Category Archives: argazkiak

Nola bizi izan dugu Bermeoko bizilagunok sutea?

Bermeoko herritarrek ez dute berehalakoan gaur Bermeon izandako sutea ahaztuko. Alde Zaharreko lau kale ebakuatu dituzte, eta hiru suhiltzaile eta bi polizia arin zauritu dira Bermeoko sutean. Arriskua amaitu bada ere, 5 eraikin eraitsi, eta 70 bermeotar etxerik gabe geratu dira.

Bermeoko sutea. Argazkia: EFE

Sua goizeko 04:00etan piztu da, hutsik zegoen solairuko eraikin batean, Juan Nadiz Kalean. Oraindik ez dago argi zerk eragin duen sua, zirkuito labur bat izan litekeela uste dute, baina denbora gutxian sua beste hainbat eraikinetara hedatu da gaur gaueko haizeteen eraginez. Jonathan Rodriguezek Bermeoko irudi ikusgarri hauek hartu ditu:

Bermeoko 20 atari hustu dituzte, lau kaletan (Juan Nardiz, Erremedio, Nekazari eta Intxausti). Ebakuatutako bizilagunak onik daude, eta goizean goizetik, Bermeoko sutean kaltetuak izan diren lagunei herritarren arreta-zerbitzurako Berhaz bulegora joateko deia egin zaie.

Bermeoko herriarekin bat

Bermeok Facebookean duen orrialdean albistea eman eta berehala Gotzon Monasteriok ondorengo esteka partekatzen zuen. Izan ere, goizean goizetik mezu solidarioak asko eta asko izan dira bizilagun kaltetuentzako, baita Bermeoko herriarentzako ere. Herritar askok, gainera, eitbcom-ek argazkiak eta bideoak igotzeko duen webgunera hainbat argazki eta bideo bidali dituzte, Jesus Mari Uribe edo Jon Batiste Telletxeak, besteak beste:

Bermeo sutan. Argazkia: Jesus Mari Uribe

Bermeo sutan. Argazkia: Aitor Etxebarria

Kea Bermeoko alde zaharrean. Argazkia: Jesus Mari Uribe

Bermeon sutea. Argazkia:Jon Batiste

Sutea Bermeon. Argazkia: Bermeo

Bermeoko sutearen argazkiak ikusita, badirudi, herria goitik behera erre dela. Sutea piztu denean zeuden sugarren tamaina ikustean, “Alde zahar osoa kiskaliko zela pentsatzen genuen”, esan du Bermeoko Alkateak.

Sutearen ondorioak

Gutxienez bost eraikin behera etorri dira, bost persona arin zauritu dira eta 70 familia etxerik gabe geratu dira Bermeon izandako sutearen ondorioz. Udalak kaltedunen errolda bat egingo du, guztiei ostatu eman ahal izateko.

Irudi ikusgarri hauekin uzten zaituztegu. Horrela gelditu da sua piztu den eraikineko patioa:

Bermeoren magia iruditan

1 Reply

Bermeok xarma berezia duela ez da gauza berria bermeotarrontzat. Itsasoa, portua, herri txiki baten xarma… Eta horren adibide garbia Bermeok Facebookean duen orrialdea da, bermeotar askok gure herriko argazki ederrak partekatzeko toki aproposa! Aldez aurretik Patxi Xabier Kareaga edo Oi Zox bezalako erabiltzaileei eskerrak eman, eta Bermeoko txoko xarmangarrietatik ibilalditxoa egingo dugu gaur, udaberriari hasiera emateko. Ba al zatozte?

Bermeok urte hauetan guztietan jasan dituen aldaketak begibistakoak badira ere, zenbaitetan ondo etortzen da argazki zahar bat begien aurrean jartzea. Duela hilabete batzuk Patxi Xabier Kareagak ondorengo argazki hau partekatu zuen.

