Txutxumutxuak

Ederki pasatu nuen Kirmen Uriberi elkarrizketa egiten; hobeto esanda, berarekin solasean. Biharamunean New Yorkera abiatu behar zen (berriz ere), eta bere alaba Arane jaiotzear zegoen. Mikel Urmenetaren blogean (Kukuxumusu) bere argazkia ikusita nuen, parranda gau batean, eta elkarrizketa egiteko gogoa sortu zitzaidan. Pertsonaia ezagunak beste ikuspegi batetik ikustea gustatzen zait, denek uzten ez badidate ere. Kirmen Uribe oso alaia eta naturala iruditu zitzaidan. Lehendakariari buruz galdetu nionean baino ez zen moztu. Patxi Lopez Lehendakari izan aurretik ezagutzen zuela kontatu zidan, baina besterik ez. Egia esateko harritu ninduen. Zertaz ezagutuko dute elkar? Patxi Lopezen blogean Uriberi buruzko post bi daude.

Kirmen Uribe lagunartean.

Ez nion alabari buruz galdetu, baina “Bilbao-New York-Bilbao” eleberrian bere bizitza pribatuari buruz hitz egiten zuela aipatu nionean, ez duela uste eguneroko gauzak ezkutatu behar zirenik erantzun zidan, “adibidez, alaba bat izango badut, argi esaten dut”. Alabari buruz hitz egin nahi zuela ematen zuen, baina momentuan ez nintzen konturatu eta ez nion ezer galdetu.

Edozein galderarekin barre egiten zuen eta lagunen moduan hitz egin genuen. Gauzarik atseginena da hori norbait elkarrizketatzen duzunean. Pertsona asko erne egoten da, elkarrizketa izan beharrean erasoa izango bazen bezala. Oraingoan ez zen horrelakorik gertatu, inondik inora.

Jende askoren esanetan posea baino ez da, baina ni ez nago hain seguru. Mikel Urmenetari elkarrizketa egin ostean, uste dut Kukuxumusuren sortzailea benetan zoro bat dela, bere hitzetan, “astakirtena” (majadero) da. Nueva Yorken bizi denez, elkarrizketatzea nahiko zaila da, baita telefonoz ere; beraz, galderak emailez bidali behar izan nizkion. Erantzunak jaso arte nahiko denbora pasako zela esan zidaten Kukuxumusuko prentsa arloan, baina ez. Hurrengo egunean banituen erantzunak.

Mikel Urmeneta

Tonua, irakur dezakezuenez, nahiko barregarria da. Elkarrizketa egiteko dokumentatzen ari nintzela eztabaida bat zegoela ikusi nuen: benetan zoroa da ala posea baino ez da? Mikel Urmenetaren bloga eta hainbat elkarrizketa irakurri ostean, nire ustez artistek daukaten puntu berezi hori badauka. Antza, Buenafuenterekin primeran konpontzen da eta proiektu bat jarri dute martxan elkarrekin: Cromosomos. Ez dauka zerikusirik, baina nik bere anaia Asisko ezagutu nuen lagun baten bitartez eta, egia esan, “berezia” iruditzen zait.