Tolosa

Ekainaren 11n Tolosan ospatuko den bisiguaren festa, edo iragan larunbatean Cobrak eta Trumbok Bonberenean emandako kontzertuak; horiek izan dira, besteak beste, Tolosako horman gehien eztabaidatu diren gaiak. Goazen laburpenarekin!

Urteroko hitzordua iristear da. Bisiguaren festa handia ospatuko da datorren asteburuan Tolosan. Olatz Gartziak esteka honekin ematen zigun albistearen berri, eta horrela zihoen: “Deseatzen nago egun hau iristeko!!! bisigua, munduko jakirik onena!!”. Ekitaldiak faltako ez badira ere, Bisigua izango da jaun eta jabe, eta Orioko hiru sukaldarik, 325 bisigu inguru erreko dituzte, 650 lagun ingururentzat.

Iragan larunbatean, berriz, Bonberenean Cobra eta Trumbo taldeen kontzertua ikusteko aukera izan zen, eta honen berri Amaia Fernandezek ematen zigun horrela: “Larunbat honetan Tolosako Bonberenean Cobra eta Trumbo taldeak!! ze gogok!! Earki egongo da!!!”. Cobra taldearen argazki bat eskegi zuen, gainera, horman:

Cobra taldea

Itxaso Apraizek albiste hau eskegitzen zuen eta ondorengo iruzkina gehitzen zuen: “Zorionak Aitor!! Honetan ere gu garaile!! a ze itxura duen pintxoak!! sagardotegiko menua….mm. Oraintxe jango nuke. Aupa Tolosa!!!!”. Izan ere, iragan astean Tolosako Amets tabernak irabazi zuen Gipuzkoako Pintxo Txapelketa. Zorionak bene-benetan!

Nazioarteko ingurumen egunaren harira, Tolosan hainbat ekintza antolatu dira, besteak beste, bideo-foruma, zinekluba eta antzerkia, guztiak ere elikadurarekin eta kontsumoarekin loturikoak. Honen berri Beñat Mendietak ematen zigun esteka honekin, eta hitz hauek gaineratzen zituen: “Konturatu al zarete Tolosan egiten diren ia ekintza guztiak janarekin lotuta daudela? nola gustatzen zaigun jatea!!!”. Jaia datorren ekainaren 16ra arte luzatuko da, beraz, aprobetxatu eta ondo pasa!

Eta honekin amaiera emango diogu gure gaurko postari. Zuek jarraitu horman parte hartzen eta Tolosan gertatzen den guztia ezagutarazten. Aste bete barru ikusiko dugu berriz ere elkar, eta bitartean, izan zoriontsu!

Share on Facebook

Tolosako jendeak, Tolosak Facebookean duen orrialdean, unean-unean jarraitu ahala izan zuen, atzo, hauteskunde gaua, hesian bertan ikusi genuenez. 2011ko udal hauteskundeek Ibai Iriarte San Vicente Tolosako Udalerako Bilduko hautagaiari eman zioten garaipena. Hortaz, Bilduk 2011ko udal hauteskundeak irabazi ditu Tolosan; gu, gure aldetik, oso pozik gaude, orrialdean egondako parte hartzea nabarmena izan delako. Benetan, eskerrik asko guztioi, onenak zarete!

Ikusmina handia zen Tolosan atzo, arratsaldean, hauteslekuak ixteko bi ordu inguru falta zirela; une horretan, eztabaida ireki genuen orrian, “porra” batekin. Ondorengo galdera luzatzen genuen: “Adi, hauteskunde-porra!!!! Egin zuen emaitza aurreikuspena: nor izango da Tolosako hurrengo alkatea? Zenbat zinegotzi izango ditu alderdi bakoitzak?“. Gauza jakina da zaila dela asmatzen, baina Miguel Legarrak, esaterako, egin zuen bere pronostikoa: “EAJ-7, Bildu-6, PSE-EE-2, Aralar-1, PP-1”. Ez zuen, ordea, guztiz asmatu, nahiz eta nahiko gertu egon.

Behin Bilduk irabazi zuela jakitean, ordea, hasi zen apurka-apurka jendea animatzen. Esaterako, Marta de Carlosek iritzirik eman ez bazuen ere, “Gustuko dut” botoiari eman zion. Beraz, begi-bistakoa zen tolosarren presentzia horman.

Eta horrela, amaiera emango diogu “biharamuna“k ekarri duenari; laster, eta betiko legez, blog honetan ikusiko dugu elkar, eta azken egunotan hauteskundeetatik kanpo orrian esandakoak ere bilduko ditugu. Badakizue nahi duzuen gaien inguruko albisteak sar ditzakezuela, eta guk, beti bezala, zuek esandakoak blog honetan islatuko ditugula. Mila esker hor izateagatik eta ondo izan!

