Donostia

URTE BERRI ON, DONOSTIA! Hasi dugu 2012a, eta kirolari begira gainera. Donostiako San Silvestre lasterketarekin amaitu zuten askok urtea, eta donostiar ausartenek, berriz, Kontxapuzoiarekin esan zioten kaixo urte berriari. Facebookeko orrialdean hori eta Realaren hainbat hitzordu errepasatuko ditugu. Gurekin etorriko?

Kirola beti egon da Donostiari lotuta. Hori dela eta, 2011 amaitzeko zer hoberik korrika pixka bat egitea baino! Urtea osasuntsu bukatzea nahi genuen guk ere, eta horregatik esteka hau partekatzeaz gainera, San Silvestre lasterketa ezagunean parte hartzeko gonbitea botatzen genizuen. Parte hartu al zenuten?

Urtero bezala, gainera, Tximistarri waterpolo taldeak Urteberri egunean Kontxan urteko lehen bainua hartzeko aukera ezin hobea eskaintzen die donostiar ausartenei. Aurten ere ez dute hutsik egin, 2012 hasteko Kontxapuzoia antolatu zen Donostian. Hauek ez dute hotzik! Ezagunik ikusi al duzue bideoan?

Realaren nondik norakoak

Iragan asteazkenean jokatu zen Realaren eta Mallorcaren artekoa, eta 2-0 garaitu ostean, Realak abantaila garrantzitsua lortu zuen Errege Kopako final-laurdenetara sailkatzeko. Norgehiagokaren aurretik zuen apustuak egiteko eskatu genizuen. Guk 3-1ekoaren alde egin genuen, txuri-urdinen alde,  nola ez, eta Jon Migueliz ere porran parte hartzera animatu zen, baita asmatu ere, 2-0ko emaitza jarri baitzuen. Aupa Jon eta aupa Reala!

Atzoko hitzorduak, ordea, zapore garratzagoa utzi zigun. Derbia zirraragarria izango zela gauza jakina zen, bai Realak baita Osasunak ere irabaztea nahi baitzuten. Bihotzak aginduta, etxekoen alde egin genuen, 2 eta 1eko emaitzarekin. Bat baino gehiago zeuden gurekin ados, “Gustuko dut” botoiari eman baitzioten. Vanessa Rodriguezek, berriz, gorritxoen alde egin zuen: “Nirea berdina baina alderantziz, 2 eta 1, Osasuna gogor dabiltza eta!”. Baina euskal taldeen artekoa hutsean amaitu zen.

Realari hurrengo jardunaldietarako zorte ona opaz, agur esango diogu, gaurkoz, gure laburpenari. Urte berriarekin zuen desirak zeintzuk diren jakin nahi ditugu, beraz animatu Donostiako Facebookeko orrialdean edo blog honetan bertan zuen asmoak kontatzera. Pozik bizi eta besarkada bat!!

Share on Facebook

Pablo Simons De Aerschot buruzagi naziaren heriotzak eztabaida sortu du Donostiako Facebookeko orrialdean. Baina moda ere protagonista izan da asteburuan Donostian, diseinatzaile gazteek euren lanen erakustaldia egin baitute. Bi gai hauek eta beste batzuk errepasatuko ditugu gaurkoan.

Pablo Simons De Aerschotenen heriotzak harridura piztu du donostiarron artean, izan ere, buruzagi nazi historikoa izandakoa iragan ostegunean hil zen 89 urte zituela. Esteka honekin ematen genizuen gertaeraren berri. Heriotza-zigorra ezarri zioten kontzentrazio eremuetan 2.500 pertsona baino gehiago bidaltzeagatik, baina gizonak ihes egin zuen eta ez zuen zigorra bete. Pedro Satoseguik eta Idoia Sagastik, ia sinetsi ezinik, euren iritzia ematen zuten horman. Izan ere, urteak eman dituzte buruzagi naziaren atzetik, baina berarekin topo egin zutenerako delituak preskribituta zeuden, eta antza, iragan ostegunean hil zen Donostian 89 urte zituela, lasai eta harrotasun handiz.

