Donostia

Amaitu da aurtengo Donostiako jazzaldia eta Aste Nagusia heldu bitartean, iada gutxi geratzen den arren, oraindik baditugu hainbat zita hirian. Jazaldiak 115.000 lagun bildu ditu eta balantzea oso ona izan da, bai entzule kopuruagatik, baita artisten mailagatik ere. Hasiera egunean gure horman esan genizuen bezala, B.B. King handia izan genuen gure artean eta urrezko itxiera berriz, Cyndi Lauperren emanaldiak eman zion. Euria-euri, zinez jendetsua izan da Donostiako jazzaldia.

Bestalde, gaur bertan eman dizuegu albistea: 150 pertsona baino gehiago ari dira Bon Jovik ostiralean Anoetan emango duen kontzerturako prestaketa lanetan. Eta sinesgaitza badirudi ere, eguraldi iragarpenak ez du auririk aurreikusten beraz, badirudi, Amaia Cuesta eta beste milaka lagunen nahia beteko dela eta gau gogoangarria izango dela ostiralekoa. Zuk sarrera erosi ez baduzu, ez itxaron, oraindik hogei eurotan ere badaude batzuk. Hona hemen, bideoan, Bon Joviren kontzerturako lanak, Anoetan.

Eta Aste Nagusia heltzeko irrikaz zaudeten guztiontzat Ane Goikoetxeak Donostiako horman partekatu duen albistea: Su Artifizialen 48. Nazioarteko Lehiaketa aurkeztu da gaur. Anek dioen bezala, ‘Ea aurtengoan nork irabazten duen!‘.

Eta amaitzeko, Transistoria.comek egindako bideo hauxe aukeratu dugu aste honetako laburpenean. Bertan, tilt-shift teknika erabiliz, hiriko bazter guztiak goitik begiratuta ikus-genitzake eta badirudi Donostia miniaturazko herri handia besterik ez dela. Benetan polita ikus-entzunezko lana. Egun batzuk barru izango duzue berriz ere gure berri. Bitartean poztu ezazue aldartea, azkenean eguzkia aterako da eta! Eskerrik asko eta laster arte, ongizan!

Share on Facebook

Korrika 17 Euskal Herrian zehar dabil egunotan, eta lasterketaren azken eguna igandean izango da, Donostian. Korrika izan da aste honetan Facebookeko horman gehien eztabaidatu den gaia. Gai hau eta beste hainbat jorratuko ditugu ondorengo laburpenean.

Apirilaren 7an hasita, 11 egunez eta gelditu gabe, Euskal Herria zeharkatzen ari da hamazazpigarrenez Korrika. Baina azken txanpara heltzen ari da, izan ere, datorren igandean amaituko da aurtengo lasterketa, non eta Gipuzkoako hiriburuan, Donostian. Hori dela medio, Leire Ibarrak ondorengo esteka hau uzten zigun, eta bertan Donostian Korrikak egingo duen ibilbidea ikus daiteke, besteak beste. Animatu beraz, txiki, gazte eta helduak, euskararen alde egitera. Eta badakizue, “Maitatu, ikasi, ari… euskalakari”.

Bestalde, Sahaja Yoga Euskadik meditazioaren inguruko ikastaro baten berri ematen zigun. Ondorengo hitzekin egiten zigun gonbitea: “zure barrena ezagutu nahi al duzu, edo soilik apur bat erlaxatu? Etorri gugana meditatzera. Donostian meditazioaren inguruko doako ikastaroa!”. Honen inguruko informazioa esteka honetan topatuko duzu.

Beñat Mendietak, berriz, Lorentxo Portularrumeren argazki eder batekin alaitu digu aste honetan horma. Horrela esaten zigun Beñatek: “Lorentxo Portularrumek Donostia-San Sebastiánen atera zuen irudi eder hau, EGUNEKO ARGAZKIA. Udaberria ondo baino hobeto islatzen du: loreek kolore bizia dute bertan. Paisaia gehiago ikusteko, hemen: http://tinyurl.com/3mdhmvm”. Badakizue argazkiak igotzeko erreminta berrian ere gisa honetako irudi ederrak topatuko dituzuela. Hemen Beñatek horman utzitako argazkia:

Donostia. Argazkia: Lorentxo Portularrume.

