Bermeo

Bolo bolo dabil A hepatitisa Bermeoko kaleetan. Lehen kasu irailean agertu zen, Saharara bidaian joan zen ume batek hartu zuen A hepatitisa. Hortik aurrera kasu gehiago agertu dira, eta une honetan 13 kasu daude Bermeon, bi helduetan eta 11 haurretan. Gaixotasuna larria ez bada ere, Osakidetzak haurrak txertatzeko erabakia hartu du, herrian gehiago zabaldu ez dadin. Herritarrak lasaitzeko eta informatzeko asmoz, Bermeoko blog honetan A hepatitisaren nondik norakoak aztertu ditugu. Baina aurretik LASAI egoteko mezua zabaldu nahi dugu:

A Hepatitisa Bermeon. Argazkia: eitb.com

Zer da A hepatitisa?

Adituen arabera, A hepatitisa gaixotasun arina da eta batez ere haurretan du eragina. Batzuetan gaixoen beharrek eragiten dute birusa, eta, beraz, osasuntsu dauden persona asko kutsatuak izaten dira. Haur eta gazteengan izaten du, batik bat, eragina, helduok A hepatitisaren aurkako antigorputz berezia baitugu.

Zeintzuk dira sintoma nagusiak?

A hepatitisa duten pertsonek sukarra, goragalea, gorakoa, jateko gogirik eza, eta batzuetan, kolore horia izaten dute azalean. Hala ere, askok ez dute sintomarik izaten, baina birusa transmiti dezakete.

Zergatik jarri behar da txertoa

A hepatitisa birusaren ondorioz sortzen den gaixotasuna da. Oso erraza da transmititzeko eta hedadura handiko epidemiak sorrarazi ditzake; hori dela eta, komenigarria eta garrantzitsua da Osakidetzaren aholkuak jarraitzea.

Nortzuk jarri behar dute A hepatitisaren aurkako txertoa

Herrian zabaldu bada ere, printzipioz A hepatitisaren kontrako txertatzea Bermeon eskolatu eta/edo bizi eta 2005 eta 2011 bitartean jaio diren haur guztiek jaso dute txertoa egunotan. Era berean, nagusiagoak ere txertatuko dira, baldin eta Lehen Hezkuntzako 2. mailara arteko kurtsoren batean eskolatuta badaude.

Nora jo beharko dugu txertoa jartzera?

Txertoak ikastetxeetan jarriko zaizkie eskolatutako haurrei, eta osasun-zentroan, berriz, eskolatu gabeko txikiei. Urtebetetik beherakoei ez zaie txertorik jarriko; izan ere, ez da aholkatzen adin horretan txertatzea.

Larritzekoa arrazoirik ba al da?

Ez, gaixotasun arina dela eta ez dagoela alarmarako arrazoirik esan du Osasun Sailak. Hori bai, herritarrei gogorarazi die kontu haundiz jokatu behar dela higiene-neurri orokorrekin; esaterako, komuna erabili ostean eta jan aurretik, eskuak garbitzeko aholkua eman du.

Share on Facebook

Bermeoko triatloiak bere seigarren edizioa bete zuen pasa den larunbatean. Maiatzaren 5ean, Aritzatxu triatloi taldeak antolatuta, parte hartzaileek 750 metro egin behar izan zituzten igerian, 22 kilometro bizikletan eta 5 kilometro korrika.

Gizonezkoetan, SVC taldeko Jon Unanue izan zen garaile, Egoitz Zalakain ATT San Sebastianeko triatleta eta Javier Ricarte Saltokiko kideen aurretik. Emakumezkoetan berriz, Estefania Gomez Saltokiko triatleta heldu zen lehenengo helmugara, bigarren Ane Ziaran Eibar Taldekoa eta hirugarren tokian Nerea Murua Codeam talde zarauztarrekoa.

Lehen Bermeotarrak Joseba Madariaga eta Rakel Alzaga izan ziren. Zorionak!!!

Arratsaldeko 4ak aldera ekin zioten lanari eta antolatzaileen hitzetan, giro ederrean bizi izan da aurtengo proba.