Eta albiste alaiagoetara pasako gara oraingoan, izan ere, esteka honekin kontatzen genizuen modak hartuko zuela Donostia asteburuan. Horrela, diseinatzaile gazteen erakustaldia izan da egunotan Donostian, Kutxa Kultur Moda ekimenaren bigarren edizioa antolatu baita. Bidebidek albistea iruzkintzen zuen eta bertan izan direla kontatzen zigun. “Talentu handia dago bertan, aupa zuek!”, gehitzen zuen.

Donostiako su artifizialak mundu osoan ezagunak dira. Agian horregatik, kontua da, Piroctecnica Alessandro Spinak Donostiako Facebookeko orrialdean parte hartu zuela iragan astean. Italiako Alejandrok idazten zigun eta bere ikuskizunak ikusteko gonbitea luzatzen zigun. Esteka honen bitartez,  Aci Bonaccorsiko su artifizialen jaialdiko irudiak uzten zituen, lehen saria irabazi baitzuen bertan. Ikusgarria!!! Gozatu!

Eta irudi bikain hauek ikusiz, agur esateko ordua heldu da. Jarraitu Facebookeko orrialdean parte hartzen, guk, beti egiten dugun moduan, Donostiaren inguruan kontatzen duzuen guztia blog honetara ekarriko baitugu. Segi ondo eta pozik bizi!

Share on Facebook

Larunbatean Donostiako Kursaalean ospatu zen itxiera ekitaldiarekin amaiera eman zitzaion aurtengo Donostiako Zinemaldiari. Jaialdiak eman duena eta Facebookeko horman aipatu diren beste zenbait gai errepasatuko ditugu gaurko postean. Goazen bada laburpenarekin!

Luxuzko bederatzi egun bizi izan ditugu donostiarrok, urteroko legez, Donostia munduko izar ospetsuenen topagune bihurtu baita. Larunbatean, ordea, agur esan genion Donostiako Zinemaldiko 59. edizioari. Ekitaldi ugari izan badira ere, iragan asteazkenean emanaldi berezi baten berri ematen genizuen, izan ere, Euskal Zinemaren Gaua zuzenean ikusteko beta eskaintzen genizuen. Hitzordua Victoria Eugenia antzokian zen, eta gaueko protagonista nagusia, berriz, Elias Querejeta euskal ekoizle ezaguna, Zinemira Sariaren irabazlea.

Asko izan dira Donostiara gerturatu eta alfonbra gorritik desfilatu duten izarrak, Antonio Banderas, Miguel Angel Silvestre edo Géraldine Chaplin aktoreak, besteak beste.

Larunbat iluntzean zuzenean ikusi ahal izan zen Zinemaldiaren itxiera ekitaldia, eta zirrara uneak eta ezusteko handiak bizi izan ziren Kursaalean, izan ere, epaimahaiak zinema ausartia saritu zuen edizio berri honetan. Kinielen artean ez bazegoen ere, Isaki Lacuestaren “Oinkada Bikoitzak” lanak eskuratu zuen Urrezko Maskorra, eta Zinemaldiaren golardorik handienaren irabazlearen izena ezagutu zenean, prentsa aretoan txistuak entzun ziren. Zuzendariak, ordea, ez entzunarena egin zien kritikei eta jendeak pelikula ulertuko duela esan zuen.

Guk, geure partetik, Zinemaldiaren itxiera ekitaldiko irudi batzuekin datorren urtera arte agurtuko dugu Donostiako Zinemaldia.

Donostian, gastronomia-zientzien lehen fakultatea

Gaurtik aurrera, gainera, Donostia gastronomiaren topaleku bilakatuko da, izan ere, gaur bertan inauguratu dute gure hiriburuan Basque Culinary Center gastronomia-zientzen lehen fakultatea. Mundu osoko lehen titulu unibertsitarioa eskainiko du fakultate horrek gastronomia alorrean. Esteka honetan dituzue xehetasunak.

Iragan astean espaziotik iritsitako objektu hegalari ezezagunak heldu ziren Donostiara, estralurtarrak Kontxako badian hartu baitzuten. Ikusi Luis Hernandez Camara errealizatzaile gipuzkoarraren azken lan harrigarria.