Bermeoko argazki zaharra. Egilea: Patxi Xabier Kareaga Ruiz

Urteek aurrera egin ahala, ordea, Bermeok beste itxura bat hartu du, eta Oi Zox-en laguntzaz, Bermeoko hainbat txoko aurkezten dizkizuegu, jarraian. Eta lehendabiziko geldialdia Matxitxakoko lurmuturrean egingo dugu

Matxitxakoko itsasargia. Egilea: Oi Zox

Matxitxakoko lurmuturra. Egilea: Oi Zox

Oi Zox-ek, ordea, Bermeoko bestelako argazkiak ere utzi dizkigu. Gozatu!

"Artza". Egilea: Oi Zox

Bermeo. Egilea: Oi Zox

Bermeo gauez. Egilea: Oi Zox

Amaitzeko, Gotzon Monasterio lagunak partekatutako bideo zoragarri honekin uzten zaituztegu. Ondo ondo hasi udaberria, eta Bermeoko blogean zure argazkiak agertzea nahi izatera, partekatu Bermeok Facebookean duen orrian zuen argazkiak. ZORIONTSUAK IZAN!

Gaztelugatxe: ezagutu bermeotarron altxorra!!!

Leave a reply

Bermeotar guztiok ezagutzen dugu Gaztelugatxe: Bizkaia eta Euskal Herriko kostako tokirik ederrenetariko bat, ederrena ez bada!!! Halere, batzuetan kanpoko batek galdera bat egiten digunean (historiari buruz, ohiturei buruz…) lotsatuta geratzen gara erantzuteko orduan… Noiz eraiki zuten baseliza? Zer esan nahi du ‘Gaztelugatxe’ izenak? Beti gaur bezalako toki lasaia izan al da ? Hori dena jakiteko ikerketatxoa egin dugu … eta gauza polit batzuk topatu ditugu!! Eta bide batez… leku eder honen argazkiak berreskuratzeko aprobetxatu dugu:

Gaztelugatxeko Doniene / San joan. Argazkia: Jose Luis Ajuriaguerra

Ba al zenekien esan nahi duen ‘Gaztelugatxe’ izenak?

Bi hipotesi daude. Lehenaren arabera, izena ‘gaztelu’ eta ‘aitz’ erroez osatua egongo litzateke. Gaztelugatxe arrokaren gainean dagoen gaztelua litzateke, beraz.

Bigarren hipotesiak, ordea, ‘gatxe’ hitza ‘gaitz’ hitzarekin hurbiltzen du (gaitz, gaizto, gaizki…gatxe). Gaztelu gaitza, latza, litzateke ‘gaztelugatxe’ izenaren esanahia. Bertara nekez iristen zirelako?

Zuk baduzu beste hipotesirik?

Gaztelugatxeko Donienera iristea ez da erraza. Argazkia: Alberto Zorrilla

Ba al zenekien filmak grabatu zirela Gaztelugatxen?

“La Noche de..” (ETB2ko saioa, gazteleraz) gure irlan grabatutako film baten berri eman ziguten: “El casto varón español” espainiarra, 1973 urtekoa. Ikusi al duzue filma?

Ba al zenekien baselizak 10 mende dauzkala?

Kondairak dio tenplarioek sortu zutela X. mendean. 1.000 urtez, hainbat jabe izan zuen. Eraso batzuk ere jasan zituen. XVI. mendean esate baterako, kortsario batzuek baseliza eraso eta bertan bizi zen ermitaua hil egin zuten. 1978. urtean baselizari su eman zioten. Baseliza suntsiturik geratu zen, baina 1980. urtean berritu egin zuten.

Ba al zenekien bertan Bizkaitarrek Gaztelako erregeri aurre egin ziotela?

Kostaldea menperatzeko toki estrategikoa da Gaztelugatxe. XIV. mendean Bizkaiko zaldunek bertan aurre egin zioten Gaztelako Alfonso XIari. Juan Nuñez de Lara Bizkaiko Jaunak eta Juan de Mendoza eta Martin de Arostegi bermeotarrek hilabete oso batez kontra egin zioten eta azkenean, erregeak atzera egin behar izan zuen.

