Arratsekoak

Mugimenduak, herrien tamainakoak

Arratsekoak — Wed, 06 Jun 2012 05:39:44 +0000

Mugitu, esaten digute, mugitzea komeni zaizue, eta hori entzunda ere zer pentsatu ez dakidala geratzen naiz. Nora edo zertara galdetu dudanetan ez didate taxuzko arrazoirik eman, eta barregarriena da hori igual mahai baten aurrean lan egiten duen jendeak aholkatuko dizula.

Ohartzen naiz urrun horietara joateaz ari direla, beste bazter batzuk ezagutzeaz. Sinetsita daude gurean itxita eta gurearekin itsututa bizi garela, beti urrats batzuk atzerago, erremediorik gabe. Ez dira konturatzen inguru hauetan mugimenduak ugari izateaz gain herrien tamainakoak izaten direla: txikiak.

Pello Lizarralderen “Orbanak” eleberritik.

Nazioartean barrearen eguna…

Xatur Larburu — Mon, 14 May 2012 09:29:05 +0000

#Algara dariola, lehertzear dagoenarengan, nahi izaten dut egon gertu, berarekin, bere ondoan; Magia positibo eta lilluragarri hori, goitik behera kutsa nazan.

Irratia ere elkarrizketa da

Arratsekoak — Fri, 11 May 2012 10:28:10 +0000

‘Zinea elkarrizketa da. Ikusleak gutxi hitz egiten du, edo batere ez. Ez du ahotsik, baina botoa bai’. Hala uste du Kike Maíllok, Bilboko zine fantastikoko jaialdian Fantrobia saria jasoko duen zinegileak. ‘Eva’ da bere lehendabiziko film luzea, eta esan du, ikuslea beti hartzen duela gogoan pelikula bat egiterakoan. Badakiela, badela jendea honelako film bat ikustera joango ez litzatekeena, baina ziur dagoela, joango balira, gustatuko litzaiekela.

Bejondeiola konfidantza hori izateagatik.

Irratia ere elkarrizketa da. Zuk gutxi hitz egiten duzu, edo batere ez. Eta guk ere, beti izaten zaitugu gogoan.

Sentsazioen alde

Arratsekoak — Tue, 08 May 2012 12:13:13 +0000

Filippo Tommaso Marinettik eta Pino Masnatak 1933an idatzitako manifestu futuristan La Radiaren garaia iritsi zela zabaldu zuten lau haizetara. La Radia, arte forma berri bat da: irrati sentsazioz osatutako organismo garbia. Berdin bizirik edo hilik dauden izakiek emititutako bibrazioen transfigurazioa eta anplifikazioa. Radia da espaziorik eta denborarik gabeko, bihar eta atzorik gabeko artea.

80 urte pasatu dira irratiaren aldeko aldarri hau zabaldu zenetik. Eta irratiak badu oraindik sentsazioak sortzeko modua, bizirik edo hilik dauden izakien hotsak zabaltzen ditu, eta espaziorik gabeko artea izaten jarraitzen du. Baina ez denborarik gabekoa. Denboraren arabera neurtzen baitira irratian kontakizunak. haren arabera moztu.

Galtzean egon daiteke soluzioa. Denbora galtzean. Sentsazioen alde, Soinu artean.

Merezi duen bidaia

Arratsekoak — Fri, 04 May 2012 12:00:19 +0000

Gauza txikiekin du zerikusia denak: unibertsoaz ari banaiz, garbantzuez ari naiz. Clara Obligadoren argibideak bere ipuin liburu berriaz hizketan. “El libro de los viajes equivocados” du izenburua. Bidaia delako, bere ustez, bizitzaren sinbolo. Eta inoiz ez da bidaia egokia, beti amaitzen delako gaizki: alegia, heriotzaz amaitzen delako. “Eta hala ere, merezi du”, esaten du idazleak.

Argitu nahi izan du hala ere, ez dela bidaia turistikoaz ari, bidaia sakonagoez baizik. Jungi lapurtu dio berak: “bizi gabeko bizitza, heriotzara eraman gaitzakeen gaitza da”.

Finean sentimenduak…

Xatur Larburu — Fri, 04 May 2012 08:37:52 +0000

Hitzak aireak eramaten dituela egia da. Nahiz idatzi, nahiz inprimatu, momentua bait da hitz horien jabe.
Hala ere, saiakera on bat egingo dut: Irakurri eta, momentu hori bizitzeak, eraman nazala zuregana.

Liburual saltzeko makina

Xatur Larburu — Fri, 04 May 2012 08:33:09 +0000

Askotan, urruti dagoena, lortu ezin duguna, desiragarri izan ohi da. Ez lortzea, frustrazioa. Orduan, momentu horretan, jaitsi begirada eta, aurrean duzuna desiratzen ikasi. Hori bait da benetan gozatuko duzuna.

Finean, sentimenduak transmititu

Xatur Larburu — Thu, 03 May 2012 08:21:54 +0000

Finean, sentimenduak transmititu. Nola ordea, kanala egokia ez badugu.

Izan daiteke fin amodiozko sentipena duen pertsona zakar bat, lima baten lakartasunaren koxkek, egurra fintzen duten modura.

…zureak behar ditugu.

Arratsean isiltasunak sortuz

Arratsekoak — Wed, 25 Apr 2012 20:44:36 +0000

Carmen Machi aktorearen hitz batzuk gaur, hasteko. Antzerkia da berea, jende gehienak telebistako saio bati esker ezagutzen badu ere. Antzerkia egin izan du eta egiten du. Eta kontatu du, antzeslan gehienak, textuagatik aukeratzen dituela. Textuagatik eta idazlearengatik.

Hitzak irakurri eta zerbait mugitzen zaiola sentitu behar izaten omen du. Hitzak irakurri, eta hunkitu egiten dela sentitu. Eta orduan bakarrik esaten duela, baietz.

“Juicio a una zorra” bakarrizketaz dabil orain batetik bestera. Eta esan du: “oilo ipurdia jartzen zait, funtzio hau egiten dudan bakoitzean ze isiltasun sortzen den ikusita”.

Isiltasunak sortuz, Arratsean, Euskadi Irratian

Izan dadila zuen lana sinesgarria eta originala

Arratsekoak — Wed, 28 Mar 2012 16:10:29 +0000

”Izan dadila zuen lana sinesgarria eta originala. Izan dadila sakona, hunkigarria, zuhurra eta paregabea. Lagun diezagula gizaki izatearen esanahia islatzen, eta bihotzak, zintzotasunak, xumetasunak eta graziak gida dezatela isla hori. Garai dezazuela ezbeharra, zentsura, pobrezia eta nihilismoa, zuetako askok egin beharko baitiozue aurre. Jaso dezazuela gizakiaren bihotzak, berezko duen konplexutasun osoan, taupadak nola egiten dituen irakasteko beharrezko talentuaren eta zorroztasunaren bedeinkazioa.

Baita hori guztia zuen bizitzako obra izan dadin lortzeko behar diren xumetasuna eta jakin ona ere. Eta barruan duzuen onena izan dadila, galdera guztietan oinarrizkoena biltzea lortzen duena: Nola bizi gara?”.

Antzerkiaren egunerako John Malkovichek idatzitako mezua… ‘Arratsea’n.

‘Arratseko’ edukiak: