Euskara

Abenduaren 3a da gaur, Euskararen Nazioarteko Eguna. Munduko txoko guztietan entzuten ari gara euskara, eta sare sozialak ere sutan esnatu dira goizean goizetik. Egun onak ematearekin batera hasi gara euskaltzaleok Twitter bidez Euskara goraipatzen eta gure hizkuntzaren inguruko txioak bidaltzen. Horren adibide garbia da goizeko 08:50etik 09:10era #euskarazbizinahidugu hasthag-a TT izan dela. Egun guztian zehar etengabea izan da jarioa eta edozein ordutan sartu den erabiltzaile oro konturatuko zen gaurkoa egun berezia dela euskaltzaleontzat. Goazen egunak eman duena errepasatzea!

Euskararen Nazioarteko Eguna. Iturria: euskaraz.net

Abenduak 3, Euskararen Nazioarteko Eguna Twitterren

Ba al dakizue zein izan den gaur #euskarazbizinahidugu traolarekin gehien bertxiotu den txioa? EsaldiakEuskaraz kontuak txiokatu duena. 193 bider izan da bertxiotua eta ondorengoa dio:

“Euskaraz hitzegitea da egunero leku guztietan euskaldun egiten nauena, horregatik #EuskarazBiziNahiDugu ! ”

Euskal tuitlariok Euskararen Nazioarteko Egun hau nola bizi dugun ikusi nahi al duzue? Modu askotako esaldi eta txioak ikusi ditugu. Batzuk esaera zahar eta esamoldeak erabili dituzte, beste askok, euskal kanta eta bideoen bidez nahi izan dute euskararen erabilera aldarrikatu, eta izan dira zorion esaldien bidez ospatu dutenak ere.  Hemen dituzue horietariko batzuk:

ʟєɪʀє ‏@addiictedtoyou

Euskal Herrian euskara hitz egiterik ez bada, bota dezagun demokrazia zerri askara. #EuskarazBiziNahiDugu.

lide ‏@zuazo_lide

euskara da euskaldun egiten gaituena! #EuskarazBiziNahiDugu

kukooo. ‏@kuko_16

Gau ta egun eskeraz bizi nahi dut da gauza bera egin dezakezu zuk!! #euskarazbizinahidugu

Mikel Erbiti ‏@erbitiPackman

Izan zirelako gara, garelako izango zarete #EuskarazBiziNahiDugu

Aitor Madrid ‏@munduariso

Euskarak 365 egun http://www.youtube.com/watch?v=jji–SOOUuw&feature=em-uploademail … #Euskarazbizinahidugu

Maitane Weizap ‏@maitane_idame

Euskaraz bizi nahi dut goizean goizik, ez da amets bat nire nahia da baizik. #EuskarazBiziNahiDugu

gorka urtaran ‏@gorka__urtaran

♫♫ Ez al dakizu euskara dela euskaldun egiten gaituena? ♫♫… #EuskararenEguna #euskarazbizinahidugu http://www.youtube.com/watch?v=Ej2XLHbfF-s&feature=youtube_gdata_player …

Julen ‏@JulenGudari

“…gu sortu ginen enbor beretik sortuko dira besteak…” #EuskarazBiziNahiDugu

Hemen #euskarazbizinahidugu traola erabiliz une honetan Twiterren dagoen jarioa

Katalanez ere zorion mezu ugari heldu zaizkigu, baita hemendik urrun dauden euskaldunen txioak ere, eta euskal komunikabideek eta euskalgintzako hainbat ordezkarik ere Twitter erabili dute #euskarazbizinahidugu-la aldarrikatzeko.

