Bertsolaritzari buruzko bloga. Bertso-saioak, bertso-afariak, bertso-jaialdiak, txapelketak eta bestelako bertso jarduerak. Hitza Jolas eta Hitzetik Hortzerako edukiak, bideoak eta audioak.
Aitor Sarriegi txapelduna lagun hartuta, Gpuntuaren final handiari errepasoa eman dio Jon Artanok Hitzetik Hortzera saioan. Ordiziatik, Barrena Kultur Etxetik, Sarriegi txapeldunaren bertso eskolatik hasi dute kontakizuna. Besteak beste, Mikel Mendizabal bertsolariaren eta Igor Eguren Ordiziako alkatearen gogoetak jaso dituzte saioan. Mendizabalen eskutik jaso zituen bertsolaritzari buruzko lehendabiziko ikasgaiak, eta lan hori eskertuz, Mendizabali eskaini zion txapela Sarriegik. Eguren, berriz, Sarriegirekin batera bertso eskolan ibilitakoa da, laguna. Gogoratu, Hitzetik Hortzeraren emisio ordua aldatu egin dutela: larunbatetan 15:00etatik aurrera ETB 1en izango da ikusgai hemendik aurrera. Bezperatik, EITB Nahieranen.
Aitor Sarriegik jantzi du Gipuzkoako Bertsolari Txapelketa 2011ko txapel preziatua. Beñat Gaztelumendirekin jokatu zuen azken buruz burukoa. Dotore aritu ziren biak, baina azkenean, sei puntuko aldea atera zion beasaindarrak Gaztelumendiri. Horra, Laxaro Azkunek txapela jantzi zion unea. Mikel Mendizabal bertsolariari eskaini zion txapela Sarriegik, urte luzez bertso-eskolako irakasle izan duenari.
Alaia Martin, Iñaki Apalategi, Agin Rezola, Jesus Mari Irazu, Jon Martin eta Unai Agirre sailkatu ziren ondoren, hurrenez hurren.
9.000 lagun batu ziren Donostiako zezen-plazan. Lehia, ikuskizuna, kultura, herrigintza … beste behin ere, ondo uztartu zituen hari-mutur guztiak Bertsozale Elkarteak. Gpuntua ikaragarria izan da!. EITB Nahieranek finalaren laburpen luze bat eskaini zuen atzo gauean.
Igande arratsaldean Donostiako Ilunbe zezen-plazan jokatuko den Gipuzkoako Bertsolari Txapelketaren finala ETB-1en jarraitu ahal izango da egunean bertan, gaueko bederatzietatik aurrera. Jexux Mari Irazu, Beñat Gaztelumendi, Iñaki Apalategi, Aitor Sarriegi, Unai Agirre, Agin Rezola, Alaia Martin eta Jon Martin izango dira Gpuntuaren festa handiko protagonistak. Azken helmugara iritsi diren zortzi bertsolariak Iñaxio Uxarralde eta Itziar Etxezarretaren esanetara jardungo dira kantuan.
Laxaro Azkune azpeitiarrak jarriko dio txapel preziatua aurtengo txapeldunari. Irabazleak Aitor Mendiluzeren lekukoa hartuko du, andoaindarra izan baitzen 2007ko txapelketa irabazi zuena.
Maiatzean hasi zuen ibilbidea Gpuntuak, sailkapen fasearekin. Udako geldialdiaren ostean, irailean final zortzirenei ekin zieten eta pausoz pauso azken helmugara, Donostiara, iritsi dira. Bidean 26 herritatik barrena igaro da txapelketa: Gipuzkoa osotik bailaraz bailara ibili da.
Ibilian ibilian, G Puntua, Gipuzkoako Bertsolari Txapelketa 2011, badoa aurrera. Indartsu hasi zen eta indartsu jarraitzen du. Bertsolariak maila ona erakusten ari dira eta bertsozaleen erantzuna, paregabea. Astebururo, aretoak leporaino betetzen ari dira. Ilunberainoko bidea luzea da, eta oraindik saio asko daude aurretik. Horra, final zotzirenetako azken saioetako bertsoaldirik onenak eta saio bakoitzeko irabazleei Xabier Sukia Hitza Jolaseko esatariak egindako elkarrizketak.
