Donostiako Noventa Gradosek eta LiquidDocsek indarrak batu dituzte, “Gorputza” proiektua martxan jartzeko. Hainbat diziplina jarriko dituzte harremanetan Donostiako Kale Nagusiko lokal honetan; musika, moda, dantza eta artea batuko dira, besteak beste. Apirilaren 29an jarri zuten martxan ekimena, goizean egindako prentsaurrekoan, eta Sonia Gomezi buruzko liburua aurkezteko ere baliatu zuten hitzordua. Datozen hilabeteetan programazio zabala eskainiko dute.

Share on Facebook

Sonarrek, Bartzelonako musika elektroniko eta abangoardista jaialdiak, sail berria sortu du: Sonar Kids. Hortaz, haur eta gurasoei zuzendutako jardunaldia izango da ekainaren 21ekoa CCCB gunean, eguneko emanaldiak hartzen dituen espazioan.

Esperientzia berri honen eskutik gaztetxoen sormena piztea eta kreatibitate hori bideratzeko modua aztertzea dute helburu antolatzaileek, eta nazioarteko hainbat artistaren laguntza izango dute horretarako.

Sonar Kidsen haurrek arteaz gozatzea bilatzen dute. Beraz, haurrei zuzendutako ekimenek beteko dute egun horretako programazioa, eta erabili beharreko gailu elektroniko guztiak ere horientzat egokituta egongo dira.

Share on Facebook

Bilboko Sormen Industrien Nazioarteko 1. Foruma arrakasta handiz amaitu eta gero, CREATIVITY ZENTRUMek pertsona ekintzaileentzako plataforma sortu du. Horrela, Etorkizuna sortzen gaur, sormen industriekin lotura duten ideia eta proiektuen lehiaketa, egingo dute, “Jokoa aldatu, zure lanbidea sortu” izenburupean.

Sormen industriekin lotutako enpresa proiektuen bila ari dira.

Hautatutako 10 proiektuen arduradunek 2 eguneko training-a jasoko dute, David Parrish Camisetas y corbatas liburu arrakastatsuaren egile eta mundu zabaleko enpresa askoren aholkulariaren eskutik. Jatorrizko ideiak ondo bideratu eta enpresa egiteasmo serio bilakatzea da helburua; 10 proiektu horiek egia izatea da CREATIVITY ZENTRUMen asmoa.

Prestakuntza aldiaren ostean, proiektu irabazlea aukeratuko dute eta horrek garapen fase osorako laguntza eta babes osoak hartuko ditu.

Oinarriak, informazio gehiago eta izena emateko aukera, webgune honetan: www.bizkaiacreaktiva.com

Proiektuak maiatzaren 25era arte bidali ahalko dira.

Share on Facebook

Aitor Saraibaren irudi bilduma ikusteko aukera izango da Bilboko Abisal gunean, apirilaren 30etik aurrera. Irudi ikonoklasta eta mitomanoen arteko dialektika erakutsiko digu: Madonna, Paris Hilton eta Michael Jackson Espineteren alboan erakutsiko dizkigu, adibidez. Haur bihurri batek egindako trazu biziak ikusten dira lan honi begiratuta. Bideo artea, argazkilaritza edo marrazkilaritza nahasten ditu bere sormenetan eta, inozentziaz gainezka badator ere, konplexurik gabeko lan ausart bilakatzen da berea originaltasunari eta kolore biziei esker. “Tus ídolos favoritos”, “Un pony muerto” eta “El viaje más largo de mi vida” liburuak argitaratu ditu dagoeneko Saraibak.
Erakusketa berri honen inaugurazioa datorren apirilaren 30ean izango da, 20:00etatik aurrera, Abisal gunean (Hernani 14, Bilbo Zaharra). Saraibak “marrazki sendagarriak” saioa eskainiko du, gainera, bertan: eguneroko bizitzako arazoei aurre egiteko marrazkiak sortuko dizkio bere arazoak kontatzen dizkion orori.

Share on Facebook

BULTZATZAILEAK

LiquidDocs Bartzelonako ikerketa eta sormen estudioak sormen lan garaikideak zabaltzea eta adierazpen artistiko berrizale eta berritzaileen diseinu eta produkzio prozesu berriak aurkeztea du helburu nagusi.

Noventa Grados Donostiako espazio anitzak, bestalde, moda, autore-bitxiak, artoy-ak, kosmetika, musika, sormen galeria eta ile-apaindegia batzen ditu.