XabierEuzkitze

Euskara da nire aberria. #EuskarazBiziNahiDut #EuskararenEguna

Urtzi Urkizu ‏@urtziurkizu

Txinatarrak txineraz, yankiak ingelesez eta alemanak alemanieraz bizi diren bezala euskaldunok #euskarazbizinahidugu

joseba permach ‏@jpermach

Euskarak ez luke egunik izan behar. Egunero-egun osoan zehar euskaraz aritzea beharko luke izan normaltasunik normalena #EuskarazBiziNahiDugu

GAZTEA ‏@GAZTEA

#euskarazbizinahidugu Euskaren Eguna dela eta @GAZTEA-n euskal musika dugu gaur nagusi http://ow.ly/fLMq3 http://ow.ly/fLMq5

zuzeu ‏@zuzeu

Guk ere Euskaraz bizi nahi dugu, eta horretarako gure alea jarriko dugu. http://www.youtube.com/watch?v=-1FxKvg5hvs … #EuskarazBiziNahiDut

Independència ‏@LaIndepe

Ajudem als companys d’Euskal Herria a fer TT #EuskarazBiziNahiDugu

Ikusi duzuen moduan, euskarari buruzko aldarrikapenak lau haizetara zabaldu dira Twitterren, baina ekitaldiak asteburu osoan izan dira, esaterako, Donostian. Gipuzkoako hiriburuko kaleetan “Euskaraz bizi nahi dut” lelopean egindako manifestazioan bi aurpegi ezagun ikusi genituen, “gure atsuak”, eta eurekin uzten zaituztegu. Baina aurrez, honatx gure mezua: Atzo, gaur eta bihar #euskarazbizinahidugu. Gora gure hizkuntza, gora euskara!

Abenduaren 3a ate joka dugu, eta urteroko legez, ekitaldiak ez dira faltako Euskararen Nazioarteko Egunean. Horien artean, Euskaldunok Euskaraz Facebook orrian dugun erronka: 10.000 lagun biltzea abenduaren 3rako. Euskararen Egunaren nondik norakoak aztertu nahi izan ditugu gaurkoan, euskararen eta euskaldunon inguruko kontuak biltzea baita Euskararen blog honen helburua. Noiztik ospatzen da? Zergatik abenduaren 3an?

Abenduak 3, Euskararen Nazioarteko Eguna: Ba al zenekien….

…. Euskararen Eguna guztiz lotuta dagoela Xabierko Frantzisko deunarekin? 1552ko abenduaren 3an hil zen Frantzisko, eta kondairak dioenez, hil aurreko azken hitzak bere ama hizkuntzan izan ziren, hots, euskaraz.

…. 1949. urtean ezarri zuela Eusko Ikaskuntzak Euskararen Nazioarteko Eguna? 1995ean Eusko Jaurlaritzak eta Euskaltzaindiak bat eginik, Euskararen Nazioarteko Eguna instituzionalizatu egin zuten. Euskararen Nazioarteko Egunaren lehenengo edizioaren dokumentu batekin topo egin dugu Sarean.

1949ko Euskararen Eguneko idatzia. Iturria: Eusko Sare

.… Euskararen Egunak hainbat izen izan dituela? Lehendabiziko edizioan “Eskuararen Eguna” erabili zen eta ondorengo urteetan “Euzkararen eguna” edo “Euzkara Eguna” bezala ikusi izan dugu. Egun Euskararen Eguna edo Euskararen Nazioarteko Eguna erabiltzen dira.

…. Euskal Herrian ez ezik, munduko beste hainbat txokotan ere ospatzen dela Euskararen Nazioarteko Eguna? Jakin badakigu Mexikon, Bartzelonan, Washingtonen, Buenos Airesen eta Parisen ere euskara goraipatzen dela abenduaren 3an.

… 2006ko Euskararen Egunerako abestia egin zuela Benito Lertxundik? Hemen dituzue kantaren bi zati:

Euskara giza ondarea da: komunikazio

eta batasunerako tresna.

Elkar ulertu eta giza helburu gorenera

heltzeko beharrezko baliabidea.

Hizkuntza ispilu leiala da,

non kondairan zehar, herri baten

baldintza sozialak isladatzen diren.

….. 2008. edizioan Jokin Mitxelena marrazkilariak eta Ion Martin bertsolariak komiki bat sortu zutela Euskaren Egunaren harira?

