Kondoiei buruzko zenbait datu interesgarri

  • Menéame0

condones1. Gizonezkoen % 5ak soilik erabiltzen dute kondoia. Datu honek herrialde garatuak zein azpigaratuak hartzen ditu kontuan.

2. Lau motako kondoiak daude:

Gehienak latexkoak dira, baina poliuretanozkoak ere badaude; pertsona alergikoei zuzenduta daude horiek.

Halaber, arkumeen larruarekin egindakoak daude, baita emakumeentzako kondoiak ere.

3. Ez dute aldaketarik izan

1920an asmatu zituztenetik, ez dute aparteko aldaketarik edo berrikuntzarik izan.

4. Kondoiaren erabilerak ez du sexu-kalitatean eraginik

Inkestek, behintzat, horixe diote.

5. % 98ko eraginkortasuna dute

Eraginkortasun handienetakoa duen antisorgailua da. Gainera, sexu bidezko gaixotasunetatik babesten gaitu.

6. Emakumezkoak dira kondoiak erosten dituztenen erdiak

Kondoi erosleen artean ia erdia emakumezkoak dira.

7. Institutuko ikasleen herenak soilik daki nola erabili

8. Bill Gatesek kondoi “hobeak” ekoitzi nahi ditu

Bill and Melinda Gates Foundation elkarteak 100.000 dolar eskaini ditu kondoi berrien ikerketarako. Etorkizuneko kondoien artean egon litezke zakilaren tamainara eta formara egokitzen direnak.

Nola landu behar da sexuaren gaia hezkuntzaren alorrean?

  • Menéame0

Aste honetako ‘Sexsua’ saioan, Sexperientzia Ikastetxean izeneko erreportajea ikusteko aukera izan dugu. Aurreko saioetan hezkuntza sexualak duen garrantzia askotan aipatu bada, oraingo honetan, Euskal Herriko ikastetxe eta unibertsitateetan hezkuntza hau nola lantzen den ikustera hurbildu da ‘SexSua’.

Mireia Cifuentes sexologoa

Mireia Cifuentes sexologoa

Hasteko, aurreko saioetan ezagutu dugun Mireia Cifuentes sexologoarekin bildu gara, Lehen Hezkuntzako ikasleekin sexu-heziketa nola lantzen den ezagutzeko. Mireiak adierazi digunez, adin honetako umeekin lantzen diren gai nagusiak gorputzaren aldaketekin zerikusia dutenak dira. Lehen Hezkuntzako 6.mailako ikasleekin, hilekoaren agerpenarena da gai garrantzitsuetako bat. Gai honetan, beldurrak usatzea du helburu sexu-heziketak. Horretarako, hilekoaren inguruan dauden mitoak deseraiki eta tanpoia, konpresa eta kopa menstrualaren inguruko informazioa ematen saiatzen dira sexu-hezitzaileak.

Lehen Hezkuntzako ikasleak

Lehen Hezkuntzako ikasleak

11-12 urterekin lantzen den beste gai garrantzitsu bat bikotearekin edo sexu-harremana mantentzen den pertsona horrekin izan beharreko harremana da. Mireiak argi uzten duen moduan, arlo honetan ezinbestekoa da errespetua eta komunikazioaren garrantzia azpimarratzea. Etorkizunean ume hauek izango dituzten praktiken kalitatea bermatuko du bakoitzak gustuko duena eta egin nahi ez duena argi uzteak.

Mireia Cifuentes sexologoaren ustez, sexualitatearekiko harreman arrotza garatzen dute Lehen Hezkuntzan sexu-heziketa egokia ez duten umeek. Izan ere, mota honetako heziketa jaso ez duten nerabeek sexualitatea genitaletara lotzeko joera dute. Identitatea, generoa eta harremanen ulerkuntza guztiz zailtzen du, gerora, sinplifikazio honek.