Hauexek eguneko irudiak:

Bermeoko VI. triatloiaren podiuma ARGAZKIAK: aritzatxutriatloi.com

Bermeoko VI. triatloia bizikletan ARGAZKIAK: aritzatxutriatloi.com

Bermeoko VI. triatloia uretatik asfaltora ARGAZKIAK: aritzatxutriatloi.com

Bermeoko VI. triatloia korrika ARGAZKIAK: aritzatxutriatloi.com

Aizu, zuk ere argazkiren bat egin ahal zenuen? Hala bada, bidaliguzu eta besteekin batera jarriko dugu! Ongi izan!

Share on Facebook

Bermeo euritsu esnatu zen pasadan larunbatean. Hala ere, umore ona gosaldu zuten bermeotarrek apirilaren 21ean eta baserritar zein arrantzale jantzita irten ziren herritar asko Erromeidxe egunaz gozatzera.

Aurtengoa Bermeoko Erromeidxe jaiaren bigarren edizioa izan da. Kankinkabara Txistu Taldetik helarazi digutenez, oraindik ere talde guztiak balorazio orokorra egiteko batu ez badira ere, eguna zinez arrakastatsua izan zen. Hona Erromeidxe 2012ko argazkiak:

Erromeidxe 2012 erraldoiekin dantzan ARGAZKIA: Aritz Arrizabalaga

Erromeidxe 2012 eskutik helduta zahar eta gazte ARGAZKIA: Aritz Arrizabalaga

Erromeidxe 2012 bermeoko andrak taldian ARGAZKIA: Aritz Arrizabalaga

Erromeidxe 2012 kantuan ARGAZKIA: Aritz Arrizabalaga

Erromeidxe 2012 trikitilariak ARGAZKIA: Kankinkabara Txistu Taldea

Erromeidxe 2012 kalejira ARGAZKIA: Kankinkabara Txistu Taldea

Erromeidxe 2012 dantzan ARGAZKIA: Kankinkabara Txistu Taldea

Erromeidxe 2012 agarrauen dantzan ARGAZKIA: Kankinkabara Txistu Taldea

Erromeidxe 2012 sueltuan dantzan ARGAZKIA: Kankinkabara Txistu Taldea

Erromeidxe 2012 bazkaria frontoia ARGAZKIA: Kankinkabara Txistu Taldea

Erromeidxe 2012 triki eta pandero ARGAZKIA: Kankinkabara Txistu Taldea

Erromeidxe 2012 txistulariak oholtzan ARGAZKIA: Kankinkabara Txistu Taldea

Kankinkaratik oso balorazio positiboa egin dute eta datorren urteko Erromeidxerako erronka berriak aipatu dituzte: talde gehiago inplikatzea, aktibitate gehiago prestatu, herri bazkarirako lagun gehiagorentzako leku aproposa antolatzea…

Gustora geratzeaz gain, herritarrek jaia era parte hartzailean gozatu dutela azpimarratu dute; eta ez da gutxiagorako izan, hona datuak:

Goizean euria izan arren bisitari alde-zaharretik ibili ziren musika jotzen, kantatzen eta dantzatzen.

Jende asko hurbildu zen baserritar edo arrantzale jantzita eta denak ondo pasatzeko prest.

Bazkaria eta dantzaldia ere oso giro onean eta kopuruei dagokienez, 405 lagun bazkaltzen eta beste 300 lagun momentu diferentetan.

Erakusketa antolatzen, muntatzen eta zaintzen  50 lagunetik gora ibili ziren eta bertatik 800 bisitari pasatu ziren.

Ane Albisuren hitzaldi-tailerrak 75 parte-hartzaile izan zituen.

Zozketako tiketak berehala saldu ziren, balantze ekonomikoa nahiko orekatua izan da beraz.

Erromeidxeko muntatze eta desmuntatze lanetan, taldetako kideez gain hainbat herritarrek ere hartu zuten parte.

Datorren urtean ere aurten beste goza dezazuela! Aupa Bermeo, bejondeizuela!