Euskara hizkuntza bakarra eta berezia da, eta hori goraipatzea eta zaintzea, guri, euskaldunoi dagokigu. Aurten ere kalera aterako gara milaka eta milaka euskaldun euskarari keinu bat egitera. Eta milaka lagun izatea nahi dugu sarean;  horregatik, Euskaldunok Euskaraz Facebook orrialdean 10.000 lagun lortzea, horixe da gure erronka. Eskerrik asko guztioi, maitatu euskara, eta BIZI EUSKARAZ!

Abenduaren 20an Euskara eta iparraldeko euskal kantak ardatz izango dituen “Baionatik Bilbora” jaialdira doan joateko zozketa izango dugu hizpide gaurkoan. Baina Euskaldunok Euskaraz orrialdean beste zenbait konturen inguruan aritu gara euskaldunok. Errepasoan gurekin etorriko al zara?

Baionatik Bilbora-Iparraldea Kantuz izeneko kontzertua egingo da datorren asteartean, hilak 20, Bilboko Euskalduna Jauregian. Euskal Herriko kantagintzaren eta kulturaren historian Iparraldeak izan duen  garrantzia aditzera ematea du helburu ekitaldi honek. Ekimen berezia honetara doan joateko aukera eskaintzen dizugu euskaldunon Facebookeko orrialdean. Nola? Oso erraza da. Euskararen blogean harpidetu eta zuzenean zozketan parte hartuko duzu. Animatu! Astelehen arratsaldera arte duzu epea!Azkar ibili!!!

Bestalde, jakinarazten genizuen Multimedia Komunikazio UPV/EHU-EITB Masterrak mahai-inguru bat antolatu zuela euskarazko komunitate birtualen arrakastaren gakoez eta euskararen komunitate birtual berriak ehuntzeko estrategiez eztabadaitzeko asmoz.

Eta gaur egun handia izan da Goenkale zaleentzat. Izan ere, Zea Maysek Atxurin egingo zuen grabaketara joateko gonbitea luzatzen genizuen, eta dagoeneko grabatuko zuten, gaur goizean baitzen hitzordua EITBren Miramongo egoitzan. Euskalherria Rockanrollek grabaketan parte hartzea gustatuko litzaiokeela komentatzen zuen. Espero dugu bertan izatea!

Euskararen eguna eta Durangoko azoka, protagonistak

Iragan astean azoka ezaguna ospatu zen Durangon. Beste behin aukera anitza izan zen; kontzertuak, liburu eta diskoak, eztabaidak… Egitarau osoaren berri ematea zaila bazen ere, Durangoko Azokan Berri Txarrak, Su Ta Gar, Lisabo eta Mikel Markez izango zirela aipatzen genizuen. Gainera, zuek zer erosi zenuten galdetzen genizuen. Robe Txanek Su Ta Gar eta Governors taldeen azken lanak erosi zituela kontatzen zigun, “sinatua eta argazkitxoa barne”, esaten zuen alai. Maite Otañok ere “denetik” erosi omen zuen, “Pirritx eta Porrotxen azken CDa, Ken zazpirena, Gabon abestiena. Haur literatura….. Hitz bitan…. Diruzorroari astindu ederra!!!! Baina pena merezi du!!!!”. Bai noski, Maite. Irantzu Maguregik horren ondo saldu den Sarrionandiaren liburua erosi zuen eta “Pirritxen muxu goxo bat etxera ekarri” zutela Durangotik bueltan kontatzen zigun.

Eta Euskararen Egunerako Euskaldunok Euskaraz Facebookeko orrialdean 10.000 lagun lortzeko erronka lortu ez badugu ere, laburpen hau aprobetxatu nahi dugu eskerrak emateko, bihotz-bihotzez. Orrialdean zuen iruzkinak ikusita, ziur gaude ederto pasa zenutela. Donostiarrak Mintzodromoan ospatu zuten Euskararen Eguna. Asko izan zineten egunean bertan, lehenago eta baita ondoren ereuskara, gure hizkuntza, zoriondu zenutenak. Beraz, zuen izen eta iruzkin guztiak hemen biltzea ezinezkoa denez, ESKERRIK ASKO euskaldun guztion partetik. Hemen dituzue, irakurri nahi izatera, euskaldunok orrian egin ditugun iruzkin guztiak.

