Arrasate-Mondragón

Gose talde arrasatearrak lan berria kaleratu du eta baita, kantuarekin bat, bideoklip berria ere. Abesti berriaren erritmora, lortuko al dugu Arrasateko orriko erronka betetzea?

Facebookeko Arrasateko orrian 500 lagun batzeko erronka bota genizuen uda garaian. Muga lez, Maritxu Kajoi 2011 ezarri genuen eta gertu-gertu ibili arren, azkenean ez ginen heldu. Orain egun gutxi, berriz ere ekin diogu! Burugogorrak gara eta urtea amaitu baino lehen lortuko dugu! Gaur, 414 lagunek ‘Atsegin dut‘e Arrasateko orria, zer dira ba 86 gehiago? Igarri dadila…

Arrasate-Mondragon | Gose taldearen Des-piezak lan berria

Bestalde, aurreko astean, Durangoko azokarekin bat ezagutu genuen albistea; Gose musika talde arrasatearrak lan berria kaleratu du: Gose Des-piezak. Orain arte kaleratutako diskoetan sartu gabe gelditu zaizkien kantuez osatu du lan berria eta aurkezpen kanta bideoz ere lagundu dute. Hona hemen, Goseren bideoklipa. Naizena izateko bidean, inor ez da axolgabe geratuko…

Gaurkoz besterik ez, jakizue datorren astean berriz ere bilduko ditugula Arrasateko Facebookeko orrian esandako guztiak. Orain, zuena da hitza! Elkarbanatu albisteak, argazkiak, kexak, iradokizunak… nahi duzuena. Parte hartu! Bitartean, ongi hasi eta ongi pasa astea Laster arte!

Share on Facebook

Arrasateko Otamendi harategiak irabazi du Zumarragako buzkantza lehiaketa. San Martin eguna data aproposa da ba horrelako berriak biltzeko Ummm… esaten duten bezain gozuak al dira buzkantza horiek? Baina horrez gain, beste hainbat gai ere izan dira berbagai Arrasateko Facebookeko orrian, hauxe da azken asteko gertakarien bilduma, hor doa!

Arrasateko Otamendi harategia buzkantza lehiaketako irabazle ARGAZKIA: Goierriko Hitza

Otamendi harro eta pozik ikus dezakegu argazkian eta ez da gutxiagorako, sorpresaz jaso baitzuen saria! Seigarrenean lortu du garaikurra, azken orduan izena emanda. Jose Ramon Otamendik, Iker Agirreurreta harakinarekin batera, urtero 250 bat kilo buzkantza prestatzen dituzte Garagartzako San Migel jaietarako, hona hemen albiste osoa. Hori bai parea!

Gaur ere, San Martin egunean, egingo al dute txarri-hiltea? Gaur da eguna, azaroaren 11a, herri egutegian txarria hilteko sasoiaren hasiera, gaurtik gabon bueltara arte. San Martin egunaren ganean badago makina bat esaera; batzuk eguraldiagaz lotuta daude, badago Egiazko negua San Martinetan hasten dala dioen bat eta baita, Negu ona izateko, San Martinetarako hiru biderrez edurra egin behar dauela dioen beste bat. Bata edo beste… hotza datorrela seguru! Eta San Martin aipatzeaz bat denori burura etorri zaizuen hori ere gogoan hartu… Txarri guztiei heltzen jake San Martin eguna. Bitartean, gaur egun aproposa da txorizo, odoloste edota buzkantza afaltzeko!

Bestalde, azken egun hauetan, Gurasolandia 2011 ekimenaren inguruan ere aritu izan gara. Umeak al dituzu? Eta euskaraz aritzen zara haiekin? Hala bada, interesgarria izango zen zuretzat Gurasolandia. Hirugarren edizioa izan zen azaroaren 2koa, izan al zinen bertan? Zer moduzkoa izan zen esperientzia? Kontaiguzu, baliteke zure kontakizunarekin bat baino gehiago animatzea hurrengorako! Horrez gain, Mondragon Unibertsitateko telebista ere ezagutu dugu asteon, MU telebista ezagutzen al duzu? Ea bertako kazetari eta teknikariak zer diozkuen Sut&Blai saioko bideo honetan:

Gaurkoz besterik ez, eskerrik asko Arrasateko Facebookeko orrian parte hartu duzuen guztioi. Badakizue nahi duzuen oro konta dezakezuela bertan: herriko albisteak, argazkiak, bideoak, ekintzak… zure elkartearen agenda ezagutarazi, ekimenetarako gonbidapena luzatu, zerbait proposatu… Zure zain gaude! Ongi pasa asteburua guztiok, laster arte!

