Bermeo

Bermeotar guztiok ezagutzen dugu Gaztelugatxe: Bizkaia eta Euskal Herriko kostako tokirik ederrenetariko bat, ederrena ez bada!!! Halere, batzuetan kanpoko batek galdera bat egiten digunean (historiari buruz, ohiturei buruz…) lotsatuta geratzen gara erantzuteko orduan… Noiz eraiki zuten baseliza? Zer esan nahi du ‘Gaztelugatxe’ izenak? Beti gaur bezalako toki lasaia izan al da ? Hori dena jakiteko ikerketatxoa egin dugu … eta gauza polit batzuk topatu ditugu!! Eta bide batez… leku eder honen argazkiak berreskuratzeko aprobetxatu dugu:

Gaztelugatxeko Doniene / San joan. Argazkia: Jose Luis Ajuriaguerra

Ba al zenekien esan nahi duen ‘Gaztelugatxe’ izenak?

Bi hipotesi daude. Lehenaren arabera, izena ‘gaztelu’ eta ‘aitz’ erroez osatua egongo litzateke. Gaztelugatxe arrokaren gainean dagoen gaztelua litzateke, beraz.

Bigarren hipotesiak, ordea, ‘gatxe’ hitza ‘gaitz’ hitzarekin hurbiltzen du (gaitz, gaizto, gaizki…gatxe). Gaztelu gaitza, latza, litzateke ‘gaztelugatxe’ izenaren esanahia. Bertara nekez iristen zirelako?

Zuk baduzu beste hipotesirik?

Ba al zenekien filmak grabatu zirela Gaztelugatxen?

“La Noche de..” (ETB2ko saioa, gazteleraz)  gure irlan grabatutako film baten berri eman ziguten: “El casto varón español” espainiarra, 1973 urtekoa. Ikusi al duzue filma?

Ba al zenekien baselizak 10 mende dauzkala?

Kondairak dio tenplarioek sortu zutela X. mendean. 1.000 urtez, hainbat jabe izan zuen. Eraso batzuk ere jasan zituen. XVI. mendean esate baterako, kortsario batzuek baseliza eraso eta bertan bizi zen ermitaua hil egin zuten. 1978. urtean baselizari su eman zioten. Baseliza suntsiturik geratu zen, baina 1980. urtean berritu egin zuten.

Ba al zenekien bertan Bizkaitarrek Gaztelako erregeri aurre egin ziotela?

Kostaldea menperatzeko toki estrategikoa da Gaztelugatxe. XIV. mendean Bizkaiko zaldunek bertan aurre egin zioten Gaztelako Alfonso XIari. Juan Nuñez de Lara Bizkaiko Jaunak eta Juan de Mendoza eta Martin de Arostegi bermeotarrek hilabete oso batez kontra egin zioten eta azkenean, erregeak atzera egin behar izan zuen.

Gaztelugatxeko baseliza. Argazkia: Manuel Marques

Ba al zenekien San Juan bera egon ‘omen’ zela bertan?

Legendak dioenaren arabera, Euskal Herrira iristean, Bermeon jaitsi zen Doniene edo San Joan. Bermeotik Gaztelugatxera hiruzpalau pauso bakarrik (izatez, 231  eskilara ditu) emanez heldu zen, eta pauso bakoitzaren tokian aztarnak utzi zituen. Azkenekoa Gaztelugatxen ikus daiteke.

Eta hauek bazenekizkiten?

Bermeoko ontziak itsasora irteterakoan, itzuli batzuk egiten dituzte ababor eta istribor arrokaren inguruan, zortea izateko.

Diotenez, santuak ugalkortasun arazoak dituzten emakumeak lagun ditzake.

Batzuen ustez, Donieneren delako aztarnek zenbait gaitz senda ditzakete.

Bukatzeko, topatu dugun bideo ederra eskaini nahi dizuegu, aireetatik filmatutakoa. Eta zuek ba al duzue toki zoragarri horren argazki edo bideorik? Beharbada beste anekdota batzuk ezagutzen dituzue, aipatu ez ditugunak… Horrela bada, dudarik ez! Konta iezazkiguzue blog honetan edota Bermeoko Facebook orrialdean!

Share on Facebook

Bermeoko argazkiak jaso ditugu, 2011ko udazkena isladatzen duten irudiak. Eguzkia eta euria ageri dira, uholdeak pasa berri ditugun asteburu honetan. Horrez gain, datorren ostiralerako proposamena utzi digu Nuntxaku Zentruak eta minbiziaren gaiaz ere arituko gara. Hauxe da pasadan astearen laburpena, ekin diezaiogun!