Gaztelugatxeko baseliza. Argazkia: Manuel Marques

Ba al zenekien San Juan bera egon ‘omen’ zela bertan?

Legendak dioenaren arabera, Euskal Herrira iristean, Bermeon jaitsi zen Doniene edo San Joan. Bermeotik Gaztelugatxera hiruzpalau pauso bakarrik (izatez, 231 eskilara ditu) emanez heldu zen, eta pauso bakoitzaren tokian aztarnak utzi zituen. Azkenekoa Gaztelugatxen ikus daiteke.

Eta hauek bazenekizkiten?

Bermeoko ontziak itsasora irteterakoan, itzuli batzuk egiten dituzte ababor eta istribor arrokaren inguruan, zortea izateko.

Diotenez, santuak ugalkortasun arazoak dituzten emakumeak lagun ditzake.

Batzuen ustez, Donieneren delako aztarnek zenbait gaitz senda ditzakete.

Bukatzeko, topatu dugun bideo ederra eskaini nahi dizuegu, aireetatik filmatutakoa. Eta zuek ba al duzue toki zoragarri horren argazki edo bideorik? Beharbada beste anekdota batzuk ezagutzen dituzue, aipatu ez ditugunak… Horrela bada, dudarik ez! Konta iezazkiguzue blog honetan edota Bermeoko Facebook orrialdean!

Bermeoko VI. triatloia: argazkiak korrika, igeri eta bizikletan

Leave a reply

Bermeoko triatloiak bere seigarren edizioa bete zuen pasa den larunbatean. Maiatzaren 5ean, Aritzatxu triatloi taldeak antolatuta, parte hartzaileek 750 metro egin behar izan zituzten igerian, 22 kilometro bizikletan eta 5 kilometro korrika.

Gizonezkoetan, SVC taldeko Jon Unanue izan zen garaile, Egoitz Zalakain ATT San Sebastianeko triatleta eta Javier Ricarte Saltokiko kideen aurretik. Emakumezkoetan berriz, Estefania Gomez Saltokiko triatleta heldu zen lehenengo helmugara, bigarren Ane Ziaran Eibar Taldekoa eta hirugarren tokian Nerea Murua Codeam talde zarauztarrekoa.

Lehen Bermeotarrak Joseba Madariaga eta Rakel Alzaga izan ziren. Zorionak!!!

Arratsaldeko 4ak aldera ekin zioten lanari eta antolatzaileen hitzetan, giro ederrean bizi izan da aurtengo proba.

Hauexek eguneko irudiak:

Bermeoko VI. triatloiaren podiuma ARGAZKIAK: aritzatxutriatloi.com

Bermeoko VI. triatloia bizikletan ARGAZKIAK: aritzatxutriatloi.com

Bermeoko VI. triatloia uretatik asfaltora ARGAZKIAK: aritzatxutriatloi.com

Bermeoko VI. triatloia korrika ARGAZKIAK: aritzatxutriatloi.com

Aizu, zuk ere argazkiren bat egin ahal zenuen? Hala bada, bidaliguzu eta besteekin batera jarriko dugu! Ongi izan!

Erromeidxe 2012: egunaren kronika eta argazkiak

Leave a reply

Bermeo euritsu esnatu zen pasadan larunbatean. Hala ere, umore ona gosaldu zuten bermeotarrek apirilaren 21ean eta baserritar zein arrantzale jantzita irten ziren herritar asko Erromeidxe egunaz gozatzera.