Share on Facebook

Arrasateko Zarugalde kaleko etxebizitza bat erre zen atzo arratsaldean sortuko sutearen ondorioz. Arrasateko orrian bildutakoari jarraiki, horixe izango da aste honetako laburpenaren lehen protagonista, has gaitezen!

Jesus Elorduik partekatu du atzo arratsaldean sorpresaz harrapatu gintuen albistea, hementxe irakur dezakezue. Zarugalde kaleko etxe baten azken soilaruan piztu zen sua eta kaltetuek kontatu dutenez, telebistan izan zuen sorburua. Bertan bizi zen bikotea onik atera zen, sua piztu bezain pronto ohartu omen ziren eta ziztu bizian alde egin zuten kalera. Hori bai, suak guztia erre du baina zorionez, ez du kalte pertsonalik eragin.

Musika kontuak zeharo errotuta daude gure herrian, horren adierazle aste honetan, ETB-3 kateko Sut&Blai saioan, Repelencia taldeari egindako erreportajea. Ikusi al dituzue Imanol, Unai eta Sergio? 12 urteko hirukoteak argi dauka musika atsegin duela eta ondo pasatzeko hartu dituztela instrumentuak eskuetan, a zer ekarria duten gainera! Hauekin etorkizuna ziurra izango da! Hona hemen, Repelencia taldea Sut&Blain:

Duela astebete, urriaren 21ean, Arrasate eta inguruko emakumeentzat Kafe Tertulia antolatu zuen Emakume Txokoak Seber Altube plazan. Arratsaldeko 17:00etan izan zen hitzordua, feminismoaren ekarpenak eta erronkak izan zituzten berbagai. Zer deritzozue ekimenari, bertaratu al zineten? Zuentzat zeintzuk dira arrasaten lehentasunez garatu beharreko erronka feministak?

Arrasateko erronka feministen inguruko kafe tertuliaren kartela

Eta aste honetako laburpena amaitzeko Sustatuk argitaratutako albistea aukeratu dugu. Pasadan astean, Arrasateko orrian komentatu genizuen bezala, gure mugetatik kanpo ere interes handia eragiten du Mondragon korporazioak, horregatik, Ameriketako Estatu Batuetako Moving Images produktora independenteko hiru kazetari kooperatibak bisitatzen aritu dira azken egunetan eta dokumentala egingo dute. Hementxe albiste osoa irakurgai.

Gaurkoz besterik ez, jakizue datorren astean berriz ere bilduko ditugula Arrasateko Facebookeko orrian esandako guztiak. Orain, zuena da hitza! Elkarbanatu albisteak, argazkiak, kexak, iradokizunak… nahi duzuena. Parte hartu! Bitartean, ongi pasa asteburua arrasatearrok, batzuentzat luzea izango da gainera Ongi izan eta laster arte!

Share on Facebook

Badatoz Arrasateko 2011ko San Juan jaiak, ostiral honetantxe hasiko dira eta Arrasateko horman daukazue egitarau ofiziala. Atera argazki batzuk eta bidalizkiguzue, gustora asko jarriko ditugu orrian denokin partekatzeko!

arrasate_san_juan

Egubakoitz honetan hasten dira Arrasateko San Juan jaiak. Gaur bertan, arratsaldeko 18:30etatik aurrera, Kulturateko Klaustroan Julio Galartaren omenez antolatutako erakusketa inauguratuko dute. Amaia Antzokian berriz, Arrasate Musikalen ikasturte bukaerako kontzertua izango da eta 19:00etan Debagoieneko VIII. jardunaldi gastronomikoen aurkezpena egingo dute Sebero Altube plazan.

Zapatua hainbat arte adierazpideren eguna izango da: pintura, arte martzialak, urban skate festa eta bertso jaialdia izango baitira. Bazkal osteko mus txapelketa ere ez da faltako, eta nola ez, arratsaldeko 19:00etan abiatuko den haurren danborrada. Domeka berriz, haur dantzarien eguna izango da eta ohi bezala, hainbat dantza erakustaldi egingo dituzte egun osoan zehar. Eguena da txupinazoaren egun handia eta orduantxe hasiko da onena, badakizue, gainontzeko ekintzak kontsultatu nahi baldin badituzue, esteka honetan duzue Arrasateko San Juan Jaien egitaraua.