Asteburu honetan, bestalde, final zortzirenetako saio bakarra izango da larunbatean Elgoibarren. Izan ere, G Puntuak bat egingo du Azpeitian izango den Kilometroak 2011-kin eta igandean ez da saiorik izango.
G-Puntua jarraitu nahi duzu? Bertsoladirik onenak entzun nahi? … Astebururo, Hitza Jolas Euskadi Irratiko saioan duzu horretarako aukera, Xabier Sukiaren eskutik. Hitza Jolas saioak G-Puntuaren jarraipen zorrotza egingo du. Larunbatero eta igandero, ordubietatik aurrera, bertsoaldi onenak, elkarrizketak, analisiak… Hitza Jolas saioaren web orrian daude orain arteko audiorik onenak.
Mantxi eta Izagirre, Andoainen. Iturria: www.gpuntua.com
Aste honetako Hitzetik Hortzera saioan Asier AltunakBertsolari bere filmaren irudiak erakutsi ditu. Arrangoitzeko Bertsu Battle Kontezt-a eta Mallabiko bertso afaria ere izan dituzte hizpide.
Igandeko Hitza Jolas saioan bertsolaritzaren datu base berriari buruzko informazioa eman zuten. Bertsoaren itsasoan nabigatzeko erreminta berria da hau eta Nere Erkiagari, Xenpelar Dokumentazio Zentroko kideari elkarrizketa egin zion Sukiak. Tartean, bertso gehiago ere bai; Loidisaletxeren gustuko menua, Kepa Matxainen bederatzikoa, Amezketako Gpuntua, Lizaso eta Lazkanoren San Antonio bezperako puntukako saioa eta bukatzeko Hertzainak taldearenEsaiok abestia.
Larunbateko Hitza Jolas saioan Gpuntuari heldu zioten, beste behin. Zumarraga-Urretxu eta Gabiriako saioetako bertsorik onenak entzun ziren. Tartean, lehen fasearen gaineko informazioa. Hurrengo fasera pasatako 32 bertsolarien izenak zerrendatu zituen Sukiak. Unai Gaztelumendiren bederatzikoa eta Lasarteko Zabaleta auzoko bertso jaialdiko onena ere entzun genituen. Entzun saio osoa:
Aste honetako Hitzetik Hortzera saioan Xenpelar Dokumentazio Zentroaren (XDZ) jardunaz eta aurkeztu berri den bertsolaritzaren datu baseaz aritu da Nere Erkiaga.
Larunbateko Hitza Jolas saioan Gpuntua-ri heldu zioten. Aretxabaleta eta Usurbileko saioetako bertsorik onenak entzun zituzten. Tartean, lehen fasearen gaineko gogoeta eta datu zehatzak ere eman zituzten. Usurbil eta Aretxabaletako lau saioetako irabazleak hauetxek izan ziren: Usurbilen Unai Gaztelumendi eta Jokin Uranga, Aretxabaletan Nahikari Gabilondo eta Jokin Labayen. Entzun hemen saio osoa.
Igandeko Hitza Jolas saioan. berriz, Durangoko bertsoak ekarri zituzten. DF Bertsozale Eskolak antolatuta, bertso jaialdia Durangon Plateruenea Kafe Antzokian. Amaia Agirre eta Iñaki Muruaren hitzaldien ostean, bertso jaialdia. Bertsolariak: Unai Iturriaga, Gorka Lazkano, Eneko Abasolo Abarkas eta Iratxe Ibarra. Gaiak jartzen, Maite Berriozabal. ntzun hemen saio osoa.
Aste honetako Hitzetik Hortzera saioak Maite Berriozabal gai-jartzailea hartu du platoan. Gainera, Algortan antolatutako western bertso-afaria izan dute hizpide. Horretaz guztiaz gain, Gpuntua-ren berri emango du Ihintza Irizarrek. Hori guztia eta askoz gehiago, Hitzetik Hortzeran.
Bertsolaritzari buruzko bloga duzu honakoa. Neurri eta doinu librean arituko gara, batzuetan tiraka, bestetetan tiroka. Euskadi Irratiko Hitza Jolas eta ETBko Hitzetik Hortzera saioen erakusleiho izan nahi du oholtza honek.
Igandeko 
Larunbateko
Iruzkin berriak