Aurtengoa Bermeoko Erromeidxe jaiaren bigarren edizioa izan da. Kankinkabara Txistu Taldetik helarazi digutenez, oraindik ere talde guztiak balorazio orokorra egiteko batu ez badira ere, eguna zinez arrakastatsua izan zen. Hona Erromeidxe 2012ko argazkiak:

Erromeidxe 2012 erraldoiekin dantzan ARGAZKIA: Aritz Arrizabalaga

Erromeidxe 2012 eskutik helduta zahar eta gazte ARGAZKIA: Aritz Arrizabalaga

Erromeidxe 2012 bermeoko andrak taldian ARGAZKIA: Aritz Arrizabalaga

Erromeidxe 2012 kantuan ARGAZKIA: Aritz Arrizabalaga

Erromeidxe 2012 trikitilariak ARGAZKIA: Kankinkabara Txistu Taldea

Erromeidxe 2012 kalejira ARGAZKIA: Kankinkabara Txistu Taldea

Erromeidxe 2012 dantzan ARGAZKIA: Kankinkabara Txistu Taldea

Erromeidxe 2012 agarrauen dantzan ARGAZKIA: Kankinkabara Txistu Taldea

Erromeidxe 2012 sueltuan dantzan ARGAZKIA: Kankinkabara Txistu Taldea

Erromeidxe 2012 bazkaria frontoia ARGAZKIA: Kankinkabara Txistu Taldea

Erromeidxe 2012 triki eta pandero ARGAZKIA: Kankinkabara Txistu Taldea

Erromeidxe 2012 txistulariak oholtzan ARGAZKIA: Kankinkabara Txistu Taldea

Kankinkaratik oso balorazio positiboa egin dute eta datorren urteko Erromeidxerako erronka berriak aipatu dituzte: talde gehiago inplikatzea, aktibitate gehiago prestatu, herri bazkarirako lagun gehiagorentzako leku aproposa antolatzea…

Gustora geratzeaz gain, herritarrek jaia era parte hartzailean gozatu dutela azpimarratu dute; eta ez da gutxiagorako izan, hona datuak:

Goizean euria izan arren bisitari alde-zaharretik ibili ziren musika jotzen, kantatzen eta dantzatzen.

Jende asko hurbildu zen baserritar edo arrantzale jantzita eta denak ondo pasatzeko prest.

Bazkaria eta dantzaldia ere oso giro onean eta kopuruei dagokienez, 405 lagun bazkaltzen eta beste 300 lagun momentu diferentetan.

Erakusketa antolatzen, muntatzen eta zaintzen 50 lagunetik gora ibili ziren eta bertatik 800 bisitari pasatu ziren.

Ane Albisuren hitzaldi-tailerrak 75 parte-hartzaile izan zituen.

Zozketako tiketak berehala saldu ziren, balantze ekonomikoa nahiko orekatua izan da beraz.

Erromeidxeko muntatze eta desmuntatze lanetan, taldetako kideez gain hainbat herritarrek ere hartu zuten parte.

Datorren urtean ere aurten beste goza dezazuela! Aupa Bermeo, bejondeizuela!

Argazki ederrak heldu dira Bermeoko orrira: elurra Bermeon!!!

Leave a reply

Bermeo elurtuta esnatu zen aurreko astean! Ze ederra den gure herria zuriz jantzita agertzen denetan! Ez da ohikoa izaten elurra itsas mailara arte heltzea, baina botatzen duenetan, bazter guztiak zuriz koloreztatzen dira eta paisaia zoragarriak uzten dizkigu eguraldiak. Hala iruditu zitzaion Oi Zox-eri ere eta argazki kamera hartuta elurtutako Bermeoren lekuko bihurtu zen. Hona Bermeoko Facebookeko orrira bidali zizkigun irudiak, zoragarriak!