Aurtengo jaietan Arrasatek alkate berria izango du, izan ere, honez gero jakingo duzuen bezala, Bildu koalizioko Inazio Azkarraga-Urizar da herriko alkate berria. Lehen bozketan, Bilduren 11 zinegotzien eta Aralarreko Joxe Etxeberriaren botoarekin gehiengo osoa lortu zuen. Herritarrez lepo beteta burutu zen Osoko Bilkuran jasotako lehen adierazpenetan pozik eta gogotsu agertu zen: ‘Agintzeko ez daukagu formula magikorik, baina lan egiteko gogoa eta indarra izugarriak dira’.

Iragarpenak dioenez eguraldi ezegonkorra izango dugu astebukaeran baina jakizue, Musakolako igerilekuak larunbatean zabalduko dituztela. Itxaso Apraizek jakinarazi digunez gainera, Aukeak Udako Kanpaina hasiko du eta ekintza mordo bat antolatu dituzte heldu zein umeentzako. Udan ere ez dugu aitzakiarik izango kirolik ez egiteko!

Bestalde, Itxasok baita, Arrasateko komertzioetan egingo duten auditoria baten berri eman digu. Dioenez, kontsumitzen den energiaren %20, aurreztu omen daitekeen xahuketa besterik ez da. Esteka honetan uzten dizuegu jaso dugun informazio osoa.

Eta amaitzeko, Beñat Mendietak Arrasateko orrian partekatu duen albistea ekarri behar dugu hona. Etxean gaztetxoak baldin badituzue, agian zuen interesekoa izango da ekimena. Basque Culinary Centerrek udako kanpaldi gastronomikoa abiatuko baitu gastronomia interesatzen zaien 15 eta 17 urte arteko gazteentzat. Uztailaren 1etik 10era egingo da Beizamako aterpetxe-udalekuan, hementxe dituzue jakin beharrekoak.

Badakizue, bestelako edozer esatea nahi baduzu, jakitun zara, Arrasateko orrialdean edota gure herriko blogean bertan egin dezakezu. Asteburu ona igaro!

Share on Facebook

Aurtengo Arrasateko kirol ikasturtea primerako izaten ari da, Arrasateko horman txapeldunak besterik ez ditugu.

Aste honetako errepasoari ekiteko, Ane Goikoetxearen komentario ekarri dugu: ‘Zorionak Josu! Estatuko Kenpo txapelketako irabazlea. Zorionak!!!’ gure aldetik ere zorionak eman nahi dizkiogu, eta bide batez, baita Anek utzitako informazioa uzten dizugu hemen.

Txapeldunen artean mugitzen jarraituko dugu, Beñat Mendietak gurean utzitakoa ere garaileen artean uzten baikaitu: ‘Gimnasia Erritmikoko gure neskatoak Gasteizen txapeldunak izan dira…Zorionak!!!!’ Arestian esan bezala, zorionak baita gure aldetik ere eta hemen duzu esteka interesgarria.

ETB-1eko ‘Finlandia’ saioan aste honetan Arrasate eta Aretxabaletaren arteko lehia iragarri dute eta guk ere gure komunitatera ekarri dugu asteon. Hemen duzu aurrerapen bideoa.

Aste honetako errepasoa amaitzeko, Toponimiaren asteroko txanda iritsi da, izan ere, Jose Luis Ormaetxea Lasagak idatzitako Arrasateko Toponimia liburua hizpide hartuta, honako harri bitxia ekarri dugu asteon. BA AL ZENEKIEN: Zerkosteta, Cercostetas, Serkaosteta, Serkostieta, Serkosteata…deitutako hesiak direla, Cecorroste, edota Cerca-osteta ere esaten zela? ‘extramuros’ berbatik dator. Antzinako kalea da eta ‘paso público’ bezala ere ezagutzen zen.

Zuk bestelakorik esateko edota komentatzeko badituzu, jakitun zara, Arrasateko orrialdean edota gure herriko blogean bertan egin dezakezula. Asteburu ona igaro dezazula.

Share on Facebook

Mondrako neskak izan dira Gipuzkoako onenak eta jada, bigarren mailara igo dira. Hauxe dugu aste honetako gai nagusia horman, beste kontu batzuekin batera.