Bigarren Hezkuntzako ikasleak

Bigarren Hezkuntzako ikasleak

Haurren hezkuntzak dituen eragin zuzenak ikusteko, Derrigorrezko Bigarren Hezkuntzako gela batean izan da Jon Gomez Garai. Bertan, Gaizka Tovarrek eta Mireia Cifuentesek emandako ikastaroan murgiltzeko aukera izan dugu. Nerabeen kasuan, norbanakoaren nortasunaren eraikuntzarekin zerikusia duten gaiak lantzen dira. Honela, gizarteak eta komunikabideek eraikitzen dituzten estereotipo negatiboak desegiten saiatzen dira sexu-hezitzaileak. Sexu-identitate anitzak azaldu eta epaiak saihesten saiatzea ezinbestekoa da. Cifuentesek azaltzen duenez, esanahiak argitu beharrean, nerabeak hausnarketara bideratzea da garrantzitsuena.

EHUko ikasleak

EHUko ikasleak

Azkenik, Euskal Herriko Unibertsitateko Lehen Hezkuntza graduko ikasgela batean egoteko aukera izan du ‘SexSua’ saioak. Bertan, Lutxi Larrazabal irakaslea agurtu eta bere klase batean sartu gara, etorkizunean irakasle izango direnei sexualitatearekin zerikusia dituzten egoerak planteatzeko. Lutxi Larrazabalen ustez, gaur egun ikastetxe eta institutuetan ematen den sexu-hezkuntza asko hobetu behar da. Bere aburuz, sexu-heziketa ez litzateke aparteko irakasgaia izan behar; irakasle guztiek gaia zehar-lerro gisa ulertzearen beharra nabarmendu du irakasleak. Etorkizuneko irakasleek, kanpoko laguntzarik gabe, egunerokotasunean naturaltasunez landu beharreko gaia dela adierazi du Larrazabalek.

Saioa ikusi nahi izanez gero, hemen duzue oso-osorik:

Sexoguay: euskarazko lehendabiziko mahai-joko sexuala

  • Menéame0

sexoBi gai hartu zituen hizpide Luziak astearteko ‘Akabo Bakea’ saioan. Hasiera batean, emakumezkoen viagrari buruzko informazioa eman zuen luze eta zabal.

Saio bukaeran, ostera, euskarazko estreinako mahai-joko sexuala aurkeztu zuen.

Sexoguay bikoteentzako jokoak 69 ideia erotiko biltzen ditu. Txartelen bidez jokatzea proposatzen du, eta bertantxe azaltzen diren probak egitean oinarritzen da.

Adibidez, bikotea berotzea, abesti sentsual batekin dantzatzea edota bikoteari kontu goxoak xuxurlatzea izan liteke probetako batzuk.

Drogen eta sexualitatearen arteko harremana

  • Menéame0

Aste honetako ‘SexSua’ saioak drogen eta sexuaren arteko konbinazioa aztertu du. Zer motatako drogak kontsumitzen ditugu harreman sexualak izateko? Nolako efektuak dituzte drogek gure sexu-harremanetan? Sortutako galdera guztiei erantzuna aurkitzen saiatu da Jon Gomez aurkezlea, drogetan adituak diren profesionalak elkarrizketatuz.

Unai Lizarralde, droga-menpekotasun teknikaria

Unai Lizarralde, droga-menpekotasun teknikaria

Droga ezberdinek sexua praktikatzen duen horrengan duten eragina aztertu aurretik, ezinbestekoa da drogak zer diren eta nola erabiltzen ditugun ezagutzea. Horregatik, drogamenpekotasun teknikari Unai Lizarralderekin bildu da Jon Gomez, eta, elkarrizketaren hasieran, honakoa nabarmendu du teknikariak: “Drogak betidanik egon dira, gure inguruan daude eta beti egongo dira”. Honenbestez, drogekin ditugun hartu-emanak modu egokian kudeatu eta hezkuntzan egin beharreko lana azpimarratu du Unai Lizarraldek.

'SexSua' saioa, EHUko ikasleekin izan da

‘SexSua’ saioa, EHUko ikasleekin izan da

Jon Lizarralderen ustez, gizartean onartuta daudenak edota legalak direnak dira drogarik arriskutsuenak (tabakoa, alkohola…). Droga mota hauek besteak baino hobeto ikusita daudenez, askoz ere eskuragarriagoak dira. Izan ere, euskal gazteak 13-14 urterekin hasten dira alkohola kontsumitzen.