Bermeoko portua elurtuta FOTO: Oi Zox

Bermeotarrak ere elurtuta 2012ko otsailan FOTO: Oi Zox

Bermeoko portua eta teilatuak elurtuta FOTO: Oi Zox

Eskerrik asko Oi, ederrak dira benetan argazkiak! Eta zuek ez ahaztu, Facebookeko orria da herrian gertatzen den oro batzeko leku aproposa. Kontaiguzu zer gertatzen den herrian, zerk kezkatzen zaituen, ze ekimen antolatzen duzun, zertaz hitz egiten den kafe orduan… Anima zaitez eta utzi zure komentarioa gure orrian! Bertan batutako guztia laburpen batean biltzen dogu. Gainera, gertakizunen araberako post bereziak ere egiten ditugu blogerako. Ez dozu ezertxo ere galdu nahi ezta? Ba… e-mailera bidaliko dizkizugu herriko albiste guztiak, Bermeoko albisteak jaso nahi badituzu.

Aste ona pasa bermeotarrok, egun batzuk barru itzuliko gara herriko gertaerekin. Bitartean… pozik eta ongi bizi!

Foka bat iritsi da Bermeoko portura, itsas txakurra ikusi duzue?

Leave a reply

Bermeok bisitari berria eta berezia jaso du astean: foka bat agertu zaigu Bermeoko portuan. Ez da ohikoa itsas txakurren presentzia gurean, baina badirudi, azken egunetako itsaso zakarrak orientazioa galduarazi diela eta ondorioz, bi itsas txakur ikusi ditugu gure kostaldean, bat Donostian eta beste gurean. Fokak euskal kostaldean… ikusi al dituzue? Hortik al dabiltza oraindik? Argazkiren bat atera al diozue bermeon azaldu denari? Elkarbana itzazue Bermeoko Facebookeko orrian, guk bideoa uzten dizuegu jarraian:

Itsaso bizi horren argazki ederra utzi zigun Gotzon Monasteriok pasadan astean, hona hemen gure portuko kai-muturra:

Itsasoa bizi-bizi Bermeon ARGAZKIA: Gotzon Monasterio

Urte berriarekin bat asmo berriak izan ohi dira barra-barra gure agendetan, egin al duzue proposamenik? Gure orrian dantza eskaintza jaso dugu ba! Nork esan zuen euskaldunok ez daukagula erritmorik? Bermeotarrok dantzan ere iaioak gara eta saltsan trebeak, ez al da hala? Salsacubana en Bemeok umeentzako klaseak debalde eskaini ditu, hona hemen informazioa eta Valle Tunezek berriz gure herrian erritmo galanta dagoela adierazi digu! Gazteleraz utzi digu iruzkina eta halaxe dakarkigu lerootara: ‘Por suerte, llevamos años demostrando que en Bermeo hay mucho ritmo y que todo el mundo puede bailar!!! Así que …..ANIMO!!!! y gracias!‘.

Besterik ez, eskerrik asko aste osoan zehar parte hartu duzuen guztioi. Oporrak direla eta nahiko alfer ibili gara guztiok azken egunotan baina gogoratu guztion artean osatzen dugula Bermeoko orria; beraz, badakizue, nahi duzuen oro konta dezakezue bertan: herriko albisteak, argazkiak, bideoak, ekintzak… zure elkartearen agenda ezagutarazi, ekimenetarako gonbidapena luzatu, zerbait proposatu… Zure zain gaude! Laster arte!

Bermeotik mundura: Gabonetako postalak denontzat! Urte berri on!

Leave a reply

Bermeo gabonetak postalak bidaltzen aritu da azken asteetan eta jaso ere, jaso ditugu hainbat Bermeoko Facebookeko orrian. Ondo jango zenuten, familian gozatu, lagunekin aldarte onean aritu, bermeoko kantak abestu, berriak asmatu, umeekin jolastu eta ume bihurtu, bermeoko argazki zaharrak kaxoietatik atera eta aiton amonen oroitzapenekin gozatu, Olentzerok ekarritako argazki kamera berria probatu, urte zaharra behar bezala agurtu, urte berrirako asmoen zerrenda osatu, erregei eskutitza idatzi…