Share on Facebook

Bermeo aurten ere oreztaz betekoa da Apirileko Ferian. Sebilla urruntxo geratzen den arren, urtero legez, Bermeoko Txo Sevilla elkarteak antolatuta asteburu ederra izango da apirileko azkena Sollube inguruan. Bertan atonduko dute karpa eta umore ona izango da nagusi beste behin.

Eguneko egitaraua dakarkizugu jarraian. Eta… zuk nola bizi duzu Bermeoko Apirileko Feria?

Apirileko feria bermeon, denak soineko luzez ARGAZKIA: fotolog.com/abuelo_rebelde

Apirileko Feria 2012 – Egitaraua

Apirilak 28, larunbata

12:30 >  Txupinazoa, pregoia eta karpea edegitea Cannon Erretegian (Sollube). Sevillana eta Ohorezko aurreskua agintarientzako

13:00 > Bertaratzen diranentzako ‘Vinito Andaluz’. Jarraian, runbak, sevillanak… dantzatzeko

15:00 > Bazkaria

16:30 > Puzgarriak umeentzako

18:00 > Sokamuturra

18:30 > ‘Txo Sevilla’ eta talde gonbidatuen ekitaldiak. Ondoren, ‘Romero y Dama de Honor’ eta ‘Premio Naranja y Limon’ sariak banatuko dira

20:00etatik aurrera > Dantzaldia

*Egun guztian zehar, Calesa eta zaldiak Cannon aurreko zelaietan (eguraldiaren arabera)

Apirilak 29, igandea

12:30 > ‘Misa Rociera’

13:30 > Gazpatxo txapelketa

18:00 > Dantza txapelketa

18:30 > Talde gonbidatuaren ekitaldia

*Egun guztian zehar, Calesa eta zaldiak Cannon aurreko zelaietan (eguraldiaren arabera)

Share on Facebook

XIII. mendearen hasieran sortutako Bermeo tradizio luzeko arrantza herria da. Ia 800 urte pasa dira ordudanik, baina hala ere, euskal usadio batzuk bizirik diraute oraindik. Eta nola… bermeotarrek portu aldeko saregileen abileziaz josi dituzte usadioak aro garaikideko oihalera.

Ondo pasatzeko eta jai giroan gozatzeko helburuz, euskaldunon plaza izan ohi zen erromeria berreskuratu dute aurten bigarrengoz. Musika eta dantza aterako dituzte kalera apirilaren 21eko Erromeidxen.

Erromeidxe dantzaldia 2011 Bermeoko Kafe Antzokian ARGAZKIA: Aritz Arrizabalaga

Apirilak 21 ERROMEIDXE – EGITARAUA

12:30etan Bermeoko antzinako bost ateetatik irtenda KALEJIRA jai giroan

SANJUANPORTALE : Sanjuan Portaletik Izaro Abesbatza eta Bermeotarrak Fanfarrearekin kalejira

BEHIPORTALE : Nekazari kalearen hasieran zegoen atetik Musika eskolako trikitilariekin kalejira

SANTABARBARAPORTALE : Nardiz Tar Jon Kalearen hasieran zegoen atetik Alkartasuna Dantza Taldea eta Erraldoien Konpartsarekin kalejira

ERREMEDIOPORTALE : Erremedio kale hasieran zegoen atea, beraz, Fielato Enparantzan hasita Joseba eta Andoni trikitilariekin kalejira

ERRENTERIAPORTALE :  Ibarluzeatar Kosme kale hasieran zegoen atea, handik hasita Kankinkabara Txistu Taldearekin kalejira

14:00etan Talde guztiak Goiko plazan elkartuko dira. Bertan dantza batzuk egingo dira Arostegitik behera elkarrekin abiatu baino lehen. Portutik eta Gaztelutik jarraituko du kalejirak.

15:30etan Bazkaria frontoian. Tiketak eskuratzeko: martxoaren 22an eta 23an, arratsaldeko zazpietatik bederatzietara bitartean Kultur Etxean. Prezioa: 20€

Arratsaldean… Bazkalosteko Kantak eta dantzaldia gau aldera arte

* Jaialdi – Euskal Jantziakekoek emandako euskal jantziaren zozketa egingo da egunean zehar.

