara eramateko helburuz.

DC Entertainment ez da, ordea, DC Comicen superheroiak zinemara eramateaz bakarrik arduratuko, bideojoko, telebista, Internet eta argitaletxeen munduan ere tokia egin nahi dute eta hilero-hilero komiki-istorio berriak kaleratuko dituzte.

Zinemari dagokionean, Batmanen sagarekin jarraituko dute El caballero oscuro filmaren arrakastaren ondoren. Batmanen atal berriaren aurretik, baina, Jonah Hex iritsiko da gure pantailetara, Josh Brolin, Megan Fox eta John Malkovich protaginista dituen westerra (2010), uztail erdialdera grabaketak hasi dituen The Losers, Ryan Reynolds protagonista izango duen The Green Lanter (2011) eta Guy Ritchiek zuzenduko duen Lobo, besteak beste.

Wonder Womanen moldaketa ere asmo horien artean dago eta zinemara eraman nahi dituzte Flash, Shazam eta Aquaman bezalako pertsonaiak ere. Eta hori guztia, Liga de Justicia, Batman eta Superman elkarrekin izango dituen filma kontuan hartu gabe.

Horiek denak iritsi bitartean, aprobetxatu egun zineman ditugun filmak ikusteko!

Share on Facebook

Danny Boyle, Slumdog millionaire filmeko zuzendaria “gero eta gertuago” dago 1996ean izugarrizko arrakasta izan zuen Trainspotting filmaren jarraipena grabatzetik. Robert Carlyle aktoreak gaur BBCn esan duenez, Boyle film berriko gidoian murgilduta dabil, eta Porno izenako du.

Trainspottingen -Irvine Welshen eleberrian oinarritutako filma- Begbie zoro bortitzaren papera egin zuen Carlylek eta horren gustura dago pelikula harekin eta izan zuen zuzendariarekin, Boylek eskatuko balio “suzko uztaian bizkarrez salto” egingo lukeena eta berriz ere berarekin lan egin ahal izateko prest legokeela doan lan egiteko. Hala esan du behintzat.

Welsh berak idatzitako “Porno” liburuan, Trainspottingen agertzen diren Edimburgoko (Eskozia) lagun heroinazaleak 10 urte beranduago nola dauden kontatzen da. Liburu hori zinemara eramateko aukerak nahiko zeresan eman du azken aldian.

Batzuk irrikitan itxaroten duten bitartean, beste batzuk uste dute Trainspottingi bigarren zati bat gehituz gero, nolabait “izorratu” egingo dela filmaren xarma. Azken horien artean dago, adibidez, Ewan McGregor aktorea -Renton zen Trainpottingen, drogak eta indarkeria uzten zituen lagun bakarra-.

Azkenan, baina, Edimburgoko mutilen ibilerak kontatzen dituen filma egin, egingo dutela dirudi, eta guk lasai-lasai itxaron beharko dugu zinemara iritsi bitartean.

Share on Facebook