Aurten ere ez du elurrik egin gabonetan eta… ez da seinale txarra aizu. Esaera zaharrak dioenez, Eguberri ondorengo lehenbiziko sei egunak nolako, hurrengo urteko lehenbiziko sei hilabeteak halako. Hortaz, badirudi 2012a, egurats gozoarekin abiatuko dugula eta neguan ere eguzkiaren berotasuna sentitzeko aukera izango dugula. Hain zuzen ere, horrelako egun zirraragarri batean, Jesus Mari Uribek Bermiotik ataratako argazki ederra aukeratu genuen gure Facebookeko orrian urtea amaitzeko:

Ondo pasa eta goza itzazue jai egunak!!! Aupa Bermeo, urte berri on! ARGAZKIA: Jesus Mari Uribe

Nagore Maesori asko gustatu zitzaion argazkia eta Antonio Pessinak italieraz utzi zigun gabon mezua: ‘Ciao!! Bermeani felice natale e grande vigilia!‘. Nola ez ba! Horren ederra da gure herria… normala nazioartean ere maiteminduta agertzea! Geu guk utzitako zorion mezuarekin bat eginez erantzun dizuegu guk, bermeotar eta kanpotarroi: Urte berri on guztioi!

Dirua gora, euroak behera gabiltzan egun hauetan… nahiz eta Gabonetako Loterian deus ez heldu Bermeora, baliteke datorren ostiralean, Umearen Loteriak familiren bat edo beste poztea. Hala izan dadila! Zorte on jokatu duzuen danoi!

Besterik ez gaurkoz, eskerrik asko urte osoan zehar gurekin parte hartu duzuen guztioi eta horrela segi dezazuela aurrerantzean ere, bejondeizuela! Guztion artean osatzen dugu Bermeoko orria eta badakizue nahi duzuen oro konta dezakezuela bertan: herriko albisteak, argazkiak, bideoak, ekintzak… zure elkartearen agenda ezagutarazi, ekimenetarako gonbidapena luzatu, zerbait proposatu… Zure zain gaude! Laster arte!

Bermeo itsasoari eta Gabonei begira. Nola igaroko dituzue egun hauek?

Leave a reply

Bermeoko jendeak gabon zoriontsuak opa dizkigu Facebookeko orrialdean. Eta zer hoberik Gabonak itsasoari so egiten pasatzea baino? Bada, horiek gaurko laburpeneko bi gai nagusiak. Laburpenean gurekin etorriko al zarete?

Gabonak ate joka ditugun honetan, Juanvi Romanek irudi eder bat partekatzen zuen Bermeoko komunitatean eta bermeotar guztioi gabon zoriontsuak pasatzeko eta urte berria ondo hasteko esaten zigun.

Iturria: Juanvi Roman

Guk ere, Juanvik luzatutako mezu bera luzatu nahi dizuegu, izan ere, egun hauek bereziak dira, eta gure gertukoekin egoteko aprobetxatzen dugu. Familiarekin, lagunekin… ekintza desberdinak egiteko aukera izaten da egunotan eta… zuen planen berri ere jakin nahi dugu. Nola igaroko dituzue egun hauek? Planik ba al duzue? Kanpora joateko aprobetxatuko al duzue? Badakizue deseatzen gaudela zuen kontuak jakiteko eta nola ez, Bermeon egunotan izango diren ekintzen berri izateko.

Asko izango zarete urtea kanpoan pasa eta Eguberritan Bermeora itzultzen zaretenak. Ziur gainera, askok itsasoa ere faltan bota duzuela denboraldi horretan, eta zer hoberik denbora apur bat hartu eta gure kostari so egitea baino? Roberto Menendezek gurean parte hartu du eta Bermeoko argazki eder bat partekatu du gu guztiokin. Asís nos definía el espectáculo: “Mirando las olas uno de estos días. Fijaos como se funden las esculturas con las personas reales actuales!!…”. Que maravilloso, Roberto, gracias por estas preciosa imágen. Si es que vivir en la costa es lo que tiene, poder gozar cuando queramos de estos momentos inolvidables…

Mirando al mar. Foto: Roberto Menendez Gonzalez

Eta amaitzeko, iragan astean EITB maratoia egin zen, urteroko legez, eta guk ere bat egin nahi izan genuen Alzheimerraren bidea argitzeko.