Eguna heldu bitartean eta giroa prestatzeko asmoz, erakusketa eta hitzaldia ere antolatu dituzte:

Euskal Jantzien erakusketa : Bermeoko Irrintzilariak taldearen eskutik, partikularren eta Alkartasuna Dantza taldearen erropak izango dira ikusgai. Martxoaren 20tik apirilaren 1era, Nestor Basterretxea aretoan, 19:00-21:00h.

Hitzaldi-tailerra : Euskeraz Berbetan taldearen eskutik, Ane Albisuk, Gure jantzi eta janzkerak azken 100 urteotan: Atontzearen garrantzia hitzaldia eskainiko du. Martxoaren 21ean, Nestor Basterretxea aretoan, 19:00h.

Zahar eta gazte dantzan Bermeoko Erromeidxe 2011an ARGAZKIA: Aritz Arrizabalaga

Lehen Erromeidxe Kafe Antzokian

Kankinkabara Txistu Taldeak eta Alkartasuna dantza taldeak abiatu zuten iaz, lehenengo Erromeidxe. Bermeoko Kafe Antzokian izan zen dantzaldia eta 200 lagun inguru batu ziren bertan dantzarako prest. Oholtza gainean Musika Eskolako trikitilariak, Bermeoko Gaiteruak eta Kankinkabara Txistu Taldea aritu ziren, 40 bat lagun orotara. Gustora asko igaro zuten arratsaldea bertaratutakoek eta etorkizunean, jai handiagoa osatzeko gogoa adierazi zieten askok antolatzaileei. Nahi horri erantzuteko asmoz, aurten, Bermeon erroldatuta dauden Kultur talde guztiei luzatu zitzaien parte hartzeko deia eta ondorioz, herriko hamabi taldek elkarlanean antolatu dituzte egun osoko jaialdia zein ekimen osagarriak. Antolatzaileak: Haitz nagusije, Bermeoko irrintzilariak, Alkartasuna dantza taldea, Erraldoien konpartsa eta gaiteroak, Euskeraz berbetan, Erdu txo! Gazte asanblada, Izaro abesbatza, Bermeotarrak fanfarrea, Bermeoko abesbatza, Musika eskolako trikitilariak, Joseba eta andoni trikitilariak, Kankinkabara txistu taldea, Zantzue kultur elkartea, Erroxape elkartea. Halaber, Erromeidxe osatzeko, Jaialdi – Euskal Jantziak eta Bermeoko Udalaren laguntza ere izan dute.

Honenbestez, badakizue, erakusketan ideiak hartu, hitzaldi tailerrean zapia eta jantzia atontzen ikasi eta baserritar edo arrantzale jantzita… apirilaren 21ean denok Erromeidxera!

Share on Facebook

Bermeo eta Ermua dira Bizkaian, saihesbiderik ez duten herri bakarrak; baina laster zerrenda beltz horretatik kendu egingo dute gure herriaren izena. Izan ere, Bizkaiko Foru Aldundiak joan den astean jakinarazi zuenez, udan hasiko dira saihesbideko lanak eta, dena ondo bidean, hiru urte barru zabalik izango da Mungiarekin lotura gisa ere erabiliko den bidea.

Bermeoko jendearentzat duen garrantziaz jakitun, segituan partekatu genuen berria, esteka honen bidez, eta oro har, pozez hartu du jendeak: Bazela garaia adierazi dute Aritz Hormaetxea eta Ait Ty, azken honek tunelaren beharra azpimarratu du. Karmelo Siguenza eta Pili Gabilondo eszeptikoago agertu dira eta Ander Atxikaallende eta Aitzi Campillo Sollubeko tunelaz galdetu dute; nonbait hori da eta proiektuaren zalantzetako bat. Tira, honen inguruko berrikuntzak jasoko ditugu, egotekotan, betiko moduan Bermeoko orrialdean eta blog honetan bertan.