Txuri urdinak, etxetik kanpo punturik gabe

Iragan asteazkenean etxeko lehen garaipena lortu zuen Realak Granadari 1-0 irabazi ostean. Atzo berriz, zorteak ez zion askorik lagundu talde txuri-urdinari eta esku hutsik itzuli zen Mallorcaren aurka 2-1 galdu ostean.

Datorren igandean egun handia da euskal taldeentzat, izan ere, urteroko derbia ospatuko da. Txuri-urdinen eta zuri-gorrien arteko derbia ez-ohiko ordutegian jokatuko da, eguerdiko 12:00etan, Anoetan, beraz, donostiarrok, denok Reala animatzera!!!!

Amaitzeko ETB-2ko El Conquistador del Aconcagua saioko lagunek gaur gauen egingo den “Conquis, La Aventura” saioan parte hartzeko deia luzatzen ziguten. Iruzkinaren arabera,  publikoaren zihoan autobusa Bilbotik irten eta Eibarren eta Donostian geldialdiak egingo ditu.

Eta honekin amaiera emango diogu gure gaurko postari. Zinemaldian ederto pasa duzuelakoan, eta hemendik aurrera ere gure Facebookeko orrialdean parte hartzen jarraituko duzuelakoan, besarkada handi bat bidaltzen dizuegu. Ondo izan eta pozik bizi!!

Share on Facebook

Donostiako Zinemaldiak irailaren 16an, ostirala, irekiko ditu ateak. Zinemaren hitzorduaz eta Kontxako Banderaz arituko gara, besteak beste, gaurko laburpenean. Goazen laburpenarekin!

Iragan igandean jarri ziren salgai 2011ko Zinemaldirako sarrerak. Zinemaldi Plazako eta Kursaal zentroko leihatiletan, Kutxako kioskoetan, Telekutxan eta Internet bidez erosi ahal dira. Astelehenean jakin genuen 45.000 sarrera saldu zituztela Zinemaldirako. Arrakasta itzela izaten ari da, beste behin, jaialdia.

Atzo bertan Ane Goikoetxeak Donostiako Facebookeko orrialdean parte hartu zuen eta esteka honen bidez jakitera ematen zigun Donostiako Udalak 800 sarrera doan emango zizkiela langabetu donostiarrei 59. Donostiako Zinemaldira joateko. Ondorengo hitzak gehitzen zituen Anek: “Lagunok, asko gara langabetuak eta begira zer ikusi dudan!! Egia izango ote da??”.

Donostiako Zinemaldiak Facebookean, Festival de San Sebastian izenburupean, argazki lehiaketa bat jarri du abian eta amaiera ekitaldirako gonbidapenak zozkatzen dituzte. Horretarako Zinemaldian ateratako argazkiak bidali eta lagunei argazki gogokoenaren alde bozkatzeko esan beharko diezue.

Donostiako Zinemaldia datorren ostiralean hasiko bada ere, iragan igandean jaia izan zen nagusi Gipuzkoako hiriburuan, Kontxako Bandera ospatu baitzen. Egun batzuk lehenago Astillero Kontxako Banderatik at utzi zutela jakin genuen, eta egunean bertan zuzen zuzenean ikusi ahal izan genuen zazpi traineruen norgehiagoka, zeinetan Urdaibaik garaipen ikusgarria lortu zuen. Zorionak, beraz, bihotz bihotzez bermeiotarrei!

Eta musika ere izan dugu hizpide aste honetan Facebookeko orrialdean. Itxaso Apraizek Primal Scream taldea azaroaren 5ean Donostian izango dela gogorarazten zigun eta taldearen abestietako baten bideoa eskegitzen zigun. Hemen duzue “Can´t go back”:

Musikota.com-ek ere, beste behin, esteka honekin horman parte hartzen zuen. Bertan iragan uztailaren 29an Bon Jovi kantari ezagunak Donostiako Anoetako estadioan emandako kontzertuaren irudiak daude ikusgai.

Eta honekin agur esateko garaia heldu da. Gogoratu ostiraletik aurrera zinemaren munduko pertsonaiak izango ditugula gure hirian. Animatu argazkiak atera eta gure Facebookeko horman igotzera, denok elkarrekin gehiago gozatuko dugu eta Donostiako Zinemaldiaz. Mila esker hor izateagatik eta pozik bizi!