Eta ekimen berezi bezain eder honekin agur esateko garaia heldu da. Egun hauek ondo-ondo pasatu eta kontatu Facebookeko orrialdean edo blog honetan zuen planak, irrikaz gaude eta jakiteko. Gabon zoriontsuak guztioi!

Bermeotarren argazkiak eta bideoak Bermeoko orrian

2 Replies

Bermeoko argazkiak eta bideoak jaso ditugu azken egunetan Bermeoko Facebookeko orrian. Igor Zalbidea, Roberto Menendez eta Gotzon Monasteriok irudi ederrak elkarbanatu dituzte, eskerrik asko hirukote! Gure herriko hondartzan ateratako argazki zoragarri hauekin hasiko gara:

Bermeoko Aritzatxu hondartza, ilunabarra ARGAZKIA: Igor Zalbidea

Bermeoko Aritzatxu hondartza ARGAZKIA: Igor Zalbidea

Aritzatxuko hondartzan atera zituen Igor Zalbideak urriaren amaiera aldera argazki hauek, guri ikaragarriak iruditu zaizkigu, hala esan genion atzo, ‘Ederrak dira benetan argazkiak, ikaragarrizko indarra dute. Zu bai artista!‘ eta halaxe berresten dugu gaur ere: zoragarriak Igor!

Roberto Menendezek berriz, bere 3 dimentsiotako proiektuaren berri eman digu, ‘Bermeo 3Dn lana aurrera doa, oraingoan Taraska eskultura egin dut. Zuen gustukoa izatea espero du ‘ Lotura honetan izan dezakezue proiektuaren berri eta bertan ikus ditzakezue Robertok egindako lanaren nondik norakoak, jarraian hiru dimentsiotan gure herriak duen itxura azaltzen duen argazkia. Mundu birtualean ere herri dotorea da gurea, e?

Bermeo hiru dimentsiotan ARGAZKIA: Roberto Menendez

Gotzon Monasterioren lanak ere jaso ditugu, argazkiak eta bideo bat bidali dizkigu.Argazkiak Bermeoko Facebookeko orrian ikus ditzakezu, bideoa aldiz, laburpen honetantxe txertatu dugu. Bertan, ‘Bermioko portuan’ euskal kantu zaharra entzun dezakegu, herriko irudi ederregaz lagunduta eta Gotzonek musikatua. Izan ere, Gotzonek kontatu digunez, euskal musika etnosikofonikoak egiten ditu eta Doctor Blues taldeko partaide ere bada. Artista bazara ba e gizona! Hona hemen, goza ezazue:

Eta aste honetako laburpena amaitzeko ostiralean egin genizuen proposamena aipatuko dugu izan ere, pasadan larunbatean, herriko Ost! taldea eta Cobra aditzeko aukera izan baitzenuten Bermeoko kafe antzokian. Jagoba Gorriñobeaskoak komentario hauxe utzi zuen: ‘Ta ganera bideoklipa grabako da!!! eztau geijau eskatzerik!!!‘. Non dago bideoklip hori? Ikusgai al dago edo oraindik edizio lanak falta dira?

Besterik ez, eskerrik asko aste osoan zehar parte hartu duzuen guztioi eta horrela segi ezazue. Guztion artean osatzen dugu Bermeoko orria eta badakizue nahi duzuen oro konta dezakezuela: herriko albisteak, argazkiak, bideoak, ekintzak… zure elkartearen agenda ezagutarazi, ekimenetarako gonbidapena luzatu, zerbait proposatu… Zure zain gaude! Laster arte!