Bermeotarron poz honek, baina, ez du luzaroan iraun, ze gure neska-mutilen ‘txokue’k ez du ‘Lokaleroak‘ saioko lehiaketa irabazi. 9. geratu da, 311 botorekin. Ezin dugu ulertu, ze lokalek dauka Euskal Herrian terraza, futbolina eta gure gazte jatorrak?? Gaur jakinarazi da irabazlea; behintzat Bizkaian geratu da saria (Zornotzak eta Gernikak atera dira garaile). Bueno, hurrengorako gu eh??? Ikusi ez duzuenontzat, hemen duzue Bermeoko lokalaren bideoa:

Disko bat eta ipuin bat

Gotzon Monasteriok Mikel Oihenart musikari bermeotarraren azken diskoaren berri eman zigun esteka honekin. Esan zigunez, doan eskura daiteke. Artista honen inguruko datu gehiago dituzue Bermeoko orrialdean. Hain justu, Mikelek berak honako bideo hau zintzilikatu zuen gurean: ‘La Gata Negra‘ Bermeoko ipuina, entzun entzun!

Azkenik, Gotzon Monasteriok iritzia partekatu zuen: “Bermeok marka izateko aukerak ditu eta turismo berdearen alorrean bidea egin!!!“. Haren berbetan, azpiegituran inbertsioak egin behar dira. Iritzi berekoak al zarete zuek?

Tira ba, honetan utziko dugu gaurko laburpena. Datorren astean itzuliko gara, gai gehiagorekin eta zuen ekarpenekin. Ordura arte, ondo bizi eta…. Aupa Bermeo!

Share on Facebook

Bermeo, Internet bidezko parte-hartze herritarra bultzatzen duen udalerria da. Horretarako, Bermeoko Udalak, Bermeon erabaki ekimena sortu du; bere xedea, bermeotarrek herriari buruz dituzten eskaerak zeintzuk diren ezagutzea da. Batzarrak egiteaz gain, orrialde bat ere badago Facebooken eta blog bat sarean, edonork askatasunez bere iritzia adieraz dezan.

Lehenengo bilera abenduaren hasieran burutu zen, hemen ere eman genuen horren berri Zer behar dogu Bermeon postean. Bermeon erabaki egitasmoak, Facebookeko orrialdean aditzera eman duenez, laister, lehen bilera hartako ondorioak kaleratuko ditu eta bigarren batzarra deituko du. Bitartean, Internet bidez ere parte hartu daiteke. Bermeotarrok zer deritzozue? Zer behar dugu Bermeon?

Bermeo | Bermeon erabaki : erabaki-tresnak sortzeko parte-hartze prozesua

Aste honi, Gotzon Monasteriok jarri dio doinua blues tankeran. Negu giroko egunak gozatzeko asmoz, bermeoko gitar jole baten abestia utzi digu, halaxe aurkeztu digu berak behintzat, baina… Gotzon ez da ba kantua zurea izango ezta? Guri gustatu zaigu, ea zuek zer diozuen!

Eta Bermeoko Facebookeko orrialdean aste honetan jasotakoen laburpena amaitzeko, urtarrilaren 14an Nestor Basterretxea Aretoan izandako omenezko emanaldia dakarkigu lerrootara. 3 margolari bermeotar izenburupean Amadeo Duque, Jon Jauregizar eta Andolin Jauregizar pintoreen lanen inguruko hitzaldia burutu zen. Bertaratu al zineten? Aukerarik izan ez bazenuten, baina oraindik ere hiru protagonisten lana ezagutzeko gogoz baldin bazaudete… datorren igandera arte daukazue erakusketa ikusteko aukera, arratsaldeko zazpietatik bederatzietara.

Aste ona igaro bermeotarrok eta ez ahaztu, herriko gorabeherak guztiak gure orrialdean partekatzeaz Egun batzuk barru itzuliko gara, ongi izan!