Share on Facebook

Donostiako jaiek euren bosgarren eguna dute gaur, eta Donostiako Facebookeko orrialdean Donostiako Aste Nagusia ospatzen jarraitzen dugu. Gauean, Su Ta Gar taldearen kontzertuaz gozatu ahal izango dugu, eta, bitartean, atzo gure umeek izandako ekitaldiak eta piraten abordaia gogoratzeko denbora izango dugu. Hona hemen gaurko laburpena.

Gaur gauean, Itxaso Apraizek hesian nabarmendu duenez, 23:45etik aurrera, Saguesen, Su Ta Gar talde eibartarra izango dugu ikusgai; hori dela eta, Itxasok banda honen abestirik ezagunenetariko bat partekatu du hesian: “Itxaropena”; Itxasoren ustez, “Su Ta-ren abestirik onena” da hau, “… edo niri gehien gustatzen zaidana, behintzat“, aipatu zuen. Hona hemen kanta hori:

Atzo, hesian Beñat Mendietari esker ikusi dugunez, umeak izan ziren jaietako protagonista nagusiak; ekitaldi asko izan zituzten Donostiako txikienek egunaz gozatzeko, eta, urtero gertatzen den moduan, bizikleta festak izan zuen arrakastarik handiena. Hona hemen bideoa: umeak Donostiako jaietan. “Harrobia zaindu behar dugu -esan du Beñatek, ume horien inguruan-; etorkizuneko jaiak euren esku egongo dira“.

Astelehenean, denok dakizuenez, Donostiako jaiek ekitaldirik jendetsu eta dibertigarrienetako bat bizi izan zuten: piraten abordaia. Zurekin partekatu genituen, atzo, piraten heldueraren irudiak, hementxe: piraten abordaiaren bideoan. Ikaragarria izan zen!!

Honenbestez, agur esango dizuegu; laster egongo gara hementxe, zuekin, eta donostiar guztiekin, gure Aste Nagusia ospatzen jarraitzeko. Agur bero bat, eskerrik asko eta gozatu!!

Share on Facebook

Amaitu da aurtengo Donostiako jazzaldia eta Aste Nagusia heldu bitartean, iada gutxi geratzen den arren, oraindik baditugu hainbat zita hirian. Jazaldiak 115.000 lagun bildu ditu eta balantzea oso ona izan da, bai entzule kopuruagatik, baita artisten mailagatik ere. Hasiera egunean gure horman esan genizuen bezala, B.B. King handia izan genuen gure artean eta urrezko itxiera berriz, Cyndi Lauperren emanaldiak eman zion. Euria-euri, zinez jendetsua izan da Donostiako jazzaldia.

Bestalde, gaur bertan eman dizuegu albistea: 150 pertsona baino gehiago ari dira Bon Jovik ostiralean Anoetan emango duen kontzerturako prestaketa lanetan. Eta sinesgaitza badirudi ere, eguraldi iragarpenak ez du auririk aurreikusten beraz, badirudi, Amaia Cuesta eta beste milaka lagunen nahia beteko dela eta gau gogoangarria izango dela ostiralekoa. Zuk sarrera erosi ez baduzu, ez itxaron, oraindik hogei eurotan ere badaude batzuk. Hona hemen, bideoan, Bon Joviren kontzerturako lanak, Anoetan.

Eta Aste Nagusia heltzeko irrikaz zaudeten guztiontzat Ane Goikoetxeak Donostiako horman partekatu duen albistea: Su Artifizialen 48. Nazioarteko Lehiaketa aurkeztu da gaur. Anek dioen bezala, ‘Ea aurtengoan nork irabazten duen!‘.

Eta amaitzeko, Transistoria.comek egindako bideo hauxe aukeratu dugu aste honetako laburpenean. Bertan, tilt-shift teknika erabiliz, hiriko bazter guztiak goitik begiratuta ikus-genitzake eta badirudi Donostia miniaturazko herri handia besterik ez dela. Benetan polita ikus-entzunezko lana. Egun batzuk barru izango duzue berriz ere gure berri. Bitartean poztu ezazue aldartea, azkenean eguzkia aterako da eta! Eskerrik asko eta laster arte, ongizan!

Share on Facebook