Alkolismoan urteak eman dituen ama baten testigantza entzun dugu 'SexSuan'n

Alkolismoan urteak eman dituen ama baten testigantza entzun dugu ‘SexSuan’n

Alkoholarekin jarraituz, droga honek harreman sexualetan duen eragina ezagutu nahi izan du Jon Gomezek. Askok limurtzen laguntzen duela uste badute ere, alkoholak sexu-harremanean duen eragina oso bestelakoa da. Emakumezkoen kasuan, orgasmora heltzeko gaitasuna murrizten du eta gizonen kasuan, erekzioa mantentzeko ezintasuna eragin dezake.

Droga sintetikoak hobeto ezagutzeko, Jon Gomez Gasteizen izan da, AiLaket! droga-kontsumitzaileen elkartean. Honen helburu nagusia drogen kontsumitzaileei eta kontsumitzaile ohiei aholkularitza zerbitzua ematea da. Gainera, droga-laginen azterketak egiten dituzte, arriskuak murrizteko asmoz.

Leire Altuna, AiLaket! elkarteko kidea

Leire Altuna, AiLaket! elkarteko kidea

Leire Altuna AiLaket! elkarteko kideak droga-lagin bat aztertzeko ematen dituzten urratsak azaldu dizkio aurkezleari. Honez gain, diseinuzko drogak loditzeko erabiltzen diren materialez mintzatu da Leire. Droga sintetikoak gorpuzteko erabiltzen diren substantzien artean, kafeina eta azukrea dira ohikoenak. Kokainaren kasuan, askotan, dentistek erabiltzen duten anestesiko bat erabiltzen dela aipatu du AiLaket!-eko kideak.

Drogek sexu-harremanetan duten efektuaz aritu dira saioan

Drogek sexu-harremanetan duten efektuaz aritu dira saioan

Drogen efektu desinhibitzailearen inguruan ere mintzatu dira saioan. MDMA edo estasia da helburu honekin erabiltzen den droga. AiLaket!-eko kideak adierazi duenez, 80. hamarkadan, estasiaren efektuari “maitemintze faltsua” deitzen zitzaion. Droga mota hau kontsumitzen duten bi pertsonek bizi dezaketen haluzinazioen erakusle da maitemintze faltsua. Garai horietan estasiaren efektuak guztiz ezagutzen ez baziren ere, gaur egun egiten den kontsumoa masiboa dela esan daiteke. Eusko Jaurlaritzaren datuen arabera, EAEn, urtero 60.000 gaztek onartzen du sintesi drogak probatu izana.

Estasi edo MDMAren kasuan ere, dauden mitoak gezurrezkoak direla froga daiteke. Desinhibizioa eta euforia eragiten dutela egia bada ere, harreman sexual arruntak izateko orduan, nahiko desegokiak dira. Izan ere, desira piztu ordez, kitzikapena eten eta sexuaz gozatzeko oztopoak eragin ditzake MDMA edo estasiaren kontsumoak.

Gai honen inguruan informazio gehiago nahi izanez gero, hemen duzue saio osoa:

Ze antisorgailu aukeratuko dut?

  • Menéame0

Antisorgailuei buruz izan daitezkeen zalantzak argitzeko asmoz etorri zaigu aste honetako SexSua saioa. Zenbat daude? Zertarako da bakoitza? Niri zein etorriko zait ondoena? Mila galdera sortzen dira antisorgailuak aukeratzeko garaian eta horiek denak argitu dizkigu Jon Gomez Garaik, Olatz Berastegi Desira etxeko sexologoarekin batera.

Olatz Berastegi sexologoa

Olatz Berastegi sexologoa

Hasteko, merkatuan dauden antisorgailuak erakusten hasi dira. Horietan ezagunena gizonentzako preserbatiboa da. Baina badaude gehiago, emakumeentzako preserbatiboa, baginako eraztuna, pilulak eta partxeak, DIUa…

Bakoitzaren ezaugarriak galdetzen hasita, hormona bidezkoak eta hesi bidezkoak banatu daitezke. Hormona bidezkoek haurdunaldiak ekiditeko soilik balio dute; emakumeen hormonetan izaten baitute eragina. Hesi bidezkoek, aldiz, izenak dioen bezala, hesi baten funtzioa betetzen dute; isurketa bertan gelditzen denez, bai espermatozoideak bai gaixotasunak kutsatu ditzaketen agenteak bertan gelditzen dira.