Gotzon Monasteriok hainbat argazki elkarbanatu ditu Bemeoko Facebook orrian, bertan ikus ditzakezue guztiak baina blog honetara ekarri ditugu adierazgarrienak eta ederrenak iruditu zaizkigunak. Betaurreko berdinak jantzi arren denok ez dugu gauza bera ikusten beraz… bakoitzak erabaki dezala, baina duda barik, hauek aurtengo udazkenaren isla paregabea dira! Asteazkenean jaso genituen irudiek eguzki epelaren kolore bizia dute, larunbatekoek aldiz, euritearen grisa. Ikaragarrizkoa izan da euri jasa, nola bizi izan dituzue uholdeak Bermeon? Gotzon ez zen euriarekin haserretu argazki kamera hartuta egin zuen osteratxoa, hona hemen argazkiak:

Bermeo | Badatoz eskultura Torrontero kalean ARGAZKIA: Gotzon Monasterio

Bermeo | Lamiñako punta Bermeon ARGAZKIA: Gotzon Monasterio

Bermeo | Bermeoko alde zaharra ARGAZKIA: Gotzon Monasterio

Bermeo | Santa Eufemia eliza, azaroak 5 ARGAZKIA: Gotzon Monasterio

Argazki horiez gain, BermeoWeb-ek urri amaieran ataratako irudi hauek ere partekatu ditu. Bertan, surflariak ageri dira Bermeo eta Mundaka artean eta antza, ‘Oso olatu onak egon ziren! Egun ederra benetan!!!‘. Gozatu ederra hartu zuten batzuek!

Minbizia ez da gai erosoa izaten eta aipatzeaz bat tristuraz betetzen du giroa gaixotasunak, hala ere, gaurkoan txanponaren alde ezohikoena eta gozoena dakarkigu lerro hauetara. Pasadan ostegunean Euskadi Directo saioan Ibai eta bere familia elkarrizketatu zituzten, gaixotasuna gainditzea lortu duen bermeoko familia, jarraian uzten dizuegu Bermeoko Ibairen bideoa.  Besarkada handi bat etxeko guztientzat!!!

Nuntxaku Zentruak utzi digun proposamena dakarkizuegu gaurko laburpena amaitzeko. Bermeotarrok, ostiralerako planik bai? Hitza, musika eta irudia… guztia batzen duen ‘Haragizkoa’  ikuskizun konpletoa izango da ikusgai  ostiralean gaueko 22:00etan, Hermanutako Kapillen. Proposamen tentagarria ezta? Jarraian deialdiaren kartela, gaurkoz besterik ez. Datorren astean itzuliko gara, bitartean zuen Bermeoko berrien zain egongo gara Bermeoko orrian. Aste ona igaro, ongi bizi!

Bermeo | Nuntxaku gaua ostiraleko kartela, 'Haragizkoa'

Share on Facebook

Bermeoko argazkiak eta Bermeo Back To 70´s skate bideoa jaso ditugu aste honetan; gainera, Bermistorian ere mintzagai izan dugu Bermeoko orrian. Horiek dira gaurko laburpenaren protagonista nagusiak, has gaitezen!

Astelehen arratsaldean Juanvi Romanek Bermeoko argazkiak elkarbanatu zituen herriko horman. Ederrak dira jaso ditugun bi argazkiak, kolore bizi-bizikoak. Jose Angel, Karmelo eta Ariarik astegin dituztela adierazi dute, guri ere izugarri politak iruditu zaizkigu, horrexegaitik dakarkigu hona bietatik koloretsuena (bestea ikusteko bisita ezazu Bermeoko Facebookeko orria). Zer diozue bermeotarrok, ederra da ezta?

Bermeoko portua ARGAZKIA: Juanvi Roman

Eta Gorka Pertikak berriz, herriko skate zale guztien gozamenerako bideoa partekatu du. Halaxe egin dio aurkezpena Bermeo Back To 70´s ikus-entzunezko lanari: ‘Bermeo 70. hamarkadara bueltatzen da, skatearen esentzia berreskuratzeko!!‘ Arrazoi osoa dauka, badirudi hurruneko herrialde exotiko batera garamatzatela irudiek, baina ez, gure herriko skatelarien artean ere skatearen esentzia arnas daiteke. Ikus ezazu Try it! taldeak egindako bideoa eta gero, esaiguzu, ez al da benetan ederra?

Pasadan asteazkenean aldiz, astebururako proposamena luzatu genizuen. Bermistorian ekimenarekin herriko historian murgiltzeko aukera paregabea izan baitugu azken egun hauetan zehar. Bitor Uriarte bermeotarrak Antxinako Alde Zaharreko toki bereziak berbaldia eskaini zuen Arrantzale Museoan, bisita gidatuak burutu ziren larunbatean eta asteburu osoan, Antxinako Azokea izan gendun. Nagorek agian bertaratuko zela esan zigun eta Iratxek berriz, bisita gidatuen inguruko interesa adierazi zuen. Izan al zineten bertan neskak? Zer iruditu zitzaizuen?