Share on Facebook

Bermeok bisitari berria eta berezia jaso du astean: foka bat agertu zaigu Bermeoko portuan. Ez da ohikoa itsas txakurren presentzia gurean, baina badirudi, azken egunetako itsaso zakarrak orientazioa galduarazi diela eta ondorioz, bi itsas txakur ikusi ditugu gure kostaldean, bat Donostian eta beste gurean. Fokak euskal kostaldean… ikusi al dituzue? Hortik al dabiltza oraindik? Argazkiren bat atera al diozue bermeon azaldu denari? Elkarbana itzazue Bermeoko Facebookeko orrian, guk bideoa uzten dizuegu jarraian:

Itsaso bizi horren argazki ederra utzi zigun Gotzon Monasteriok pasadan astean, hona hemen gure portuko kai-muturra:

Itsasoa bizi-bizi Bermeon ARGAZKIA: Gotzon Monasterio

Urte berriarekin bat asmo berriak izan ohi dira barra-barra gure agendetan, egin al duzue proposamenik? Gure orrian dantza eskaintza jaso dugu ba! Nork esan zuen euskaldunok ez daukagula erritmorik? Bermeotarrok dantzan ere iaioak gara eta saltsan trebeak, ez al da hala? Salsacubana en Bemeok umeentzako klaseak debalde eskaini ditu, hona hemen informazioa eta Valle Tunezek berriz gure herrian erritmo galanta dagoela adierazi digu! Gazteleraz utzi digu iruzkina eta halaxe dakarkigu lerootara: ‘Por suerte, llevamos años demostrando que en Bermeo hay mucho ritmo y que todo el mundo puede bailar!!! Así que …..ANIMO!!!! y gracias!‘.

Besterik ez, eskerrik asko aste osoan zehar parte hartu duzuen guztioi. Oporrak direla eta nahiko alfer ibili gara guztiok azken egunotan baina gogoratu guztion artean osatzen dugula Bermeoko orria; beraz, badakizue, nahi duzuen oro konta dezakezue bertan: herriko albisteak, argazkiak, bideoak, ekintzak… zure elkartearen agenda ezagutarazi, ekimenetarako gonbidapena luzatu, zerbait proposatu… Zure zain gaude! Laster arte!

Share on Facebook

Zer behar dogu Bermeon? galdera horri erantzungo diote bermeotarrek datorren ostiralean, abenduak 16, Kafe Antzokian. Pokerra behar al dogu? Horixe proposatu digute asteon eta zoriondu gaituenik ere ez da falta izan Bermeoko Facebookeko orrian. Ekin diezaiogun gaurko laburpenari!

Zer behar dogu Bermeon? Aparkaleku gehiago behar dira? Herria zikin dago? Kirol ekintzak falta dira? Eta, lana? Galdera horiek eta bururatzen zaizkizun beste guztiak ere… horixe da ostiralean Bermeoko Kafe Antzokian egingo den bileraren ardatza. Herritarrek erabaki tresnak sortzeko parte hartze prozesua irekiko da ostiralean, abenduaren 16an arratsaldeko zortzietan. Zer deritzozue ekimenari, hurreratzeko asmorik ba al duzue?

Zer behar dogu Bermeon? ekimena - Abenduak 16, 20:00etan, Kafe Antzokian

Eta poker partidak behar al ditu Bermeok? Seguru poker zale bat baino gehiago egongo dala gure herriko kaleetan! Horregatik, Gure-Toki Biker-barrek proposamen hauxe egin digu: ‘Igandean, abenduaren 18an, hamar eta erdietan poker partida Bermeon. Ordu bietan Gure Toki Bar Tomasen amaituko dugu‘. Zer diozue, pokerra bai?

Juanvi Romanek Gabon zoriontsuak opa nahi izan dizkigu guztiori argazki honekin. Horrexekin agurtuko gara datorren asterarte, eskerrik asko Bermeoko orrian parte hartu duzuen guztioi! Juanviri esan genion bezala… ‘Gabon zoriontsuak eta gora Bizkai Buru peña!! Aupa Athletic!! )‘

Juanvi Roman: Gabon zoriontsuak danori!

Share on Facebook

Bermeoko errekak herriko hainbat txokotan sortzen duen usai txarra izango dugu hizpide gaurkoan, izan ere, bermeotar batek Facebookeko orrialdean irudiak utzi dizkigu. Gainera egunotan “Alakrana” Euskal Atunontziko arrantzaleak terrorismoaren biktimak ez direla jakin dugu, edo ebazpen hori eman du, behintzat, Auzitegi Gorenak. Hori eta gehiago ondorengo lerroetan. Laburpenean gurekin etorriko?