Lucia Linazak kalean entzundako pasarte batekin utziko zaituztegu: “Gaur Zeanin egon naz eta tipo batek beste bateri galdetu deutso ia joango den bueltatxo bat egitera. Honek ezetz erantzun deutsonean lehenengoak “azkok” esan dau. Ze polite! Atzinetik ez neban entzun, gehienetan aitari. Asko poztu naz”. Izan zoriontsu, ondo pasa asteburua eta laster arte euskaldunak! Eta ahaztu Facebookeko orrialdean nahi duzuen guztiakontatu dezakezuela eta guk hemen, Euskararen blog honetan zuek kontatutakoak bilduko ditugula.

Larunbat honetan, abenduak 3, Euskararen Nazioarteko Eguna ospatuko da eta gure Facebookeko orrialdean geroz eta gehiago gara. Horregatik eguna heldu aurretik euskaldun guztioi eskerrak eman nahi dizkizuegu Euskararen alde egin duzuen guztiagatik. Erronka izango dugu hizpide gaurko laburpenean, baina beste gai batzuk ere jorratuko ditugu ondorengo lerroetan. Etorriko al zarete gurekin?

Azken asteotan, abenduaren 3an egingo den Euskararen Egunaren harira, hainbat ekitaldiren berri eman dizuegu Euskaldunok Euskaraz Facebooken, horien artean erronka bat: Euskararen Egunerako 10.000 lagun biltzea orrialdean. Erronkara heltzeko oraindik nahiko urrun bagaude ere, gorakada nabarmena izan da orrian, beraz, ESKERRIK ASKO! Asko izan zarete erronkan sinistu duzuenak, eta utzi dituzuen iruzkin guztiak hemen biltzea ezinezkoa bada ere, horietako batzuk bildu nahi izan ditugu.

Elisa Alvarezek, Joseba Orbegoak edo Unai Larrañagak, esaterako, erronka lortuko dugula uste dute, eta Josu Orbek, berriz, norberak bere gogoeta egiteko, ondorengo hitzak uzten zituen: “Momentu honetan 6575 garela ikusten dut baina, zenbatek daukagu euskara nabigatzailearen lehen hizkuntza? Zenbatek daukagu Feisbuka euskaraz? Zenbatek sistema eragilea? Aurrera! Eman pausua!!!”. Juan Luis Ormaetxeak “euskara dela euskaldun egiten gaituena” esaten zigun, eta Patxi Goñik, berriz, hitz eder hauek partekatzen zituen gu guztiokin: “Gu gara euskara gu euskaraz gara”. Eskerrik asko bihotz-bihotzez guztioi eta lortzen ez badugu ere, zuen hitzek eta animoek bete egin gaituztela esan nahi dizuegu.

Euskararen jatorriaren dokumentala, Bernardo Atxaga Anitzelen….

Euskararen Egunarekin jarraituko dugu, izan ere hori abiapuntu hartuta, atzo ETB-1n Hasier Etxeberriaren “Euskararen jatorria: Enigma europar bat” dokumentala estreinatu zen. Dokumentalaren estreinaldiaren kontua aste hasieratik dabil gure orrialdean bueltaka. Liv Lif Tailorrek ikus-entzunezkoaren trailerra partekatu zuen. “Itxura ederra dauka”, gaineratzen zuen. Gaur arratsaldean bertan, gainera, Iban Bilbaok EITB Nahierara Euskara, Enigma europarra dokumentala ikusteko lotura uzten zigun: “Ia noiz dakoten tartetxu bet ” esaten zuen. Zuek ere ikus-entzunezkoa ikustera gonbidatzen zaituztegu, euskaldunok belaunaldiz belaunaldi hitzetik hortzera darabiltzagun gaien berri ematen baitigu Hasierrek zuzendutako lan honek.

