Eingo al deu?

Gogoratzen al duzue astelehenean irakurle batek luzatutako galdera? Lehengo aldiz sexua praktikatzen denean mutila goian ala behean jarri behar den galdetzen zigun gazte batek eta gaur osteguna izanik, Olatz Berastegi sexologoak erantzuna eman dio.

Hemen dituzue irakurlearen galdera eta Olatzen erantzuna:

Gaztearen zalantza:

“Kaixo lagunak! nik 15 urte ditxut 16 betetzear ta sexuan inguruen duda izugarrixek ditxut (ustot adin hontan normala dala ez?) kuadrillan aldi pilotan planteatzen gea galdera 1, hor doa ea norbaitek erantzuten al din: txortan lehenengoz eitean zer da hobe neska o mutila goixan eotea? eske batzuk esaten diate eiten dula min gutxigo neska goixan bado o holako zerbeit bñe estokit dan eixe, kuadrillan 2k bakrrik ein dote ta kontatu digute haien esperientzie beña ez dauz dudak argitxen. Eskertuko nizuan erantzutia ahal bada. Ongi segi!”

Olatzen erantzuna:

“Lehenengo aldian zein postura den egokiena neskaren mina sahiesteko esaten didazu. Nik esango nizuke postura ez dela garrantzitsuena, azken finean postura aldatzen joan gaitezke, bien erosotasuna bilatzeko. Lehenengo aldian, faktore asko sartzen dira jokoan, urduritasuna, esperientzi falta, beldurrak, lotsa.. Horren eraginez, neskei gehiago kostatzen zaie lubrifikatzea, eta bagina askotan tentsiogatik ez da behar bezala irekitzen.

Mutilen kasuan, urduritasunak, zakila ez tentetzera edo azkar korritzera eramaten zaituzte. Horrelako egoerak ematen dira, eta hau ez da txarra , azken finean, lotsak, beldurrak, egoerak bizitzen eta esperimentatzen gainditzen direlako. Hau guztia kontutan hartuta, esango nizuke postura ezberdinak egon daitezkeela eta biak joango zaretela somatzen zeinetan aurkitzen zareten erosoago, neska goian, mutila goian, eserita…. Baina horretaz gain, badaude beste faktore batzuk kontutan hartu behar direnak: biek harreman hori eduki nahi izatea, leku erosoa bilatzea, neska oso kitzikatuta egotea, bere bagina hobeto lubrifikatzeko, bakoitzak zer nahi duen besteari azaltzea eta harremana jolasa bilakatzea, inor ez doa nota ateratzera.

Beraz, ez ahaztu, agobiorik gabe, inor ez da ikasia jaiotzen, ikasten dugu esperimentatzen dugun heinean, eta batentzat ona dena beste batentzat ez da hain egokia suertatzen, bakoitzak gure berezitasunak ditugulako.”

Share on Facebook

Deskribapena:

Belaunikatuta, mutilak neskaren sorbaldetara bota behar ditu hankak. Bikotea estutu egin behar da, estimulazioa areagotu arte.

Alde onak:

- Jarrera originala da eta sarketa oso sakona.
- Gizonaren pelbiseko hezurrak klitoria estimulatzen du.

Alde txarrak:

-Mutilak bizkortasun handia behar du.

Share on Facebook

Olatz Berastegi sexologoak askotan errez nahasten ditugun sexua eta sexualitatea hitzen esanahiak azalduko dizkigu.

“Lehenengo eta behin garrantzitsua da sexua hitza zer den ongi azaltzea. Hau da, sexua hitza, praktika sexual zehatz bati buruz hitz egiteko erabiltzen da. Baina sexua ez da egiten dugun zerbait ( praktika), gu geu garena baizik. Sexua hitza ‘sexare’ hitzetik dator eta ’sexare’ hitzak ezberdintzea esan nahi du.

Horrengatik, sexua hitza zerbaitetatik ezberdintzen gaituena da. Hau da, jaiotzen garenetik, hil arte, gure gorputza eraikitzen doa, ezberdintzen. Lehenengo ezberdintasunak, emakume-gizon egiten gaitu. Baina sexuatzeak hori baino gehiago dakar, mutil guztiak eta emakume guztiak ez baikara berdinak (gorputzaren formak, tamaina, ile kantitatea, ahotsa…). Honegatik, sexologian emakume eta gizon egiteari buruz hitz egiten denean, gure sexuaz hitz egiten denean, bakoitzaren ’sexuazio’ edo bilakaera pertsonalaz hitz egiten da.

Eta sexualitatea orduan zer izango litzateke?

Neskek nahiz mutilek gorputz bat daukagu eta arestian aipatu dut gorputz horrek ezaugarri batzuk dituela eta hauek aldatzen doazela; gure gorputza ez da berdina zortzi urterekin eta hamalau urterekin, adibidez. Sexualitatea, gure gorputzarekin dugun harremana izango litzateke. Emakume nahiz gizon izanda nola bizitzen dudan nire gorputza, nire emakume-gizon izatea. Beraz, hainbat pertsona, hainbat sexualitate. Horregatik, sexualitate hitza erabili beharrean, sexualitateak erabiliko dugu. Bakoitzak gure gorputza bizitzeko modua dugulako, eta gure gorputza, bizitza aldatzen den heinean aldatzen delako.”

Share on Facebook

Sakelako telefonoekin gorputz biluztuei argazkiak atera eta irudiak mezu bidez bidaltzeko moda zabaldu da AEBetako gazteen artean.

‘Sexting’ izenarekin ezagun egin den tendentzia honek bi faktore garrantzitsu uztartzen ditu: nerabeak eta teknologia berriak.

Normalean hurbileko lagunei bidaltzen dizkiete argazkiak, halere, zenbait kasutan txantxa hau umilazio bilakatzen da, hori dela eta, bihurrikeria den ala umeen pornografia izatera hel daitekeen aztertzen dabiltza.

Iturri ezberdinek emandako informazioaren arabera, 13 eta 17 urte bitarteko gazteen %20k bidali du noiz edo noiz biluzik edo erdi biluzik agertzen den argazkiren bat.

Dirudienez, dibertitzeko edota beste nerabe batzuekin ligatzeko erabiltzen dute moda hau estatubatuarrek. Dena den, aurrerantzean kontuz ibili beharko dute, batez ere, baimenik gabe lagunen baten irudiak bidaltzen dituztenean.

Horrelako kasuetan neurri gogorrak hartzen hasi dira agintariak eta AEBetako estatu askotan pornografiatzat eta esplotaziotzat jo dituzte mota honetako kasuak.

Share on Facebook

Nolakoa izan nahi dut? Ze gauza gustatzen zaizkit? Zergatik ezin dut nahi dudana egin? Zer espero dute besteak niregandik? Maitemindu naiz, nola adieraziko dut sentitzen dudana? Ze erantzun jasoko dut? Zer desiatzen dut? Zeinek erakartzen nau?

Lepoan muxukatzea gustatzen zait, txortan egin nahi dut, beldurrak ditut. Nolako neska/mutila izan nahi dut? Nola izan behar dut? Bikoteak utzi nau, gaizki sentitzen naiz, lagunekin arazoak ditut, etxean ez naute ulertzen…

Hauek denak, bidea egiten dugun heinean gertatzen dira. Galderak, desioak, beldurrak, aukerak, denak gure sexualitatearen atalak dira. Beraz ez kezkatu, bizi eta laguntza eskatu. Bizitza elkarri lagunduz atseginagoa delako.

Share on Facebook