Baginako eraztuna, partxeak eta pilulak hormonazkoak dira; eta bi preserbatibo motek, bai gizonezkoenak bai emakumeenak, hesi funtzioa betetzen dute.

Beraz, norberak pentsatu beharra dauka nolako antisorgailua komeni zaion momentu bakoitzean. Eta horretarako, kontutan hartu behar dira nolako sexu-harremanak izaten ari garen garai horretan: bikote finkoa eta konfiantzazkoa daukagun, harreman ugari pertsona ugarirekin…

Dena dela, eta egoerak egoera, ETB1eko saioan argi utzi dute merkatuan eskuragarrien dagoena, merkeena eta erabiliena gizonezkoen preserbatiboa dela. Baina ba al dakigu preserbatibo bat nola jarri behar dugun? Segidan daukazuen bideo honetan Olatz Berastegi sexologoak ematen dizkigu azalpen guztiak.


GIBa, HIESa eta gaixotasunak

Arantza Arrillaga, sexu transmisioko gaixotasunen prebentziorako arduraduna

Arantza Arrillaga, sexu transmisioko gaixotasunen prebentziorako arduraduna

Izan ere, lehen esan dugun bezala, preserbatiboek hesi funtzioa betetzen dute eta hauek dira sexu bidezko gaixotasunak kutsatzea ekiditen duten bakarrak. GIBa eta HIESa, gonorrea, sifilia, genitaletako herpea… asko dira sexu organoen bidez kutsatzen diren gaixotasunak Arantza Arrillagak azaldu duenez.

Duela gutxi arte, adibidez, GIBa eta HIESa drogen kontsumoarekin lotzen ziren. Baina azken aldian, Euskal Herrian kutsatu diren gaixoen %80 sexu harremanen ondorioz kutsatu dira. Oso kontutan hartzeko datua da.

Gaur egun, gainera, GIBa daukagun ala ez jakiteko test azkarrak ere badaude. Beraz, aitzakiarik ez dago norberaren egoeraren berri jakin eta behar diren neurriak hartzeko.

Axi Muniain surflaria

Axi Muniain surflaria

‘SexSua’ saioa amaitzeko, Axi Muniain surflariari egin dio elkarrizketa Jon Gomezek. Surfean, bizitzan orokorrean eta sexuan hartzen ditugun arriskuak izan dituzte hizpide.

 

 

 

Saio osoa ikusi nahi izatera, hementxe daukazue:

Pornografiaren sekretuak, agerian

  • Menéame0

Aste honetako ‘SexSua’ saioan, pornoaren industriaren eragina izan du hizpide Jon Gomezek. Segundoko 28.528 kontsumitzaile duen industria hau hobeto ezagutzeko, osasuna, sexu-heziketa eta komunikazioaren alorreko profesionalekin izan da Jon Gomez aurkezlea.

Gaizka Tovar, sexu-hezitzailea

Gaizka Tovar, sexu-hezitzailea

Zeintzuk dira pornoak sortzen dituen espektatibak? Egia al da pantailan ikusten dugun guztia? Nolako eragina du pornoaren kontsumo masiboak gaur egungo gazteengan? Galdera hauei erantzuna aurkitu nahian, Gaizka Tovar sexu-hezitzailearekin izan da Jon Gomez. Gaizkak argitutako lehen kontzeptua honakoa da: pornoa gezurra da. Sexologoak argitu duenez, kutsu erreala emateko, fikziozko zineman erabiltzen diren trikimailu eta efektu antzekoak erabiltzen dira zine erotikoan. Honela, gaur egungo gazteriarentzat frustragarriak diren eredu irrealak sustatzen ditu.

Sexu-jostailuak

Sexu-jostailuak

Gaizka Tovarren baieztapena argudiatzeko, pornoaren industrian eta errealitatean ikusten diren ereduen arteko konparaketa aurkeztu dute saioan. Pelikula pornoetan ikusten diren zakilen tamaina 15-21 zentimetro bitartekoa izaten da, errealitateko batezbesteko tamaina 13-18 zentimetro bitartekoa denean. Emakumezkoen kasuan ere, pornoan ikusten diren alu gehienak oso antzekoak dira, errealitatean, forma, itxura, kolore eta tamaina ezberdinekoak diren bitartean. Harreman sexualetan, emakume guztiak orgasmora heltzen ikusten ditugu film hauetan; egunerokotasunean, ostera, emakumeen %71k ez du lortzen orgasmora heltzea.