Share on Facebook

Ibai Iriarte San Vicente Tolosako Udalerako Bilduko hautagaiak eskuratu ditu boto gehien (%40.16) 2011ko udal hauteskundeetan 8 zinegotzi eta 3804 botorekin. Jokin Bildarratzen alderdia, EAJ-PNV, berriz, bigarren lekuan geratu da 3629 botorekin, eta beraz, 7 zinegotzi izango ditu. Amaitzeko PSE-EEk (586 boto) eta Aralarrek (475 boto) eserleku bana eskuratu dituzte. Beraz, ordorengo urteetan litekeena da Ibai Iriarte izatea Tolosako alkate.

14475 lagunek dute botoa emateko eskubidea Tolosan.  Horietatik, 9473 joan dira gaur bozkatzera. Abstentzioa, beraz, %34.62koa  izan da. Hala, botoen %100 zenbatuta, Tolosan udal hauteskundeen emaitzek argazki hauxe utzi dute Gipuzkoako herrian:

BILDU: 3804 boto eta 8 zinegotzi

EAJ-PNV: 3629 boto eta 7 zinegotzi

PSE-EE:  586 boto eta zinegotzi 1

ARALAR: 475 boto eta zinegotzi 1

Datuak alderatu nahi izatera, horra, baita ere, Tolosako 2007ko udal hauteskundeen emaitzak.

Ikusteko dago, hortaz, Tolosako Udalak ze kolore hartuko duen. Emaitzak mahai gainean daude. Ondorengo egunotan, alderdien arteko bileretan erabakiko da tolosarren mapa politikoa. Guk, adi-adi jarraituko dugu guztia, blog honetatik eta Facebookeko gure kontutik.

Share on Facebook

Maiatzaren 22an, Tolosako 2011ko udal hauteskundeak egingo diren egunean, Tolosako hauteskunde emaitzak eskainiko dizkizuegu zuzenean, grafikoak barne. Horrez gain, 2007ko udal bozekin egindako alderatzeak ere izango ditugu. Ikusmin handia eragin du hauteskunde gauak, eta ziur gaude, giroa gori-gori egongo dela.

18:00etatik aurrera gertatzen den guztia jarraituko dugu Tolosako blog honetatik eta Facebookeko orrialdetik: balizko emaitzekin egindako porrak, inkestek iragarritakoak eta… Tolosako udal hauteskundeen emaitzak. Betiko moduan, zuen iruzkin eta ekarpenen zain gaude; horiek ere, astelehenean propio egindako post batean bilduko ditugu eta.

Gaur bukatuko da hauteskunde kanpaina eta biharkoa gogoeta eguna dugu; bide batez,Tolosako 2007ko udal hauteskundeen emaitzak uzten dizkizuegu.

Adi, hortaz, blog honetara eta komunitatearen orrialdera. Emaitzak jakin ahala, jakinarazten saiatuko gara eta, hala, Tolosako alkatea nor izango den eta hiriko mapa politikoa nola geratuko den jakingo dugu.

Share on Facebook

Tolosako Osasun Publikoaren Alde plataformak manifestazioa antolatu zuen larunbatean Tolosan. Hauxe izan da aste honetan Facebookeko horman gehien aipatu den gaia. Badira, ordea, bestelako gaiak ere. Goazen aste honetako laburpenarekin!

Jende ugari bildu zen Tolosan iragan larunbatean egin zen manifestazioan, horrela esaten zigun Beñat Mendietak horman: “Jendetza bildu zen larunbatean osasun publikoaren aldeko manifestazioan! Ea horrela behintzat kasu egiten diguten!”. Albiste hau gaineratzen zigun, gainera. Martxaren helburua eskualdean Ospitale publiko bat ezartzea zen, eta Tolosako Osasun Publikoak antolatu zuen.

Berezi Tolosak, berriz, esteka hau uzten zigun horman. Tolosan dagoen Berezi izeneko denda honetan emakume eta gazteentzako taila handiko jantziak topatu ditzakezu, beraz, ez galdu aukera eta bisitatu. Tolosako Herreros kalean topatuko duzu.

Eta ezin dugu agur esan aurretik, hauteskunde gauean zuekin izango garela gogorarazi gabe. Iragan astean egin genuen bezala, igande honetan (maiatzak 22), eta baita astelehenean (maiatzak 23) ere zuekin izango gara horman Tolosan gertatu den guztiaz aditzera emateko. Zuekin eta parte hartu nahi duen guztiekin bat egingo dugu. Zuen zain geratzen gara!

Share on Facebook

Maiatzaren 22an 2011eko udal hauteskundeak izango ditugu Tolosan. Kanpaina joan den ostiralean, apirilaren 29an, hasi zen, (baina azken asteotan gure orrialdeko hormara iristen ari diren iruzkin eta estekak ikusita, argi dago kontua askoz lehenago abiatu zela). Zalantza gabe, bi asteotan ugaritu egingo dira hauteskundeen ingurukoak.