Eta gaiez aldatuz, gaur gauerako hitzordu bat. Bernardo Atxaga idazle euskaldunaren ibilbide profesionala zein pertsonala gertutik ezagutu nahi izatera, ez galdu Xabier Euzkitzek gidatutako saioa, Bernardo Atxaga Anitzelen egongo baita gaur gauean.

Garazi Weyek “Euskara…atzo, gaur eta beti” izeneko bideoklip eder bat partekatzen zuen Facebookeko orrialdean. BBKKlip txapelketarako egindako bideo bat zela kontatzen zigun. Honen aurrean Azkue Fundazioak ere iruzkina uzten zuen eta aste honetan irabazleak nortzuk diren esango dutela jakinarazten zigun. “Benetan bideo polita!”, gaineratzen zuen. Zorte on ona opa diogu bai Garaziri baita bideoklipean parte hartu duten lagun guztiei ere. Guk ere euskaraz maite zaituztegu!! Hemen duzue bideo oso osorik! Gozatu!

Amaitzeko, asteartean MinoriTB jardunaldi irekia egin zen EITBren Bilboko Egoitzan. Berrikuntzen artean Txio zuzeneko emanaldietan integratzen den jarraipen tresna erabiltzeko aukera izango zela kontatzen genizuen, izan ere, sare sozialetan ere euskera bultzatzea da euskaldun guztion helburua, eta bagoaz, piskanaka, betetzen.

Eta honekin amaiera emango diogu gure gaurko laburpenari. Gogoratu larunbatean euskaldunok hitzordua dugula, Euskararen Eguna ospatuko baita munduko hainbat txokotan. Goio Etxezarragak horman uzten zigun hitz hauekin agurtuko gara. “Heuskara ialgi hadi plazara!. Euskaldunok euskaraz kalean!!!!!!”. Besarkada bat guztioi eta egurra erronkari!! Lortuko dugu eta!

Euskarak eta euskal aditzek lanak ematen dizkigute zenbaitetan eta horri aurre egiteko asmoz, erreminta berri bat aurkeztu dizuegu Facebookeko orrialdean. Hori eta mugikorretarako aplikazio baten berri, gaurko laburpenean. Goazen jolasean, gaurko postarekin!

Eskolan baita eskolatik kanpo ere maiz izan ohi ditugu buruko minak euskal aditzekin. Ba… badaukagu irtenbidea!! Nola? Hemen aurkezten dizugun tresna berri honen bitartez. Eskolako ohiko taula aspergarriak albo batera utzi eta kasuak eta pertsonak aukeratu beharko dituzu, eta ondoren webguneak adizki zuzena emango dizkizu. Klik eginez, eta modu erraz, xinple eta intuitiboan, Euskal aditzak ikasteko eta zalantzak argitzeko webgune berria da Aditzak.com, Ideatecak hil honetan argitaratu berri duen txokoa. Askok eta askok eman diozue “Gustuko botoiari” eta Amaia Irabak, berriz, tresna berriaren inguruko iruzkina utzi du: “ideia ona iruditzen zait”. Jolastu, egin klik eta ikasi aditzak behar den bezala erabiltzen!

Izugarria da sakelako telefonoek nola aldatu duten mundua. Honetan ere euskaldunok euskaraz egin nahi dugu, eta orain arte ez dugu aukera handirik izan. Aurten ordea, Nonicken, Bilbon eitb.com-ek eta Eusko Jaurlaritzak Interneteko joeren inguruan antolatzen dituzten nazioarteko biltzarrean ideia berri bat sortu da, eta ideia hori, gauzatu da dagoeneko. SwiftKey tresnaren euskarazko bertsioaz ari gara, norberaren mugikorrarekin euskaraz hitz bat idatzi eta hurrengo hitzaren lehen hiruzpalau letrak soilik tekleatuta, telefonoak euskaraz hitz osoa zein den aurreikusi eta automatikoki idazten duen aplikazio berriaz. Sakelakoan ere euskaraz egin nahi dugu!! Hemen duzue azalpen bideo bat eta egin froga!!