Aste honetan jakin dugu Juan Mari Arzak eta Elena Arzak sukaldari donostiarrek nazioarteko sari bana eskuratu dituztela. Albistea Itxaso Apraizek uzten zigun, ondorengo hitzekin: “Zorionak biei eta aupa Donostia!!”. Guk ere Itxasorekin bat egin eta zorionak eman nahi dizkiegu gure donostiarrei!

Gainera Gaztea atariak Crystal Fighters eta Cut/Copy, Donostiako Jazzaldiko Agertoki Berdean izango direla jakinarazten zigun. Uztailaren 21etik 25era izango da jaialdia eta Deer Tick, Fanfarlo, Dawes eta B.B. King ere arituko dira bertan.

Eta honekin amaiera emango diogu, gaurkoz, laburpenari. Jarraitu horman nahi dituzuen albisteak, argazkia, notak.. uzten. Guk gure aldetik zuek kontatutako hori blog honetara ekarriko dugu. Bitartean segi ondo eta pozik bizi!

Share on Facebook

Kaixo guztioi,

Donostiak Facebooken duen orrira joko dugu berriro, azken egunotan heldu diren edukien laburpen berri bat egiteko asmoarekin. Baieztatuko duzuenez, kultura izan dugu hizpide bertan, nahiz eta beste gai batzuk ere agertu diren.

Hasi aurretik, orain dela hilabete batzuk geure buruari jarri genion erronka gogoratu nahi dizuegu (orrialdea abian martxan genuenean, eta Donostiako taldea ere ireki genuenean): 2010eko jaietarako, Donostia maite duten 2.010 lagun bildu nahi ditugu. Beraz, hauxe da unea: Facebooken donostiarrak ezagutzen badituzue, emaiozue argazkiaren azpian dagoen “Sugerir esta página a mis amigos” aukerari, lagun horiek, gero, “Me gusta”ri eman diezaioten. Ea donostiar pilo bat biltzen garen orrialdean! Mila esker!!

Heineken Jazzaldiarekin hasiko gara; atzo, igandean, amaitu zen, eta orain balantzea egiteko unea da. Guztira, 106.000 ikusle igaro dira, edizio honetan, bere kontzertuetatik.

Musika, dena den, ez da bukatuko gure hirian; laster, abuztuaren 7an, Hamabostaldia hasiko da. Orain dela egun batzuk aurkeztu zuten; hona hemen aurkezpen horren irudiak:

Apur bat aurrerako begiratuta, eta Maria Abadiñoren eskutik, Guns N’ Rosesek Donostian urrian emango duen kontzertua izan dugu hizpide; izan ere, Gazteak sarrerak zokatuko ditu. Baina ez galdu denborarik, gaur, astelehena, parte hartzeko azken eguna da eta!!

“This fucking jazz music rocks“, erakusketa, musikarekin amaitzeko, Noventa Grados aretoan dago irekita; jazz eta erritmoa, irailaren 12ra arte.

Mikel Olacireguirekin irekiko diogu zinemari txoko bat; izan ere, Mikel Olacireguik, Zinemaldiko zuzendariak, irailean dimitituko du; aurtengo edizioa amaitu bezain laster, zuzendaritza kargua utziko du. Zinemaldiak jakitera eman duenez, arrazoiak “erabat pertsonalak” dira. Jose Luis Rebordinosek haren lekua beteko du.

Abuztuaren 5era arte, Donostiak beste ekitaldi bat hartuko du: Donostimagen 2010 argazkilaritza jardunaldiak; krisialdia egon arren, aurtengo edizioak tailerren eta ekitaldien eskaintza handitu du. Tino Soriano World Press Photo sariaren argazkilari irabazleak bidaiei buruzko tailerra eskainiko du.

Donostiako gidari guztientzako, informazio interesgarri bat: Urumea errekaren gaineko seigarren zubia ireki dute. Azken egunotan jakin dugu hori ere.

Horrela esango dizuegu agur; egun batzuetan bueltatuko gara. Orrialdean egongo gara zuen zain, ea hor milioi bat donostiar biltzen garen. Noski! Mila esker!!!

Share on Facebook