PROIEKTUA

Ziklo berri bat. Aliantza bat. Helburu komuna. Uztartze abangoardista bat. Gorputza izena hartuko duen proiektuak gaur egungo proposamen abangoardistenak ekarriko dizkigu hurrengo 12 hilabeteetarako antolatu dituzten hitzorduetara; diziplina askotako ekitaldiak izango dira, gainera. Noventa Gradosek hartuko ditu ekimenok, eta artearekin, adierazpenarekin eta sentimenduarekin lotutako ekintzak ikusi ahalko dira bertan.

liquiDocsen eta Noventa Gradosen nahiek eta helburuek bat egitea ekarri dute Gorputza zikloa, eta gorputzaren dokumentuak, memoria eta arrastoak erakutsiko ditu zuzen-zuzenean, bere horretan. Dantza, performance-ak, bideo-sormena, argazkigintza, argia, soinua, instalazioak, poesia…

Ekitaldi zehatz hauek hasiera, sarrera, baino ez dira izango. Gero, ekitaldi horiek aurkezpenak ekarriko dituzte, eta, besteak beste, CP1Gorputza09 nazioarteko deialdi publikoa ikusi ahal izango da, proiektua itxiko duen erakusketa ekarriko duen ekimena.

Horrez gain, pizgarri moduan, DispositivoMóvil3NG, liquiDocsek Noventa Gradosentzat prestatutako instalazio berria, aurkeztuko dute. “Mobiliario-kontenedore-efimero”tzat deskribatutakoak lotura estua izango du denbora, gorputz eta espazioarekin.

Bada, lehen hitzordua gero eta gertuago dago. Apirilaren 30ean (osteguna) hasiko da, Noventa Gradosen, eta, Gorputza zikloaren programazioaren aurkezpena ez ezik, liquidDocs_00: Sónia Gómez lanaren prozesuari buruzko erakusketa bat ere izango da bertan. 20:00etatik aurrera, jai handia izango da: Kokoscha eta Chucklee DJa arituko dira, beste ekimen ikusgarriren artean. Gorputza hemen da dagoeneko!

Share on Facebook

Asko izan dira, bere ibilbide profesionalean, Antonio Macarroren objektiboaren aurretik igaro diren artistak. Are gehiago, proiektuaren izenari kasu eginda, asko dira nahita edo nahi gabe, autorretratuz osatutako lan editorial berri hau osatzeko alboan kolaboratzaile moduan izan dituenak.

Ispiluaren bestaldera heltzen lagunduko diguten irudi ikonikoak aurkituko ditugu Many of Them lan berrian. Behatzailea bestaldetik ikusteko modu pertsonala erakusten digu Macarrok bere azken lanean.

Besteak beste, Caroline Lerch artista multidisziplinarra, Bernhard Wihhelm diseinatzailea eta Eleonora Bosé aurkituko ditugu argazkiotan. Gainera, horiekin izandako elkarrizketen bidez artistaren nortasunera gerturatu ahal da irakurlea.

Horrek guztiak modaren eta Antonio Macarroren arteko harremana ulertzeko ere balio du. Argazkiak Parisen, Londresen, Amsterdamen eta Donostian hartu zituen 2008an eta lehen edizioa 1.000 alek osatzen dute. Many Of Them artistaren atarian eskura daiteke.

Share on Facebook

Europako break talde onenak eta kaleko kulturan oinarritzen diren adierazpen artistiko ikusgarrienak uztartuko ditu Break On Stage 09 jaialdiak Bilbon datorren maiatzaren 2an.

Maiatzaren 2an, VIII. Europar Aretoko Breakdance Lehiaketa egingo dute Bilbon, Casilla pabilioian. Break On Stage 2009 jaialdiak Europako kale kulturaren adierazpenak jaso eta erakutsi nahi ditu. Gainera, lehiaketaz gain, ikuskizun oparoa eta kaleko kulturen erakusleiho ere izan nahi du.

Europan erabat berritzailea den jaialdia break talde onenen eta kaleko kulturan oinarritzen diren adierazpen artistiko ikusgarrienen bilgune bihurtuko da maiatzaren hasieran. Baliabide tekniko eta inguru eszeniko indartsuak eskaintzea da ekimenaren helburua, hain zuzen, artistei haien lanak erakusteko aukera emateko.

Breakdancearen inguruko hainbat diziplina izango dira ikusgai Bizkaiko hiriburuan: skatea, beatboxa (ahoaz soilik egindako soinuak), MCak, motion graffitia (soinuaren, bideoaren eta graffitiaren konbinazioa), poppinga (robot mugimenduak), video jockeyak, rollerrak (patinaje akrobatikoa), lockinga…

Share on Facebook

Mustang oinetako eta osagarri marka Amaia Salamanca aktoreari batu zaio, elkarrekin bidea egiteko. Azkenaldian arrakasta handia bereganatu duen espainiar aktoreak markaren promozio kanpaina handian parte hartu du udaberriari begira. Besteak beste, Sergio Pons moda argazkilari handiarekin lan egin dute zabalpen estrategia horretan.