Honen aurrean, zera otu zaigu: Tolosak Facebooken duen jendearekin kanpaina bera eta hauteskunde gaua partekatzea; lehenengo aldia izango da Googlen “udal hauteskundeen emaitzak Tolosan” bilatuta, blog hau edo Facebookeko orrialdea aterako zaiguna

Hori horrela, Tolosak Facebooken duen orrialdean kontatzen dituzuenez gain, hauteskunde gauean giroa berotzen ibiliko gara datuak gaurkotzen eta postak idazten. Are, emaitzak grafiko bidez eskaintzea ere pentsatu dugu… baina tira, ez dugu ezer aurreratuko!

Gau berezi hori zuokin partekatu nahi dugu Facebooken eta azkenean, Tolosako alkatea nor izango den jakin: Jokin Bildarratz Sorron (EAJ-PNV), Ibai Iriarte San Vicente (Bildu-EA), Jose Ignacio Asensio Bazterra (PSE-EE), Jose Maria Vieites Gomez (EB-B), Angel Bernardo Yañez Ares (PP) eta Cristina Baron Arregui (H1).

¡Blog honetan edota Tolosako orrialdean ikusiko dugu elkar!

Share on Facebook

Hamargarrenez ospatu da asteburuan Javier Urkolaren omenezko duatloia Tolosan, eta beste behin, parte hartzea handia izan da. Gai hau eta beste batzuk jorratu dira aste honetan Facebookeko horman. Goazen laburpenarekin!

Esteka honen bitartez jakitera ematen genuen asteburuan ospatzen zela Javier Urkolaren omenezko duatloia. Bi kilometro korrika, hamabost bizikleta gainean eta azken bi kilometroak korrika. Tolosako Duatloi Taldean antolatzen du, eta aurten ere parte hartze handia izan du lasterketak.

Olatz Gartziak, bestalde, gaur eta bihar Tolosako Leidorren izango den emanaldi baten berri ematen zigun lotura honekin, izan ere, mendiko irudi ikusgarriak ikusteko parada izango da gaur eta bihar. Horrela esaten zigun Olatzek: “Jo itxura bikaina du honek, bai behintzat mendia maite duenarentzat!”.

Beñat Mendietak, berriz, Lazaro Gonzalezek Tolosan ateratako irudi eder batekin parte hartzen zuen horman, eta horrela esaten zigun: “Lazaro Gonzalezek Tolosan atera du irudi hau, eta EGUNEKO ARGAZKIA da gaur, asteari bukaera ona emateko. Hemen, helbide honetan, paisaia eder gehiago daude: http://www.eitb.com/usuarios/fotos/”. Badakizue argazki gehiago ikusi nahi izatera, edo zuek zuen argazkiak igo nahi izatera, eitb.com-ek argazkiak eta bideoak igotzeko erreminta berria jarri duela martxan.

Tolosa. Egilea: Lazaro Gonzalez

Itxaso Apraizek errezeta bikain baten berri ematen zigun, Tolosako babarrun ezagunak nola prestatu, alegia: “Tolosako babarrunak prestatzeko errezeta Arantza Soraluceren eskutik. On egin!!!”. Nork edo nork prestatzeko gogoa badu, hemen duzue Itxasok utzitako lotura.

Eta besterik gabe agur esateko ordua heldu da. Jarraitu gure horman parte hartzen eta Tolosan gertatzen den guztia kontatzen, guk gure aldetik zuek kontatutako oro blog honetara ekartzen saiatuko gara. Bitartean segi ondo eta pozik bizi!

Share on Facebook

Josu Iztueta, bidaiari amorratua eta Tolosako bizilaguna gaur abiatuko da Nepal aldera, eta bere azken bidaia izango dela azpimarratu du. Hau izan da aste honetan horman gehien eztabaidatu den gaia. Goazen laburpenarekin!

Itxaso Apraizek, esteka honen bitartez jakitera ematen zigun Josu Iztueta tolosarra gaur joango dela Nepal aldera. Bere azken bidaia izango dela kontatzeaz gainera, bidaiatzeko zaletasunaren inguruan ere hitz egin du Josuk elkarrizketan. Zorte ona opa diogu!

Beste behin, Aralar Parke Naturalak gurean parte hartu du esteka honekin Tolosaldeko Abaltzisketa herrian egiten den eskola txikien festara gonbidatzen gintuen ondorengo hitzekin: “Eskainaren 12an Eskola Txikien festa ospatuko da Abaltzisketan eta gogor ari dira lanean bertako ikasle, irakasle eta gurasoak“.

Eta proposamen polit honekin agur esango diogu gure gaurko postari. Jarraitu horman parte hartzen, guztion artean gehiago gozatuko dugu eta Tolosako kontuez. Mila esker eta pozik bizi!

Share on Facebook