Juanvi Romanek Bermeoko Facebookeko orrialdea aprobetxatu du “salaketa” bat egiteko, izan ere, bere hitzetan, San Martin, Doloriaga eta Aritzatxu kaleetako bizilagunek izugarrizko kiratsa jasaten ari dira azkenaldian. Juanvik, gainera, salaketa horren frogak utzi dizkigu, berak horman zioen bezala, “irudi batek mila hitzek baino gehiago” balio baitute. Ikusi nahi? Egin klik eta ikusi bideoa.

Guztiok dakigu “Alakrana” Euskal atunontziko arrantzaleak 47 egunez egon zirela bahituta Somaliako piraten menpe. Iragan asteazkenean kontatzen genizuen Auzitegi Gorenak egun horretan erabakiko zuela ‘Alakrana’-ko lau arrantzale terrorismoaren biktima diren ala ez, eta guk galdera botatzen genizuen orrialdean. Zuen ustez, ‘Alakrana’ko arrantzaleak terrorismoaren biktima dira? Mikel Agirresarobek berehala eman zuen erantzuna, “bai” irmo batekin.

Ebazpena jaso bezain pronto kontatzen genizuen Auzitegi Gorenak baztertu egin zuela aurkeztutako helegitea, eta beraz, gure arrantzaleak ez omen dira terrorismoaren biktima bezala legez onartuak izango.

Euskararen Nazioarteko Eguna ospatu zen iragan larunbatean mundu osoko hainbat txokotan, eta Bermeon ere jai mundiala egingo zela kontatzen genizuen, besteak beste Ken Zazpiren kontzertua ikusteko aukera izango baitzen. Joan al zineten? Horrela bada… Zelan egon zen? Taldearen orrialdean irakurri dugunez, mundiala izan omen zen! Kontatu kontatu…

Badakizue datorren abenduaren 11n Lau eta Erdiko final handia izango dela Aimar Olaizolaren eta Juan Martinez de Irujoren artean. Hitzordua Bilbon izango da eta EITB Kirolak azken egunotan gurean parte hartu du eta jakinarazi digu sarrera bat dutela zozkan eta orrialdearen jarraitzaile egiten diren guztien artean zozketatuko dela. “Abenduaren 9ko 12:00ak arte orri horren zale egiten zaretan guztien artean zozkatuko da sarrera. Sarrera hori Bilboko EITBren egoitzan jaso ahal izango da! Zorte on!!”, gaineratzen zuen. Badakizue, gu dagoeneko egin gara orrialdearen jarraitzaile eta finala doan ikusi nahi izatera, azkar ibili!

Leire Martinezek ondorengo hitzak uzten dizkigun Bermeoko Facebookeko orrialdean: “Zenbatek ospatuten zuie bidxar gabon txikidxe edo gabonatako lehenengo egune?”. Zer nolako ospakizuna zen galdetzen genion Leireri, izan ere, gabon txiki egun horren berri ez dugu! Iban Bilbaok ere iruzkina uzten zuen: “idearik pez zer da gabon txikidxe”. Ia ba, norbaitek ahalik eta azkarren erantzuten digun eta denok egunaz gozatzen dugun.

Amaitzeko Juan Duran agurtu behar dugu, izan ere, bere haurtzaroa eta gaztaroa Bermeon pasa zituela esaten zigun eta bere bihotzean beti eramango duela Bermeo ere jakinarazten zigun. “Ahhhh Bermeo, Bermeo. Cuantos recuerdos….cuanto te hecho de menos”. Badakizu, Juan, beti ongietorria izango zarela, beraz, nahi duzun arte!

Eta zuei, lagunok, mila esker Bermeoko kontuak komunitatean kontatzeagatik. Jarraitu zuen zalantzak, kexak edo Bermeoko albisteak gu guztiokin partekatzen. Guk zuek esandakoak blog honetan bilduko ditugu. Bitartean izan zoriontsu eta pozik bizi!

Share on Facebook