Amaitzeko gogorarazten dizuegu erronka dugula martxan zuentzako. Abenduaren 3a, euskararen eguna, egun mundiala izatea nahi dugu eta horretarako zuen laguntza behar dugu. 10.000 lagun bildu nahi ditugu! Lortuko al dugu? Euskaldun asko gara Euskal Herrian, eta nabaritu dadila! Animatu zuen lagunak gure lagun egitera!! Euskararen eta euskaldunon topalekua da hau eta, beraz, partekatu geure hizkuntza honen inguruko albisteak, hitzorduak… eta beste zenbait kontu gure horman. Ez ahaztu Euskaldunok Euskaraz egin behar dugula!  Pozik bizi!!

Kaixo guztioi!!

Guztiok dakizuenez gaur, Euskararen Nazioarteko eguna da! Betiko lez, gure Facebookeko orrialdean horman jaso ditugun ekitaldien berri emango dizuegu. Euskararen egunerako, gure helburua, Facebookeko Euskaldunok Euskaraz orrialdean 10.000 pertsona biltzea zen, nahiz eta orrialdean  4000 pertsona bildu diren, ekitaldian 9000 pertsona bildu ditugu, beraz esan genezake jende askok erakutsi duela euskararekiko atxikimendua. Hala ere, badakigu, euskaraz ez da soilik gaur hitz egin behar, egunero erabiltzen saiatu behar dugu, eta horregatik gure orrialdeak martxan jarraituko du Euskararen inguruan informazioa, ekitaldiak etab. denon artean banatzeko, beraz,  guztion partehartzea beharrezkoa da komunitate indartsu bat sortzeko.

Begira dezagun bada, zer daukagun facebookeko horman! Hasteko, Beñat Mendietak esan digu: “Leioan ekitaldiak euskararen alde: abenduak 1, arratsaldeko 19.00etan Jon Urrazaren “bestela ondo….ezta?” antzezlana izango dugu ikusgai Mastitxu udal Euskaltegian.” Nahi duenak anima daiteke!

Deban ere badago ekitaldirik! Maite Etxeberriak esan digun bezala “Ostiralean Abenduak 3, arratsaldeko 6etan, ALDATS PILOTALEKUAN , LipDub herrikoia, pirritx eta porrotxen “irrien lagunak” abestiarekin. ANIMA ZAITEZTE!
kamixeta koloretsu bat jantzi eta abestera…
“irrien lagunak gara gu,
haur, gazte ta heldu
mundu berri bat helburu
…euskaraz bizi nahi
ta euskaraz kantatu nahi dugu
irri egin dezagun, etor zaitez gurekin, bildu gure festara!”

Bilbon ere goza genezake, bertan edukiko baitugu ekitaldi berritzaileena, abenduaren 5ean, arratsaldeko 20etan Bilboko Plaza Barrian kontzertu interaktiboa izango da GOSE, UNE eta BETAGARRI musika talde euskaldunekin.

Gasteiz ere ez da atzean geratzen eta kontzertu ugari egongo dira, 4 euroren truk: Opium, Herrikada, Garraxika, Bronze, Gose, Betagarri , Dr. Deseo (euskaraz) , Su ta gar eta DJ-A . Kontzertuak ,  Mendizorrotzeko kiroldegian izango dira. 17:00etan hasiko dira baina berandurarte iraungo dute

Azkenik, Euskararen Nazioarteko Eguna dela eta Eusko Ikaskuntzak antolatutako “Euskararen Hitz Politena” kanpainaren irabazlea ‘pinpilinpauxa’ izan da, ‘bihotz’ bigarren postuan geratuz.

Hauxe da guztia gaurkoz, espero dugu egun polita igarotzea eta euskara asko erabiltzea. Gaur egindakoak ere blogean eskegi ditzakezue! Datorren asterarte!!

Arratsaldeon guztioi!

Konturatu al zarete ia 4000 pertsona garela Euskaldunok Euskaraz orrialdean jada?Eskerrik asko guztioi zuen babesarengatik!