Zine mota honek sortzen dituen itxaropen faltsuak irauli eta mitoak deseraikitzeko, Gaizka Tovarrek hezkuntza sexuala indartzea proposatzen du. Bere ustez, gizarteko sektorerik gazteenean dago gakoa; izan ere, inkesten arabera, 11 urterekin hasten dira gaur egungo gazteak pornoa kontsumitzen.

Anton Arruza, urologoa

Anton Arruza, urologoa

Fisikoki pornoak eraikitzen dituen ereduek ez dute gazteen harremanetan soilik eragiten. Anton Arruza urologoak adierazi duenez, “pornoaren industrian ikusten diren zakilen tamaina eta itxura irrealek gazteei konplexuak sortzen dizkiete”. Honela, gazte askok urologoaren kontsultara joatea ekiditen dute, tamainaren konplexua gainditu ezinik. Emakumeek ginekologoaren figura barneratuta duten bitartean, gizonezkoei urologoa arrotza egiten zaiela azpimarratu du Anton Arruza urologoak.

Allen King, 2014ko Europako aktore porno gay onena

Allen King, 2014ko Europako aktore porno gay onena

Baina pornoaren eragina ez da soilik publikoan antzematen. Allen King aktore pornoak Jon Gomezekin izandako elkarrizketan argi utzi duen moduan, aktore pornoek viagra antzeko botika eta estimulatzaileak hartu behar izaten dituzte sarritan. Pantailan ikusten duguna ikusteko, aktoreek lanordu luzeak ematen dituzte, azkenean, osasunerako kaltegarriak diren produktuak hartuz.

Beraz, pornoaren inguruko saio honetan ondorioztatu daitekeena honakoa da: pornoa kontsumitzea gozagarria izan daitekeen arren, ezinbestekoa da ikusten dugun horren inguruko kontzientzia kritikoa garatzea, aurrerantzean izan ditzakegun harremanak kaltetu ez ditzan.

Ikus ezazu saio osoa:

Fantasia eta desiren artean jolasean

  • Menéame0

Errealitatea eta fantasiaren artean dantzan ibili da aste honetan ETB1eko ‘SexSua’ saioa. Imaginazioari bidea libre utzi dio Jon Gomez Garaik eta gure bizitza sexualean fantasiek duten eraginez hitz egin digu.

Mireia Cifuentes, sexologoa

Mireia Cifuentes, sexologoa

Baina zer da fantasia sexuala? Mireia Cifuentes sexologoak argitu digunez gure irudimenean sortzen ditugun istorioak dira. Guk daukagu istorio horien gaineko kontrol osoa; gertatuko dena, pertsonaiek zer egingo duten adibidez, guk kontrolatzen baitugu. Istorio horiek errealitatera eramaten baditugu, desira bihurtuko dira eta euren gaineko kontrola galduko dugu, errealitatean gertatuko dena ezingo baitugu kontrolatu.

Fantasia sexual ohikoenakMireiaren hitzetan norberak bere fantasiak eta desirak ditu, eta oso zaila da sailkapenak egitea, esate baterako, gizonen edota emakumeen fantasiei buruz aritzea. Baina euren lanean jaso dituzten fantasia ohikoenak bildu ditu eta horiei buruz galdezka ibili dira Jon eta biak kalean. Mutila izan eta emakumez jantzi nahi izatea, hirukotean sexua praktikatzea, leku publikoan sexu harremanak izatea… dira jende askoren irudimenean agertzen diren fantasietako batzuk.

Yogurinha Borova

Yogurinha Borova

Ez dakigu Jon Gomez Garairen fantasia emakumez janztea izan ote den ala ez, baina Yogurinha Borovak ez dio beste aukerarik utzi. Elkarrizketa intimoa izan du Jonek artistarekin; nola hasi zen kontatu dio, Eduardo pertsona eta Yogurinha pertsonaiaren arteko mugari buruz aritu dira, eta baita sexu-joerez ere. Euskal Herrian askatasun sexuala gero eta nabarmenagoa dela adierazi dio.