Albiste ona Ane Goikoetxearen eskutik iritsi zen gure hormara: ‘gure neskak Gipuzkoako txapeldunak!!!! Aupa! Zorionak!!!! Hemen argazkiak.‘ Oso albiste pozgarria da eta ospatzeko modukoa.

Ospatzea aipatu dugunez, akaso, Maite Bazterretxeak proposatzen digun ondorengo hitzorduan ere ondo pasatuko dute baita hauek ere; ‘Ostiraletik, gaurtik, aurrera…GARAGARDO AZOKA!!!!’ Antolatzaileak Arrasate Errugbi Taldekoak dira (ART) eta gainera aurten, jaia bi asteburuz luzatuko dutela aurreratu dute. Hemen duzu albistea.

Ospakizunekin eta agendako ekitaldiekin jarraituko dugu eta orain Eutsi Mondraren berbak dakargu: ‘herrixan kultura sustatzeko ekimen paregabia Txondorra Sagardotegi Erretegiak proposatutakoa. Maiatzaren 28an, 14:00tan Bertso Bazkaria, bazkari ezin hobea egundoko giruan. Animo ta segi horrela!!!’ Gehiago jakin nahi baduzu, hemen dago esteka.

Eutsi Mondrak asko ematen dio komunitateari eta oso kontu interesgarriak ekartzen digu beti, esate baterako: ‘Lezetxikiri buruzko orrialdeko azken berria oso interesgarria da. Aztarnategiari buruzko monografia bat botako dute Teknopolis saiokoek EITB-ko hainbat kateetan.‘ Hemen duzu Eutsi Mondrak utzitako esteka. Hala ere, guk horrela erantzun dugu, akaso zuretzat ere interesgarria izan daiteke hemendik egun gutxira:  Aupa! Ia berriz ere ematen duten edo orain…telebista nahieran erronka berriarekin nahi dugunean ikusteko aukera izango dugu….’ Hemen duzu laster denon eskura egongo denaren aurrerapena.  Gainera Eutsi Mondra berak…dioenez; ‘Aranzadik jakinarazi duenez, Lezetxikiri buruzko dokumentala, ekainaren 5ean emango da.’ Honatx, esteka interesgarria.

Gure berri emaile nagusi eta garrantzitsuenarekin aurrera jarraituko dugu Eutsi Mondrarekin jakina: ‘Euskal literatura hizpide. AED-k antolatutako literaturjauziak programari esker ezagutuko ditugu euskal literaturaren berriak. Segi horrela Maite eta Itxaro, lan earra itxen dozue!!! ‘ Gure aldetik ere animuak bidali nahi dizkiegu eta baina egiten duten lan handiagatik zoriondu ere.

Orain, gizarte gai interesgarria ekarri digu Eutsi Mondrak, Xabier Euzkitzek idatzitakoa da eta gure baduzue, hemen duzue testu osoa irakurtzeko aukera. Gure aldetik…bakarrik esan, Erik haurra, hezur-muinaren auto transplante bat eginda duela eta orain, larri dago. Gaitza berritu baitzaio eta hezur-muin transplantea ahalik eta lasterren behar du, 5-6 hilabeteko epea du horretarako. Emaile izateko zer egin behar den informatzeko honako telefono zenbakia ere baduzu eskura 943 00 70 00, hala ere, Erik haurraren aitari mezu pribatua bidali nahi izanez gero…hemen duzu esteka.

Gure aldetik, Arrasateko Toponimia liburutik ateratako azken oharra ere jarri dugu asteon horman, horregatik hemen duzu, aste honetako errepasoan. Ba al zenekien…Angelen etxea edota Salinas etxea deiturikoa, Gazteluondon zegoela? 64.zenbakian eta ortua 164.nean. Ekialdetik Nicolas Altunaren etxea eta Jose de Solaren ortua zituen. Erdi inguruan, Ynchaurondo etxea eta ipar aldetik Gazteluondo kale publikoa. Hauxe, 1864ko informazioa. (Jose Luis Ormaetxea Lasaga)

Beste kontu zahar eta era berean berria dena, Eutsi Mondrari esker: ‘herritar gutxik dakite baina Azkoagatarren etxeak Mondragoeko harresiaren zatirik garrantzitsuenak gordetzen ditu bere baitan. Badakigu jabetza pribatua duela, baina herriko ondare zati garrantzitsu hori gordeta, eraberritu beharko litzateke eraikin hau.’ Honatx gehiago jakiteko lotura.