Uda-udaberrietara begira kaleratutako bildumari dagokionez, erosotasuna eta naturaltasuna izango ditu oinarri. Bota eta botinak cowboy estilokoak, zimurtuak, eta baxutxoak izango dira, larru natural gastatukoak. Zapatek ukitu retroa izango dute: takoi erosoak zuri eta beltzean, beige kolorea… Gaueko zapatetan, takoia izango da protagonista, besteak beste Antzinako Erromaren eragin argia duten sandalietan.

Poltsetan print estiloa izango da nagusi: dibertigarriak, sexyak eta puntu zoroa dutenak daude. Gainera, oso handiak dira oro har, nahi beste gauza sar ditzazun.

Share on Facebook

Berri lazgarri batekin gatozkizue oraingoan: Luis Peña Ganchegui arkitekto oñatiarra bart hil zen Donostian, 83 urte zituela.

Radio Euskadiko lankideek gogoratu dutenez, Peña Ganchegui 20ko hamarkada erdialdean jaio zen, Oñatin, eta Madrilen egin zituen arkitektura ikasketak. 80ko hamarkadan, Bartzelonan irakaslea aritu ostean, Gipuzkoako hiriburura egin zuen buelta, berak bultzatutako Arkitektura eskola zuzentzeko.

Bera izan zen arkitektura garaikidea Euskal Herrira ekarri zuena, eta aitzindaria izan zen, askoren aburuz. Beste askorentzat maisua izan da eta bere lana erreferentzia argia. Euskal Herriko hainbat udalerritako fisionomia marraztu du azken 50 urteotan: Gasteizko Foruen plaza, Tolosako Aranburu jauregia eta Leidor Antzokia, Andoaingo Bastero Kulturgunea, eta Donostiako Trinitate enparantza, Amara hotela eta Mirakontxako etxebizitzak, besteak beste. Eduardo Chillidarekin batera, Haizearen Orrazia lanaren ingurua marraztu zuen, gainera. Chillidarengandik eta bere lanarengandik oso hurbil izan zen.

Espainiako Arkitekturaren Urrezko Domina jaso zuen 2004an, bizitza osoko lanaren aitorpen gisa.

Gaixotasunak bere lana gutxitu zuen baina familiaren estudiora, Peña Ganchegui y Asociados, joaten jarraitu zuen amaiera arte, Bilboko Abandoibarrekoa bezalako egitasmoak gainbegiratuz.

Rafael Moneo, Juan Benet edota Pio Barojaren laguna izan zen Luis Peña Ganchegui. Hileta Mutrikuko Jasokundeko Andre Mariaren Elizan izango da, 19:00etan.

Hona hemen, EITB Kulturako lankideek haren ibilbidearen inguruan egindako erreportajea:

Share on Facebook

Martxoaren 18an Spinning Jenny moda plataforma aurkeztu zuten Bartzelonan. Proposamen berritzaile honek hainbat diziplina artistiko uztartzeko jaio da, eta modaren munduan adierazpide berriak sortzea da bere apustua.

Taldearen izena bera oso bitxia da: XVIII. mendean iruteko asmatu zuten lehen makinaren izena da, hain zuzen, Spinning Jenny.

Aurkezpen ekitaldia Hangar industrialdean egin zuten Bartzelonan Poblenou bete-betean. Hasteko, mahaingurua egon zen eta, bertan, Leticia Oruek moda kazetari eta Modorrra Trans jaialdiko ekoizleak, José Morraja Modorrra Transeko arte zuzendariak eta Manu Gómez diseinatzaile eta Cruzcastillo markako sortzaileak hartu zuten parte, krisi garaietan modak zer toki daukan eztabaidatzeko.

Solasaldiaren ostean, hainbat diseinatzaile gonbidatuk bere lanak erakutsi zituzten, bideo eta instalazio formatuetan. Moda-sortzaileon lana modu berritzaile, ez ohiko, horretan erakustea izan zen plataformaren bereizgarria. Spinning Jennyk Animal Bandido, Cruzcastillo, Normal, Hoet, Name, Potipoti eta Roberto Piquerasen diseinuak erakutsi zituen.

Proposamenak oso harrera beroa izan zen eta Atón eta Hemisferi Dret (Les Aus) taldeen musikak eman zion bukaera.

Spinning Jenny argazki oinak:

1 – Normalen instalazioa (Elisa Amann)

2 – Normalen instalazioa (Elisa Amann)

3 – Gra_ti, Animal Bandidorena

4 – Manu Gomez (Cruzcastillo), bere instalazioan

5 -Diseinatzaileen aurkezpenak, bideo formatuan

6 – Roberto Piqueras diseinatzailea

7 – Manu Gómez, Leticia Orúe eta José Morraja

8 – Jose Castro diseinatzailea plataforma bultzatzera bertaratu zen

Argazkiak: Albert Jódar Illescas

Share on Facebook