Izan ere, askotan fantasia sexualak sexu-joerekin nahasten direla aipatu dute ETB1eko saioan. Mireia Cifuentes sexologoak azaldu duenez, fantasiak agertzen direnean, askok zalantzak izaten ditu norberaren joera sexualaren inguruan. Adibidez: “neska izanda neska batekin fantasia bat baldin badaukat, homosexuala al naiz?” Mota honetako galderak sarritan agertzen omen dira sexologoen jardunean. Eta ez dago horrelakoentzat erantzun orokorrik, baina askotan batak ez du bestearekin inolako harremanik izaten.

Mikel Urdangarin

Mikel Urdangarin

Mikel Urdangarinen tabernan ere izan da Jon Gomez Garai, errealitatea eta fantasia erabat nahastuta. Kantariaren hitzetan, abestiak idaztea irudimena proiektatzeko bide bat da eta berari behintzat mesede egiten diola aitortu du, barruak askatzeko edo bestela inoiz esango ez zituenak esateko modua ematen baitiote.

 

Beraz, kanta moduan plazaratuta edo gure irudimenean soilik gordeta, zergatik ez fantasiak izan?

Sexua, sendagai naturala

  • Menéame0

sexuBadira hainbat gaixotasun sexu-harremanen bidez senda edo arindu daitezkeenak. Inork baino hobeto azaldu zuen Luziak zein diren gaitz horiek astearteko “Akabo Bakea” saioan.

Depresioaren aurkako sendagai naturala da sexua. Gainera, zahartzea atzeratzen du, eta inkontinentzia gelditzeko ere balio omen du.

Hori gutxi ez eta, larruazalerako, giharretarako eta bihotza indartsu edukitzeko ere gomendagarria da astean gutxienez birritan sexua praktikatzea.

Aipatu gaitzak sendatzeaz edota arintzeaz gain, zoriontsuago izaten laguntzen digu.

Beraz, ez duzue aitzakiarik! Gozatu eta osatu!

Entzun saio osoa hemen.

Zer da zoru pelbikoa?

  • Menéame0

ETB1ko ‘SexSua’ saioak emakumeen sexu-organu garrantzitsuena hizpide hartuta hasi du bere ibilbidea telebistan: alua. Organu hau, sexuari dagokionean, ezezagunenetakoa dela iritzita, bere inguruko tabu guztiak apurtzera etorri da Jon Gomez Garaik gidatzen duen programa.

Nahia Rojo, sexu-hezitzailea

Nahia Rojo, sexu-hezitzailea

Hasteko, aluaren atalak zeintzuk diren jakitea ezinbestekoa dela esan digu Nahia Rojo, Desira sexologia zerbitzuko adituak. Honako hauek aurkituko dituzte emakume guztiek euren aluan: klitoriaren estalkia, klitoria, ezpain txikiak, baginarako sarrera eta ezpain handiak.

Honetaz ari garela, klitoria badela jakitea garrantzitsua da Nahia Rojoren hitzetan. Gezurra badirudi ere, gaur egun oraindik emakume asko dago zer den eta zertarako balio duen ez dakiena. Klitoriaren funtzio bakarra gozamena da. Horretarakoxe soilik daukate emakumeek organu txiki hori aluaren goiko partean. Bera kitzikatuz edo berarekin jolastuz gozamena lortzen dute.

Aluak marrazten

Alu bat marrazten ba al dakigu?

Bestalde, gorputzeko gainerako atalak pertsona batzuetik besteera aldatzen diren bezala, aluak ere ezberdinak dira emakume batzuetan eta besteetan. Normalean ez dira erabat simetrikoak izaten; batzuek ezpain txikiak handiagoak izaten dituzte eta besteek txikiagoak; usaina eta fluxu kopurua ere ezberdina izaten da emakume batzuetatik besteetara…

Baina ezberdintasunak ezberdintasun, emakume guztiek gauza bat izan behar dute argi: zoru pelbikoa landu egin behar dela. Azken aldian, asko entzuten den kontzeptua da hau. Baina zer da zoru pelbikoa?

Arantza Meabe, ginekologoa

Arantza Meabe, ginekologoa

Arantza Meabe ginekologoak Jon Gomezi azaldu dion bezala, pelbiaren inguruko organuak eusten dituen gihar eta tendoi multzoa da zoru pelbikoa. Urteek aurrera egin ahala eta haurrak erditu ondoren, gihar eta tendoi horiek indarra galtzen dute, lasaitu egiten dira eta osasun arazo izatera ere iritsi daiteke.