Eutsi Mondraren emariekin bukatzeko…: ‘Udalak San Andres auzoko harraska edo labaderua berreskuratuko du udalak.’ Beti esan dugu gure ondarea zaindu behar dugula eta interesgarria iruditzen zaigu bide horretatik jarraitzea. Hemen duzu albistearen esteka.

Datorren barikuan laburpen berri bat ekarriko dugu, baina horretarako zure laguntza ezinbestekoa izango da, zure emariak dira errepasoaren oinarri. Asteburu ona opa dizugu, badakizu, Arrasateko horman edota gure herriko blogean elkartuko garela.

Share on Facebook

Arrasateko jendeak, Arrasatek Facebooken duen orrialdean, unean-unean jarraitu ahal izan zuen, igandean, hauteskunde gaua, hesian bertan baieztatu genuenez. 2011ko udal hauteskundeek Ignacio Azcarraga-Urizar Larrea alkatetzan izango dugu, Bilduren zerrendan bera baitzegoen lehen tokian. Hortaz, Bilduk 2011ko udal hauteskundeak irabazi ditu Arrasaten; gu, gure aldetik, oso pozik gaude, orrialdean egondako parte-hartzea nabarmena izan delako. Benetan, eskerrik asko guztioi. Mundialak zarete!

Ikusmina handia zen Arrasaten igande, arratsaldean, hauteslekuak ixteko bi ordu inguru falta zirela; une horretan, eztabaida ireki genuen orrian, ‘porra’ batekin. Jakin nahi genuen zenbat zinegotzi aterako zituen, zuen ustez, alderdi bakoitzak, baina inor ez zen ausartu “kiniela” betetzen. Jakina, ez da erraza asmatzea nola banatuko ziren 21 zinegotzigo…Azkenean, dakizuenez, Bilduk, EAJk , PSE, Aralar, PP lortu dute ordezkaritza izatea Arrasateko Udal berrian; bakoitzak, 11, 4, 1 eta 1, zinegotzi izango dituzte.

Igandean, Arrasateko emaitzak ezagutu eta Arrasateko komunitateko horman jarri genituenean Esmeralda Go-gòk ‘atsegin dut’ ari eman zion.

Hemen amaituko dugu ‘biharamuna’k ekarri duena; laster, hementxe ikusiko dugu elkar, blog honetan, ostegunetik hona hauteskundeetatik kanpo orrialdean esan duzuenaren berri emateko asmoarekin… eta, jakina, edozein gairen inguruan hemendik aurrera kontatuko duzuena ere hor islatuko dugu. Eskerrik asko guztioi! Agur bero bat!

Share on Facebook

Maiatzaren 22an 2011eko udal hauteskundeak izango ditugu Arrasaten. Kanpaina joan den ostiralean, apirilaren 29an, hasi zen, (baina azken asteotan gure orrialdeko hormara iristen ari diren iruzkin eta estekak ikusita, argi dago kontua askoz lehenago abiatu zela). Zalantza barik, bi asteotan ugaritu egingo dira hauteskundeen ingurukoak.

Honen aurrean, zera otu zaigu: Arrasatek Facebooken duen jendearekin kanpaina bera eta hauteskunde gaua partekatzea; lehenengo aldia izango da Googlen ‘udal hauteskundeen emaitzak Arrasaten’ bilatuta, blog hau edo Facebookeko orrialdea aterako zaiguna

Hori horrela, Arrasatek Facebooken duen orrialdean kontatzen dituzuenez gain, hauteskunde gauean giroa berotzen ibiliko gara datuak gaurkotzen eta postak idazten. Are, emaitzak grafiko bidez eskaintzea ere pentsatu dugu… baina tira, ez dugu ezer aurreratuko!

Gau berezi hori zuokin partekatu nahi dugu Facebooken eta azkenean, Arrasateko alkatea nor izango den jakin Ignacio Azcarraga-Urizar Larrea (Bildu-Eusko Alkartasuna/Alternatiba Eraikitzen) Aritz Arrieta Kabiketa PSE-EE/PSOE), Juan Karlos Garitano Ezkurra (E.A.J-P.N.V), Roberto Berrio Parra (EB-B), María Iciar Lamarain Cenitagoya (PP), Jose Etxeberria Iztueta (ARALAR).