Hasteko , Arantxa Sobrinok utzitako kanta batekin hasiko gara: …ez dugu zaldirik, ez gara zaldunak, ez dugu abererik, ez gara aberatsak, euskara guk dugu, gu gara euskaldunak! (san simon eta san juda kanta herrikoia) .Beraz badakizue zer daukagun eta zerk egiten gaituen euskaldunak!

Bestalde Euskararen Nazioarteko Eguna jada Ostiralean da, Maite Lasak utzi digun informazioa “Abenduaren 3 a Euskararen eguna da” . Hauxe da bertan topatu ahal izango dituzuenak; Aurtengoan aipagarriak dira sarean, Internet bidez parte hartzeko proposatzen dituzten ekimenak. Esaterako, Donostiako Euskararen Udal Patronatuak euskarak mila aurpegi dituela erakutsi nahi digu, nikereeuskaraz.net webgunean.Taldeka parte hartzeko aukera ere badago, gukereeuskaraz.net atarian.

Bestalde, Etxepare Euskararen Institutuak euskara mundua zabaltzeko, Euskara mundiala! kanpaina ere abiarazi du. euskaramundiala.net atarian, euskarazko esaldi eta kantuak jaso nahi dituzte, besteak beste. Horretarako grabaketak egin eta sarera igotzeko gonbita egiten dute..

Eusko ikaskuntzak ei-Gazte! ekimenaren baitan irabazle izan den proposamena, Euskararen hitz politena jokoa, martxan jarri du euskara sustatzeko asmoz. Bertan, edonok esan dezake zein den euskaraz gustukoen duen hitza eta ENE Euskararen Nazioareko Eguna webgunean bistaratuko da gainerakoekin batera.

Bizkaiko hiriburuan bestalde, euskaraz aritzen diren musika talde amateurrek ‘Banden lehia 2010‘ lehiaketan, parte hartzeko aukera izan dute azaroan zehar. Musika taldeen bideoak Internetera igo eta sailkaturiko lau taldeak, Bilboko Kafe Antzokian egingo den final handian parte hartuko dute parte Azaroaren 3an.

Gainera Euskaltaindiak kide berri bat dauka , Jean Baptiste Coyos euskaltzain oso izendatu dute
gaur, Bilbon egindako osoko batzarrean.  Beste zerbait berria daukan pertsonaia Olentzero da ere bai, facebooken orrialde berria baitauka.

Hauxe da guztia aste honetan, berriz ere eskerrak eman nahi dizkizuegu izan duzuen parte hartzeagatik, jarraitu horrela ea ostiralerako 10.000 euskaldun biltzen garen!

Ondo bukatu astea!

Arratsaldeon guztioi!

Zer moduz joan da astebukaera? Domeka euritsua izan dugu, baina bestela astebukaera ongi aprobetxatuko zenutela espero dugu!! Euskaldunok euskaraz orrialdean erronka bat ipini diogu gure buruari Euskararen Nazioarteko eguna izango dela eta. Abenduaren 3rako 10.000 lagun bildu nahi dutugu euskaldunok euskaraz orrialdean.
Horrela, urtean zehar ere, euskararen inguruan sortzen diren albiste, deialdi, argazki, bideo, eleberri. Beraz badakizue gure helburua hilabete honetan hori izango da, lagun iezaiguzu euskara zabaltzen!

Aste honetan ere, astelehenero bezala “Euskaldunok Euskaraz” orrialdeko hesian jasotakoekin laburbilduma prestatu  dugu zuek egindako informazioarekin :

Ainere Agirrek gogorarazi digun bezala, “Begoñazpi ikastolak ekitaldi potoloa darabil bere esku: Etorkizuneko euskal gizartearen arduradunak izango diran gazteen Heziketan eta baloreak transmititu behar dira.” Beraz hor duzue ekitaldia nahi duenak hurbiltzea dauka!

