Dj Dusty, Municheko harribitxia
Jazz&Milk diskoetxetako sortzailea gaztea da Dusty.Lan asko egin du denbora laburrean eta bere diskoetxeaz, funk, soul eta jazz eszenaz hitz egin dugu berarekin.Global Funk ekimenak gonbidatuta, martxoak 5 Le Bukowski (Donostia) aretoan izango da. Martxoak 6 Bilboko Kafe Antzokian. Global Funk rules!
Keep it raw da zure lehen diskoaren titulua, zer aurkitu dezakegu bertan?
Jazz, funk, latin, brazil eta afro doinuen bilgunea da. Gaur egungo doinu dantzagarriak ere sartu ditut. Tituluak dioen moduan 60 eta 70. hamarkadako eragina duten doinu gordin eta vintage-ak entzun daitezke bertan.
Lan berria grabatzeko, Jazz musikari ugari izan dituzu alboan.
Ordenagailuarekin grabatzeak lana errazteaz gain, gauzak pausoz pauso egiten laguntzen du. Ekoizten ari naizenean sampler zahar batean pentsatzen dut. Gero, konponketa edo instrumentazio egoki bat bilatzen saiatzen naiz. Hurrengo pausua musikariak banaka gonbidatzea da, abestiarekiko dudan ideia ulertu dezaten. Amaitzeko, material on ugari izaten dut eskuartean, azken konponketa prozesuan nahi dudan kantua lortuaz.
Diskoa zuzenean aurkezteko talde baten laguntza izango duzu?
Bai, zuzenekoetarako proiektu bat sortuko dut laster. Momentuz, nire gainontzeko ekoizpenekin ari naiz. Bigarren diskoa argitaratzen dudanean hasiko gara zuzenekoak eskaintzen.
Estiloei dagokionez, oso disko irekia da eta Funk, Soul, Latin edo Jazz doinuak entzun daitezke.
Hori zen hasierako asmoa, estilistikoki oso irekia den diskoa argitaratzea.Esan dituzun estilo guztietan konexio bat dagoela uste dut, horrek haien artean nahasteko aukera ugari ematen du.
Nahasketei dagokionez, nola zabiltza?
Enkargu asko jaso ditut azken urtean: “Alice Russel”, “Re:Jazz”, “Una Mas Trio”, “The Boogoos”, “Greenwood Rhythm Coalition” eta “The Hi-Fly Orchestra” besteak beste. Oso dibertigarria da beste batzuek egindako kantuak moldatzea, zure ideia eta soinura gerturatzea. Baina nahasketei dagokionez etenaldi bat egin nahi dut nire proiektuak amaitu ahal izateko. Oraintxe bertan Lovemonk diskoetxeak argitaratuko duen nahasketa bat egiten ari naiz Makalarentzat.
Zer moduz doakizu Jazz&milk diskoetxean?
Gure argitalpenek duten erantzuna oso ona da. Dj eta musika zaleengatik feedback handia izaten ari gara, mundu mailan gainera. Hori da gehien motibatzen gaituena. Zure diskoetxea izateak 100%-ean nahi duzuna egiten laguntzen dizu. Asko gustatzen zait mundu zabalean jendea ezagutu eta talde eta ekoizle ezberdinekin lan egiteko aukera izatea.
Mundu osoko dj eta ekoizleekin lan egiten duzu beraz.
Musika hizkuntza globala da, mundu osoko jendea bateratzen duena.Diskoetxe bat kudeatzeak jendeak bidaltzen dizkizun lanak entzuteko aukera ematen dizu.Gainera, mundu osoko jaialdi eta emanaldietara gonbidatzen naute. Musikazaleona, familia handi bat bezalako zerbait da.Horregatik, musika berria ezagutu eta elkarrekin ekoizpenak egiteko aukera dugu.
Funk, soul eta jazz eszena asko indartu da azkenaldian.
Estilo horietako jaialdi handiak daude momentu honetan; ez hori bakarrik, Afrobeat, Latin edo Exotica eszenak ere oso indartuta daude. Talde ugari ari dira garai bateko soinua bilatzen. Gauza bera gertatzen da ekoizleekin. Azken hogei urtetan ordenagailuarekin lan egin da eta jendea betiko instrumentuetara itzultzen hasi da.
Epe laburrera, zein proiektu duzu eskuartean?
Hurrengo argitalpena zuzeneko afro-funk proiektu batena izango da. Hainbat lagunekin martxan jarri dudan taldea da.Zuzenean eskainitako bertsioez gain kantu berriak ere egongo dira.