Blog honetan edota Arrasateko orrialdean ikusiko dugu elkar!

Share on Facebook

Arrasateko Leze Txiki koban egin dute aurkikuntza, Europan bizi ziren azken tximinoen arrastoak dira aste honetako gure orriko kontu nagusia.

Europan bizi ziren azken tximinoen arrastoak topatu dituzte Arrasateko Leze-Txiki koban eta gainera, izan daiteke, Neanderthalak baino aurretiko garaikoak izatea, ehun mila urte beranduago arkeologo euskaldunek beraien arrastoak aurkitu dituzte eta baliteke, garai hartako hegazti harrapakeri batek hauekin bukatu izana. Albiste interesgarria hau Ane Goikoetxeak utzi zuen gurean: ‘Pleistozeno garaiko tximino baten arrastoak aurkitu dituzte Arrasaten.’ Albistean, gure klima sasoi hartan epelagoa zela ere esaten da, horrela, janaria eta bizitzeko baldintza hobeak izanik. Bertan duzu esteka.

Aurkitutako tximinoaren arrastoak askorako ematen du, oso albiste garrantzitsua izan da, eta Eutsi Mondrak ere parte hartu du zera komentatuz: ‘Lezetxikiri buruzko orrixan agertu dan azken berrixa oso kuriosue da: Tximinuak ba euzen Garagartza aldian Neanderthalak bertan kazara juten zienian.’ Izan daiteke, aipatu legez, europan eta gainera hain iparraldean bizi ziren azken tximinoak izatea eta horretaz gainera, ‘homo heidelbergensis’ ekoak izatea. Gehiago jakiteko bertan duzu lotura.

Bagoaz orain bestelako kontuak jorratzera, orain Arrasate eta Bilbo autobusez egoteko aukerak areagotu baitira eta hau ere txalotzeko modukoa da. Ane Goikoetxeak ekarri du asteon gure orrialdeko hormara honakoa: ‘badakizu Bizkaibusa hartuta orain Bilbaora joateko aukera zabalagoa dugu…hori bai astelehenetik aurrera!’ Askotan erabiltzaileek, ibilbide alternatiboak topatu behar izaten zituzten aurrera egin ahal izateko, eta gainera unibertsitarioak dira erabiltzaile horietariko asko eta asko eta izaki aukera berria besoak zabalik hartuko zuten albistea. Bertan duzu gehiago irakurtzeko aukera.

Bukatzen joateko Arrasateko Toponimia liburua hartu eta zera ekarri dugu orrialdera asteon: BA AL ZENEKIEN: El Trinquete edota, Okendokua edo Trinkete Arrasateko tokiak direla…1987 urtean zera idatzi zuten: Gerra aurrean sozialistek ‘trasladaron sus locales a Okendokua o el Trinkete, en el arrabal de la Magdalena’ Iturria: Arrasateko Toponimia liburua, José Luis Ormaetxea Lasaga.

Honek bere erantzuna ere izan du jakina, eta guk asko eskertzen dugu Eutsi Mondraren emaria: ‘Trinketia Mahalako errebala eta azoka kalian artian zauen pilotaleku zan. Herriko plano zaharretan agerketan da, eta Mondragoeko artxiboko dokumentaziñuan be sarri azaltzen da’ Oker ez bagaude, urtea asko pasatu eta gero zinema ere bertan jarri zuten, ‘Gurea’ eta ondoren….Gaztetxea, gaur egun etxean daude bertan.

Orian bai, aste honetako errepasoaren bukaerara iritsi gara eta Eutsi Mondraren ekarpenarekin itxiko dugu gaurkoa: ‘Ungulatu batek istripua sortu du gaur goizean KATAIDE inguruan. ‘ Zelakoa zen ikusi nahi baduzu, hemen duzu aukera.

Eskerrik asko zuon parte hartzegatik eta badakizue, gure orrialdean edota gure herriko blogean topatuko garela, asteburuon eta gozatu trikitixaz Aramaio aldean.

Share on Facebook

Arrasateko igerilekuetara joateko aukera eta gure ondare zein toponimiaren zainketa dira aste honetan orrialdeko kontu nagusiak.

Denboraldi batez, konponketak egiteko igerilekuak itxita egon ostean, erabiltzaileen haserreak atzean geratu dira, izan ere gure horman Itxaso Apraizek honako oharra utzi zigun: ‘astelehenean, apirilak 26, barruko igerilekuetara joateko aukera debalde gainera!!!‘. Hemen duzu horrenbeste espero zen albistea.