Ibon Perez-ek Euskararen Nazioarteko Eguna izango dela eta, Eusko Ikaskuntzaren orrialdeko ekarpena egin digu, non bakoitzak bere euskarazko hizt gogokoena aukeratu ahal duen.  “Euskararen Nazioarteko Egunerako (ENE), abenduaren 3an, hainbat ekimen martxan jarri ditu Eusko Ikaskuntzak ere. Euskal Herriko pertsonaia ospetsu askok bat egiten dute ekimenarekin (besteak beste Bernardo Atxaga, Benito Lertxundik, P …edro Miguel Etxenike, Mikel Urdangarin, Mikel Urmeneta, Xala pilotaria, Laura Mintegi, Kirmen Uribek, Karlos Arguiñano, Toti Martinez de Lezeak edo Lourdes Oñederrak).”

Bestalde, bi pertsona ere baditugu euskara ikasten ari direnak Pedro Maria de Aguirrek esaten du “Ikasten ari nintzan baino es dakit, pixkat ¡¡¡¡” eta Joxin Etxezarretak gehitzen du “Deustuko Unibertsitateak ere euskaraz egin nahi du.” Animo biei zuen saiakeretan!

Azkenik, Itsaso Apraizek Ordizian izan den Sustreiez blai jaialdiaren inguruan informazioa utzi digu: “Sustraiez
Blai jaialdia izango da larunbat honetan Ordizian!! Hamar urte bete ditu Goierriko
kulturen festak, eta debaldeko kontzertuekin ospatuko dute. Hau da jaialdia iragartzeko egin duten bideoa. Animatuko da norbait?”  Beraz, norbait egon bada, badaki, hemen konta diezaguke nolakoa izan den jaialdia.

Beraz hau da guztia adiskideok! Aste honetan hauek izan dira blogean utzi dizkiguzuen notiziarik nabarmenenak, animatu parte hartzen eta informazioa blog honen bitartez zabaltzen!

Kaixo guztioi!

Zer moduz joan da astebukaera? Bide batez, Zorionak Erreala eta errealzaleoi!!Espero dugu ospakizun galantak egotea Gipuzkoa aldean. Nahiz eta kalean euria zarra-zarra dabilen, gure blogeko orrialdean informazioa eta alaitasuna dira nagusi . “Euskaldunok Euskaraz” orrialdeko hesian jasotakoekin laburbilduma prestatu  dugu oraigo aste  honetan ere.

Hasteko, Abenduaren 3an ospatuko den Euskararen Nazioarteko Egunari begira, nik ere euskaraz, guk ere euskaraz eta beste hamaika aldaera hartzen dituen lelo mutantearekin gazteen artean euskararen erabilpena sustatzeko kanpaina jarri du abian Donostiako Euskararen Udal Patronatuak.

Euskarak milaka aurpegi, milaka ahots ekimena kanpaina honen baitan dago. Webgune honen bidez kanpainarekin atxikimendua adierazten duten pertsonen argazkiekin osaturiko mosaiko bat egiten ari dira. Norberak bere argazkia webgunean kargatu ahal izango du modu errazean eta automatikoki argitaratuko da webguneko mosaikoan, aurretik bat egin duten gainontzeko pertsonen argazkiekin batera. 

Eusko Ikaskuntzak ere Euskararen Nazioarteko eguna izango dela eta, beste ekimen bat antolatu du. Beñat Mendietak dioen bezala: “Euskararen egunerako diseinatu diren kamiseta bat lor dezakezu, euskararen hitz politena zein den esanez eta zergatik, azaroaren 29a baino lehen. Animatu!”

Bestalde, Maite Lasak ere beste web orrialde baten inguruko informazioa ekarri digu, e-uskaltegiarena alegia. “Gune
honetan euskara lantzen lagunduko dizuten hainbat baliabide topatuko duzu. Horien artean zure kabuz lantzeko moduko baliabide asko eta baita AEKren online katalogoa eta haren inguruko informazioa ere.” Baina ez da informazioa utzi digun bakarra izan, Begoña Ugartek, Aunia eleberriaren ingurko informazioa utzi digu, bertan euskal herriko janzkera historikoen inguruan hitz egiten da.

Aste honetan hauek izan dira blogean utzi dizkiguzuen notiziarik nabarmenenak, animatu parte hartzen eta informazioa blog honen bitartez zabaltzen!