Laburpena amaitzeko pasadan ostegunean, urriaren 20n, ezagutu genuen albistea dakarkigu Bermeoko blogera: ETAren komunikatua argitaratu zen arratsaldean, eta bertan, jarduera armatua behin betiko amaitu duela iragarri zuen. Normalean ez dugu politikaz hitz egiten gure orrian baina azken orduko albisteak izan zuen interesak bultzatuta zuekin elkarbanatzea erabaki genuen eta partaide askoren erreakzioa eragin zuen albisteak. Horrela aipatu zuen iragarpena Nuria Bilbaok: ‘Egun historikoa da!‘.

Eskerrak eman nahi dizkizuegu Bermeoko orriaren jarraitzaile zareten guztioi eta batez ere, bertan parte hartzen duzuenoi, egunez egun, zuek osatzen baituzue herriko gertaeren kronika. Iban Bilbaori ere eskerrak Kristino aitze santu barridxe izeteko proposamena jasotzen duen bideoa elkarbanatzearren. Datorren astean ere Bermeon gertatzen den guztiaren berri emango dizugu… bermeotarren ahotik. Ordura arte, aste ona pasa ezazue. Eskerrik asko eta ongi izan!

Share on Facebook

San Martineko etxeak, gabonetako lehiaketa bereziak eta Bermeoko argazkiak izan dira aste honetako gai nagusiak Bermeon.

Aurreko mezu baten edo bestean ere, asteko errepasoa egiterako orduan, San Martineko etxebizitza berriekin dagoen arazoa komentatu izan dugu. Azken berriak ez ziren oso onak, eta eraikinaren zati bat botatzekotan geratu ziren, gainera epe baten barruan egin behar zen eta bestela Bermeoko udalaren gain geratuko zen isuna. Beñat Mendieta: “Kapituluka azken etxebizitzen gora beherak: San Martineko eraiki berri diren etxeen altuera txikiagoa izan behar dela eta…bota beharraren erabakiarekin bueltaka. Zer deritzozu?” Jarraian duzu informazio gehiago jasotzeko albistea.

Gabonetan, ohikoa da gabonetako postalak bidaltzea eta askotan horiek eskuratzeko erosi egiten ditugu, hala ere, askok eta askok euren eskuekin lantzen dituzte eta oso bereziak izaten dira. Gure orrialdeak herrian martxan jarritako beste lehiaketa baten berri eman zigun, izan ere, aurrekoan, Postal Lehiaketa izan zen eta orain…: “Gabonetako Postalak entregatuta orain, mahaia apaintzekoen txanda da…San Tomas bezperarako prest izan behar dira…nola daramazu? Ezin dira 12 euro baino gehiago gastatu eh!!!” Irakurri duzuen moduan, lehiaketan parte hartzeko baldintzetako bat hau da, oso garestia ez izatea, gaur bertan emango dira jakitera irabazleen izenak. Guk berria ekarri dizuegu.

Lehiaketa batetik bestera, parte hartzeko egunak dira eta postalak egiten bada are hobeto. Amaia Fernández: 210 postal aurkeztu dira, eta irabazleak ezagutu nahi badituzu, hemen, hurrengo loturan klik eginez jakingo duzu. Beraz, guk hemen ez ditugu izen guzti-guztiak banan banan jarriko, baina zeintzuk diren jakiteko, hurrengo estekan aukera duzu.

Orain, urtea ondo bukatzeko eta datorrena hobeto asteko desioekin irudien bilduma egitea besterik ez da falta, izan ere, aste hau, argazkien astea izan dela esan dezakegu.

Koldo Britok honako argazkia utzi zigula eta,  Beñat Mendietak horrela erantzun zion: “Aupa Koldo! oso ona!!! Ongi etorri!”.

Bermeo. Koldo Brito

Iranzu Ugalde: “BERMIO 2007an“ Izaskun Egaña: “zein egunetan egin zen hain argazki polita?”. Iranzu Ugalde: “ez dakit baina badakizu Bermeon ez dela elurra horrela gelditzen”. Amaia Fernández: ” Aupa! hau hotza…honek hotza ematen du ezta?”

Bermio 2007. Irantzu Ugalde

Patxi Xabier Kareaga Ruiz: “Bermioko zerua gaur eguerdian (2010/12/18).”

Bermeo. Patxi Xabier Kareaga Ruiz

Azken argazkia bart egindakoa da. Patxi Xabier Kareaga Ruiz: ” Ilargia Izaro goian“.

Bermeo. Patxi Xabier Karega

Eskerrak emanez eta egun zoriontsuak opatuaz agurtuko dugu aste honetako errepasoa.

Share on Facebook