Bestalde, gaurko kontuak utzita, atzera joko dugu eta Eutsi Mondrak egindako ekarpena dakargu: ‘erromatarrak gure herrian ibili ziren. Mondragoeko historialari batek jakinarazi duenez, Alacanteko Unibertsitateko Juan Manuel Abascal katedratikoak ikertu du XIX. mendean San Valerio baselizatik eramandako inskripzio latindarraren jatorria.’ Meatzerrekatik ateratako harria da eta zeharo ahaztuta izan dute. ‘Valerivs tirio dialco votum libens me rito’ esalditik tiraka hasi eta ikerketa egiten aritu da Arrasateko historialaria den Arantza Otaduy Tristanek. Gehiago jakiteko bertan duzu Eutsi Mondrak utzitako albistea.

Eutsi Mondraren emari berri batekin goaz: ‘zergaitik onartzen dugu herritarrok gure ondarearen desagerpena?’ Eutsi Mondrak gure horman eskegi duen argazkia, Ibarretako errotarena da, Polmetasa enpresaren pabiloi berria egiterakoan berriztatua izan behar baitzen. Oso egoera eskasean dago, horregatik dio berak Arrasateko historiaren zati bat berarekin batera galdetzeko zorian gaudela. Errota zahar hau, Martin Bañez-en hilketaren lekuko izan zen, 1448 urtean, Butronek Arrasate erre zuen garaikoa. Honekin batera, Martin Bañezen alarguna zen Sancha Ochoa Ozaetak Mondragoeko lehengo hizkeran esandakoak gorde dira eta guk hona ekarri nahi izan ditugu:

Oñetaco lurrau jabilt icara,

Lau araguioc vere an verala,

Martin Bañes Ybarretan il dala.

Artuco dot escu batean guecia,

Bestean çuci yraxeguia,

Erreco dot Aramayo guztia.

Gehiago jakin nahi baduzu, hemen duzu lotura interesgarria, Eutsi Mondrak gurean utzitakoa.

Historia egiten ari garen honetan, guk ere gure apurra gehitu nahi izan dugu eta atzo, San Prundentzio egunari dagokion garrantzia eman nahian hauxe topatu geneuen: ‘ba al zenekien…Arrasaten ere San Prudencio ere badugula? baita Sanprudentzio idatzita ere, 1.741. urtean jada Arrasaten bertan San Prudencio tokiaren inguruan hitz egiten zen, baita, 1.750ean ere, gaztainadia zegoela esaterakoan, bestelakoak ere badira; zubia, mendiak, eta baita zelaia ere. Informazioa Jose Luis Ormaetxea Lasaga. Arrasateko Toponimia.’

Aurrera goaz aste honetako laburpenarekin eta jarraian Ane Goikoetxearen oharra: ‘gazte Txokoetatik Sendaviva parkera joan dira…’ Askok hitz egiten dute Sendavivara inoiz joan behar dela, oso interesgarria dela eta ikasteko modu berria ere badela. Anek utzitako albistea irakurri nahi baduzu hemen duzu esteka.

Ia errepasoaren bukaerara iritsi gara eta Eutsi Mondraren oharra dakargu: ‘Julio Galarta pintore mondragoetarra 94 urterekin zendu da gaur, apirilak 25. Doluminak familiari eta eskerrak Juliori gure herria pintatzeagatik.’ Gure aldetik ere gauza bera esan nahi dugu eta Eutsi Mondrak utzitako loturarekin gure doluminak igorri nahi ditugu.

Orain, amaitzeko unea iritsi denean, mokadutxo batekin egitea akaso, hobe, Ane Goikoetxeak gure hormara oso galdera tentagarria ekarri du: ‘janari exotikoak gustuko dituzu?’ Askok esango dute, onena txistorra, odolostea eta horrelakoak dira, eta arrazoi dute jakina, baina gure herrian bestelakoetara aukera ere eskaintzen denez, honatx herrian bertan daukaguna.

Momentuz, hemen utziko dugu aste honetako laburpena, hala ere, badakizu, herriko horman edota gure herriko blogean konektatuta jarraitzeko aukera duzula. Eskerrik asko zure parte hartzeagatik eta asteburu ona izan.

Share on Facebook