Emakume askori, erditu ondoren edo menopausiako hormona aldaketen ondoren, pixak ihes egiten die egoera askotan: doministiku egiterakoan, salto edo korri egiterakoan… Horiek dira zoru pelbikoa ahultzearen sintometako batzuk. Arazoa oso larria denean, konponbidea kirurgia izan ohi da.

Txinatar bolak

Txinatar bolak

Gaur egun, ordea, horretaraino iritsi gabe ere, badaude zoru pelbikoa indartzeko ariketa eta teknika ugari. Txinatar bolak erabiltzea da horietako bat. Askok jostailu erotiko soiltzat dituzte eta, horiek erabiltzean emakume batzuek gozamena sentitu badezakete ere, bola txinatarren funtzio nagusiena pelbiaren inguruko muskuluak indartzea da. Noski, muskuluak indartuta daudenean, gozamena handiagoa izaten da sexu harremanetan, bai emakumearentzat bai gizonarentzat.

Eta nola funtzionatzen dute? Mugimenduarekin. Hau da, txinatar bola bakoitzaren barruan beste bolatxo txiki bat dago. Mugitzen garenean, barruko bolatxoak talka egiten du kanpoko bolaren kontra eta horrek sortzen duen bibrazioak bagina inguruko muskuluak mugitzen ditu. Beraz, txinatar bolak oinez ari garenean erabili behar ditugu, bestela alferrik izango da.

Olga Polo, emagina

Olga Polo, emagina

Jon Gomez Laudioko Olga Polo emaginarekin hizketan ere aritu da ‘SexSua’ saioan. Olgak txinatar bolen antzerako produktu bat merkaturatu du eta, kontatu duenez, antzinako emakumeek ere erabiltzen omen zituzten horrelakoak.

Txinatar bolez aparte, badaude bestelako ariketa edo teknikak ere. Errazena edozein momentutan pelbiaren inguruko muskuluak itxi eta irekitzea da; hau da, pixari eutsiko bagenio bezala. Egunean hainbat alditan eginda, muskuluak lantzen arituko gara.

Azken urteetan, gure inguruan ezagun egin den beste ariketa bat gimnasia hipopresiboa da. Emagin askok erditze ondorengo klaseetan erakusten dute nola egin, eta gimnasio eta kiroldegi batzuetan ere egiten dute eskaintza hau.

Zoru pelbikoari buruzko ‘SexSua’ saioa osorik ikusi dezakezue hemen:

Scorpius pozoitsua da; Leo, berriz, sutsua

  • Menéame0

mujeres-amantes-300x150Azti lanetan aritu zen Luzia astearteko saioan. Etorkizuna irakurtzera ausartu ez bazen ere, astrologia ardatz hartuta eman zuen saioa.

Hain zuzen, zodiakoko zeinuak aztertzen ibili ziren, horietako bakoitza sexu kontuetan nola moldatzen den jakite aldera.

Tauro

Burugogorrak dira Tauro zeinukoak, baina nolakoak dira ohean?

Cancer

Izarapean agintzea gustatzen omen zaie.

Aries

Gau bateko abenturak gustuko dituzten horietakoak dira.

Gemini

Bipolartasuna da Gemini direnen ezaugarri nagusia. Sexuan ere horrelakoak al dira?

Scorpius

Pozoitsuak dira azaroan jaiotakoak. Zergatik?

Leo

Sutsuak, dena ematen duten horietakoak dira Leo zeinudunak.

Piscis

Uretako zeinuak dira horientzat bikote aproposenak.

Virgo

Lehenengo hitzorduan Virgo batekin oheratzea ez omen da lan erraza.

Sagittarius

Aries, Leo eta Aquarius zeinuekin bateragarriak.

Aquarius

Sexua eta maitasuna ez dira inola ere gauza bera Aquarius direnentzat.

Libra

Sexu-harremanak izan ostean ondo sentitzea bilatzen dute.

Capricornus

Ez ei da erraza Capricornus batekin harreman bat izatea. Zer dela eta?

Erantzun guztiak, hemen.