Iaz Bilboko Alondegiko Zinemateka hasi zenean, John Ford zinegile estatubatuarraren ziklo batekin eman zioten hasiera. Westernaren maisuaren lehen pelikulak eman zituzten orduan. Orain, hilabete hauetan berriro heldu diote Hollywooden gehien saritu zuten zine zuzendariaren produkzioari. 1950ko hamarkadako filmak emango dituzte. Besteak beste, “Gizon Baketsua” (the Quiet Man), Irlandan girotuta eta John Wayne eta Maureen O’Hara aktore dituen filma.

Aitortu behar dut: urteetan maitatu izan dut film hau. John Ford ultrakatoliko eta matxistaren ideologitik oso urrun naiz. Zer esanik John Wayne harroputz horretatik. Atxikitutako trailerra ikusi ondoren harrituta nago: emakumearen aurkako indarkeria uneak baitira. Baina hala ere, berriz ikusiko nuke gustura Irlandara, herrira itzultzen den boxealari ohi honen istorioa. Eta ikusi gainera, oraingoan, pantaila handian.

Aukera hori emango digu asteazken eta ostegun honetan Bilboko Alondegiak. BAtean, 17:30tan eta bestean 20:00. Baina horrekin batean, aste honetan  Ford-en maisu lanetako bat emango dute, “Centauros del Desierto” (The Searchers). Nola ez, berriro John Wayne protagonista duen filma. Asteazkenean eta ostegunean izango da, kasu honetan, lehen egunean 20:00tan eta bigarren egunean 17:30tan.

“Mogambo” eta “Rio Grande” handiak galdu ditugu jada, baina oraindik geratzen dira “La Conquista del Oeste”, “Dos Cabalga Juntos” eta “El hombre que mato a Liberty Valance” maisu lana. Bilbon bazaudate, ez galdu aukera.

Ia 40 urtez jatorrizko bertsioan zinea eman ondoren, Donostiako Kresala zinekluba bertan behera geratuko zen beldur ginen zinezale askok. Sortzaileek iaz bukatu zuten euren ibilbidea. Baina talde berri batek bere gain hartu du astelehenero zinea eskeintzeko lan hori. Eta hartu gainera, publikoarekin ezbaia lantzeko gogoarekin. Horren lekuko astelehen honetako saioa. Gaur “The Frost” filma eman behar dute eta horretan makilajea egin zuen Karmele Soler donostiarra izango da filma aurkezten. Gogoratu ezazue Karmele Solerrek aurten Goya saria jaso duela.

Norvegia eta Espainia arteko koprodukzio honek bikote baten hondamendia kontatzen du trajedia baten aurrean. Apirileko lehen filma da. Pazko asteleha pasata, hurrengo saiorako, apirilaren 16rako, familia kontuak izango dituzte hizpide berriz. Gizona eta amona tarte txikian galdutako emakume baten oinazea filmatu zuen 1995ean Kore Eda handiak. “Maboroshi No Hikari” filmak zortzi bat sari jaso zituen nazioarteko hainbat zinemalditan. Euskadiko zine aretotan gainera ez dute estreinatu. 

Sari asko jaso zituen hurrengo proposamena: “Lourdes”. Austria, Alemania eta Frantziako koprodukzio honek santutegi famatua du kokaleku eta ustezko mirari batek ekarritako miseriak kontatzen dizkigu.