Kategorien artxiboak: Argia Sariak 2012

Euskararen aldeko keinua Argia Sarietan

15:30ak pasatxo heldu gara Usurbilgo Atxega Jauregira, bertan eman behar baitziren 2012ko Argia Sariak. Iritsi bezain pronto, jatetxera sartu eta bertako zerbitzari batek jatetxeko areto nagusira zuzendu gaitu. Atea ireki orduko euskara barra-barra entzun dugu bertaratu diren lagunen artean. Ezagunak ugari, Sustrai Colina bertsolaria, Martxelo Otamendi kazetaria, Kike Amunarriz aurkezlea, Txirri, Mirri eta Txiribiton pailazoak… Euskadi Irratiko kazetariak ere ikusi ditugu jatetxearen atzealdean. Eta argazki eta bideo kamerak nonahi!

Orduantxe ari ziren mahaietara Atxega postre sorpresa zerbitzatzen. Aurretik, ahate-gibelezko terrina, itsaskien entsalada epela, limoi sorbetea, legatza onddo eta baratxuriekin gozatua eta ondotik azpizuna hornigaiekin. A zer nolako menua!  Bapo janda zeuden ordurako gonbidatuak!

Argia Sariak 2012: Giro aparta Usurbilgo Atxaga Jauregian

Giro aparta Usurbilgo Atxaga Jauregian

Kafea eta likoreekin hastearekin batera, arratsaldeko laurak jota, altxatu dira Argiako langileak. Aitor Furundarenaren trikiti doinuak lagun hartuta, Xabier Letona Argiako zuzendaria izan da hitza hartzen lehena txalo artean, eta horrela eman zaio hasiera. Labur-labur aritu da. Euskal hedabideen egoeraren inguruan jardun du, baita egun gizarteak bizi duen egoeraren inguruan eta bertaratu diren guztiei eskerrak eman ondoren, sari banaketa ekitaldiari eman zaio hasiera.

Argia Sariak 2012: Xabier Letona Argiako Zuzendaria

Xabier Letona Argiako Zuzendaria

Internet Saria banatu dute lehendabizi. EITB Nahieran webguneak irabazi du Interneteko Argia Saria. Iñako Gurrutxaga eitb.com webeguneko entretenimendu jaso du, pozik, EITBren izenean saria, eta elkarlana “ezinbestekoa” dela azpimarratu du. EITB Nahieran-ek bidea hasi besterik ez duela egin esateaz gain aurretik euskal kulturarekin lotutako  “erronkak” dituztela eman du aditzera.

Argia Sariak 2012: Iñako Gurrutxaga Interneteko Argia saria jasotzen

Iñako Gurrutxaga Interneteko Argia saria jasotzen

Honen atzetik, Prentsa Idatzizko Argia Sariaren txanda izan da.  Irabazlearen “ausardia” nabarmendu dute sari hori banatzerako orduan. Karlos Zurutuza Kronistarentzat izan da. Bere lanaz arro, Argia aldizkari eskerrak eman dizkio honen ibilbidearen aurreneko urteetan komunikabide honek emandako laguntzarengatik.

Argia Sariak 2012: Karlos Zurutuza Prentsa Idatzia Argia Saria jasotzen

Karlos Zurutuza Prentsa Idatzia Argia Saria jasotzen

Gure Bazterra” irratsaioak urteak daramatza euskararen alde lanean eta gaur merezitako saria jaso dute Luzien Etxezaharreta eta Jakes Casaubonek. Etxezaharretak euskal irrati libreen lana azpimarratu du eta bere hitzetan, itxaropena herriak hizkuntzarekiko erakutsitako maitasunean dago.

Argia Sariak 2012: Argia Sariak 2012: Luzien Etxezaharreta eta Jakes Casaubon Irratiko Argia saria jasotzen

Luzien Etxezaharreta eta Jakes Casaubon Irratiko Argia saria jasotzen

Publizitate Saria Klikmetroak.com kanpainarentzat izan da, hau da, Azpeitiko Ikastolak antolatutako kilometroak jaialdiaren kanpainak. Kilometroak jaiaren hasierako “espiritua” berreskuratzeagatik jaso du  Aitor Unanue Azpeitiako Ikasberri Ikastolako lehendakariak sari hau. “Ekimenak on egin diezaiola aurtengo kilometroen antolatzaileari”, esan du. Eta nola ez, Ikastolen alde lan egiten duten ikasle, guraso, irakasle eta langile guztiei eskaini die saria.

Argia Sariak 2012: Aitor Unanue, Azpeitiako Ikasberriko Lehendakaria Publizitate Saria jasotzen

Aitor Unanue, Azpeitiako Ikasberri Ikastolako Lehendakaria Publizitate Saria jasotzen

Aloña Soraluze Argiako langileari egokitu zaio Telebistaren Argia Saria ematea. Telebista espektakuloa soilik ez dela azpimarratzearekin batera, Kanalduderi Ipar Euskal Herriko telebistako langileak deitu ditu. Pantxika Maitia eta Ximon Carrerek jaso dute sari hori, eta azken honek euren proiektuan “herritarren parte hartzeak” duen garrantzia azpimarratu nahi izan du.

Argia Sariak 2012: Kanaldude Herri Telebistako kideak Telebistako Argia Saria jasotzen

Kanaldude Herri Telebistako kideak Telebistako Argia Saria jasotzen

Eta sari horiek banatu ostean, berriz ere, Xabier Letona Argiako Zuzendariak hartu du hitza. “Euskaltasuna ulertzeko modua berari zor diogu”, esan du.  Izan ere, aurtengo Merezimenduzko Argia Saria Jose Luis Alvarez Enparantza, duela gutxi zendu zen Txillardegi handiari eman diote. Aurrez hartutako erabakia zen donostiarraren ibilbidea saritzea, eta halaxe egin dute. Seme-alabak irribarrea ahoan zutela jaso dute saria.

Argia Sariak 2012: Txillardegiren seme-alabak Merezimenduzko Saria jasotzen

Txillardegiren seme-alabak Merezimenduzko Saria jasotzen

ZORIONAK GUZTIEI! Ekitaldia saritu guztien argazki eder batekin amaitu da, txalo artean.

2012ko Argia Sarietako irabazleak

2012ko Argia Sarietako irabazleak